‘ઓપરેશન સિંદૂર’ની અસર: પાકિસ્તાને સરહદ નજીકના 72 આતંકવાદી લોન્ચપેડ દૂર ખસેડ્યા
જમ્મુ અને કાશ્મીર: પહલગામ હુમલા બાદ ભારતીય સેનાએ પાકિસ્તાન વિરૂદ્ધ ‘ઓપરેશન સિંદૂર’ શરૂ કર્યું હતું. જોકે, ચાર દિવસ પાકિસ્તાનને બરાબરનું હંફાવ્યા બાદ ‘ઓપરેશન સિંદૂર’ને સ્થગિત કરવામાં આવ્યું હતું. હવે, ‘ઓપરેશન સિંદૂર’ સ્થગિત કર્યાને 7 મહિના થયા બાદ પાકિસ્તાન દ્વારા સરહદ નજીક બદલાયેલી વ્યૂહરચનાના અહેવાલો સામે આવ્યા છે.
60 લોન્ચપેડ હજુ પણ સક્રિય
BSFના એક વરિષ્ઠ અધિકારીએ તાજેતરમાં જણાવ્યું હતું કે, પાકિસ્તાને આતંકવાદીઓની ઘૂસણખોરી માટે ઉપયોગમાં લેવાતા 72 લોન્ચપેડને સરહદની નજીકથી હટાવીને ‘ઊંડાણવાળા વિસ્તારોમાં’ ખસેડ્યા છે. BSFના ડીઆઈજી વિક્રમ કુંવરે આ અંગે માહિતી આપતા કહ્યું હતું કે, સિયાલકોટ અને ઝફરવાલના ઊંડાણવાળા વિસ્તારોમાં આવેલા લગભગ 12 લોન્ચપેડ કાર્યરત છે. જ્યારે અન્ય વિસ્તારોમાં 60 લોન્ચપેડ હજુ પણ સક્રિય છે.
તેમણે સ્પષ્ટતા કરી કે આ લોન્ચપેડ કાયમી નથી અને આતંકવાદીઓ ભારતમાં ઘૂસણખોરી કરે તે પહેલાં જ તેમને સક્રિય કરવામાં આવે છે. ડીઆઈજી કુંવરે જણાવ્યું કે, ઓપરેશન સિંદૂર પછી, જૈશ-એ-મોહમ્મદ અને લશ્કર-એ-તૈયબાના આતંકવાદીઓને અલગ અલગ તાલીમ આપવાને બદલે હવે એકસાથે લાવવામાં આવી રહ્યા છે, જેથી સંકલિત રીતે તાલીમ થઈ શકે.
BSF સરકારના આદેશ માટે તૈયાર
BSFના આઇજી જમ્મુ ફ્રન્ટિયર શશાંક આનંદને કહ્યું કે, જો સરકાર ઓપરેશન સિંદૂર ફરી શરૂ કરવાનો આદેશ આપે છે, તો BSF સંપૂર્ણપણે તૈયાર છે. BSFએ 1965, 1971, 1999 કારગિલ અને ઓપરેશન સિંદૂર જેવા યુદ્ધોમાં અનુભવ મેળવ્યો છે, અને જરૂર પડ્યે દુશ્મનને વધુ નુકસાન પહોંચાડવા માટે સક્ષમ છે.
ઓપરેશન સિંદૂર દરમિયાન પાકિસ્તાની રેન્જર્સ તેમની ચોકીઓ છોડીને ભાગી ગયા હતા. IG આનંદે જણાવ્યું કે, પરિસ્થિતિ સામાન્ય થયા પછી તે બધા કર્મચારીઓ પાછા ફરશે, અને બધી પ્રવૃત્તિઓ BSFની દેખરેખ હેઠળ છે.
