Paytmએ રોકાણકારોને રાતા પાણીએ રડાવ્યા, દરેક શેરદીઠ રૂ.1,800થી વધુનું નુકસાન
નવી દિલ્હી: દેશની સૌથી મોટી ડિજિટલ પેમેન્ટ કંપની Paytmની પેરેન્ટ કંપની One 97 Communications Ltd ના શેરમાં ઘટાડો આજે પણ ચાલુ રહ્યો હતો. નોઈડા સ્થિત આ કંપનીનો શેર મંગળવારે પાંચ ટકાના ઘટાડા સાથે લોઅર સર્કિટને સ્પર્શ્યો હતો. અગાઉ સોમવારે પણ તે લોઅર સર્કિટને સ્પર્શ્યું હતું. આ સાથે જ કંપનીનું માર્કેટ કેપ ઘટીને 2.5 બિલિયન ડોલર થઈ ગયું છે જ્યારે 2021માં IPOના સમયે કંપનીનું મૂલ્ય 20 બિલિયન ડોલર હતું.
BSE પર કંપનીનો શેર પાંચ ટકા ઘટીને રૂ. 334.15 થયો હતો. તેની 52 સપ્તાહની નીચી સપાટી રૂ. 318.35 છે, જે આ વર્ષે 18 ફેબ્રુઆરીએ પહોંચી હતી. કંપનીના સીઓઓ અને પ્રમુખ ભાવેશ ગુપ્તાએ રાજીનામું આપી દીધું છે. કંપનીએ શનિવારે આની જાહેરાત કરી હતી.
વર્ષ 2021માં Paytmનો રૂ. 18,300 કરોડનો IPO આવ્યો હતો, તેની ઈશ્યૂ કિંમત 2,150 રૂપિયા હતી. પરંતુ લિસ્ટિંગ પછી તરત જ, કંપનીનું માર્કેટ કેપ ઘટીને 13 બિલિયન ડોલર થઈ ગયું, જે તેના છેલ્લા પ્રાઈવેટ માર્કેટ વેલ્યુએશન 16 બિલિયન ડોલર કરતાં ઓછું હતું. કંપનીના IPOમાં નાણાંનું રોકાણ કરનારાઓને શેર દીઠ રૂ. 1,800થી વધુનું નુકસાન થયું છે.
તાજેતરમાં RBIએ પેટીએમ પેમેન્ટ બેંકની સર્વિસ પર પ્રતિબંધ મૂક્યો હતો. આ પછી, MD અને CEO સુરિન્દર ચાવલાએ પેમેન્ટ બેંકમાંથી રાજીનામું આપી દીધું હતું. શનિવારે, કંપનીએ લીડરશિપ સ્ટ્રક્ચરમાં મોટા ફેરફારની જાહેરાત કરી હતી. કંપનીના વેલ્થ મેનેજમેન્ટ પ્લેટફોર્મ પેટીએમ મનીના CEO વરુણ શ્રીધરની જગ્યા હવે રાકેશ સિંહને સોંપવામાં આવી છે. રાકેશ સિંઘ PayUની ઇન્વેસ્ટમેન્ટ કંપની Fisdomની બ્રોકિંગ સર્વિસીસના હેડ રહી ચુક્યા છે.
Paytm નો IPO 8 નવેમ્બર, 2021 ના રોજ સબસ્ક્રિપ્શન માટે ખુલ્લો હતો. તેની ઈશ્યૂ કિંમત 2,150 રૂપિયા હતી. જેમાં મોટી સંખ્યામાં રિટેલ રોકાણકારોએ ભાગ લીધો હતો. પરંતુ આ શેર તેની ઈશ્યુ કિંમતની નજીક ક્યારેય પહોંચી શક્યો નથી. કંપનીના શેર 9.30% ડિસ્કાઉન્ટ સાથે લિસ્ટ થયા હતા અને પછી 27%થી વધુના ઘટાડા સાથે બંધ થયા હતા. આનો અર્થ એ થયો કે લિસ્ટિંગ પર મજબૂત કમાણીની અપેક્ષા રાખનારા રોકાણકારો ખૂબ જ નિરાશ થયા હતા. પરંતુ તે પછી પણ શેરમાં ઘટાડો ચાલુ રહ્યો હતો.
Paytm કંપનીના શેરની 52 સપ્તાહની ઊંચી સપાટી 998.30 રૂપિયા છે, ગયા વર્ષે 20 ઓક્ટોબરે તે આ સ્તરે પહોંચી ગયું હતું. સોમવારે તે રૂ. 351.70 પર બંધ થયો હતો અને મંગળવારે રૂ. 350.95 પર ખુલ્યો હતો. પછી આ શેર લોઅર સર્કિટમાં આવી ગયો અને તે ઘટીને રૂ. 334.15 પર આવી ગયો છે. આ કિંમતે તેનું માર્કેટ કેપ ઘટીને રૂ. 21,242.09 કરોડ રહી ગયું છે. આ રીતે, IPOમાં સ્ટોક મેળવનારા રોકાણકારોને દરેક શેર પર રૂ. 1,815.85નું નુકસાન થયું છે.