ઓપરેશન સિંદૂર બાદ પીએમ મોદીનો મોટો નિર્ણય, ત્રણ દેશોનો પ્રવાસ રદ કર્યો

નવી દિલ્હી : જમ્મુ કાશ્મીરના પહલગામમાં થયેલા આતંકી હુમલાનો ભારતે પાકિસ્તાનને ઓપરેશન સિંદૂરથી જડબાતોડ જવાબ આપ્યો છે. ભારતે પાકિસ્તાન અને પાકિસ્તાન અધિકૃત જમ્મુ અને કાશ્મીરમાં 9 આતંકવાદી કેમ્પ પર મિસાઇલ હુમલા કર્યા છે. આ હુમલામાં 100 થી વધુ આતંકવાદીઓ માર્યા ગયા હોવાના અહેવાલ છે. આ કાર્યવાહી બાદ ભારતના વડા પ્રધાન નરેન્દ્ર મોદીએ એક મોટો નિર્ણય લીધો છે. પીએમ મોદીનો ત્રણ દેશોનો પ્રવાસ હાલ પૂરતો રદ કરવામાં આવ્યો છે.

ત્રણ દેશોનો પ્રવાસ રદ કરવામાં આવ્યો

પાકિસ્તાનમાં આતંકવાદીઓ વિરુદ્ધ ભારતની કાર્યવાહી બાદ ચાલી રહેલા તણાવ વચ્ચે પીએમ મોદીએ એક મોટો નિર્ણય લીધો છે. વડા પ્રધાન નરેન્દ્ર મોદીનો ત્રણ દેશો – નોર્વે, ક્રોએશિયા અને નેધરલેન્ડનો પ્રવાસ હાલ પૂરતો રદ કરવામાં આવ્યો છે. પીએમ મોદી આ 3 યુરોપિયન દેશોમાં ઘણી મહત્વપૂર્ણ દ્વિપક્ષીય વાટાઘાટો અને બેઠકોમાં ભાગ લેવાના હતા. અત્યાર સુધી પીએમ મોદીના વિદેશ પ્રવાસ રદ કરવાનું કારણ આપવામાં આવ્યું નથી પરંતુ એવું માનવામાં આવે છે કે રાષ્ટ્રીય સુરક્ષા માટેના મહત્વપૂર્ણ સમયને ધ્યાનમાં રાખીને આ નિર્ણય લેવામાં આવ્યો છે.

પીએમ મોદીએ ઓપરેશન પર નજર રાખી હતી

જ્યારે ભારતીય સેના ઓપરેશન સિંદૂર હેઠળ પાકિસ્તાનમાં જૈશ-એ-મોહમ્મદ અને લશ્કરના કેમ્પોને નિશાન બનાવી રહી હતી ત્યારે પીએમ મોદી પણ આ ઓપરેશન પર સતત નજર રાખી રહ્યા હતા. આ હુમલાઓમાં ત્રણેય સેવાઓ – ભારતીય સેના, નૌકાદળ અને વાયુસેનાની ચોકસાઇ સ્ટ્રાઇક હથિયાર પ્રણાલીઓનો ઉપયોગ કરવામાં આવ્યો હતો. ભારત દ્વારા તમામ 9 સ્થળોએ કરાયેલો હુમલો ચોક્કસ અને સફળ રહ્યો.

આ પણ વાંચો….ઓપરેશન સિંદૂરને આ રીતે આપવામાં આવ્યો અંજામ, વાંચો ઈનસાઈડ સ્ટોરી