મૌલાના મહમૂદ મદનીએ સુપ્રીમ કોર્ટ પર કર્યા આકરા પ્રહારો: ‘જિહાદ’ શબ્દના દૂરુપયોગનો સરકાર પર લગાવ્યો આરોપ

ભોપાલ: ભારતમાં મુસ્લિમ સમુદાય લઘુમતીમાં છે. ઘણા સંજોગોમાં મુસ્લિમ સમુદાયને એવું લાગે છે કે, તેમની સાથે અન્યાય થઈ રહ્યો છે. જેને લઈને તેમના આગેવાનો અવારનવાર અવાજ ઉઠાવતા રહે છે. પરંતુ તાજેતરમાં એક મુસ્લિમ આગેવાન મૌલાના મહમૂદ મદનીએ સરકાર, સુપ્રીમ કોર્ટ અને મીડિયા પર ગંભીર આરોપો લગાવ્યા છે અને વિવાદિત નિવેદન આપ્યું છે. તેમણે શું કહ્યું આવો જાણીએ.

‘જિહાદ’ શબ્દને બદનામ કરાઈ રહ્યો છે

જમિયત ઉલેમા-એ-હિંદના અધ્યક્ષ મૌલાના મહમૂદ મદનીએ ભોપાલમાં એક કાર્યક્રમ દરમિયાન તાજેતરના કેટલાક ન્યાયિક નિર્ણયો અને દેશના વર્તમાન રાજકીય વાતાવરણ પર ગંભીર સવાલો ઉઠાવ્યા છે. મૌલાના મદનીએ જણાવ્યું હતું કે, “બાબરી મસ્જિદ અને તિન તલાક કેસ જેવા મહત્ત્વપૂર્ણ કેસોમાં લેવામાં આવેલા નિર્ણયો સૂચવે છે કે “અદાલતો સરકારના દબાણ હેઠળ કામ કરી રહી છે.

આપણ વાચો: સુનેહરી બાગ મસ્જિદને હટાવવા અંગે લોકોનો અભિપ્રાય માંગ્યો, ત્યારે મૌલાનાએ ગુસ્સે થઈને પીએમ મોદીને પત્ર લખ્યો કે………

કોર્ટના ઘણા નિર્ણયોએ લઘુમતીઓના બંધારણીય અધિકારોનું સ્પષ્ટ ઉલ્લંઘન કર્યું છે. 1991ના ઉપાસના સ્થળ અધિનિયમ છતાં અન્ય કેસોમાં લેવાયેલા પગલાં તેનું ઉદાહરણ છે. સુપ્રીમ કોર્ટને ત્યાં સુધી જ ‘સુપ્રીમ’ કહી શકાય છે, જ્યાં સુધી ત્યાં બંધારણ સલામત છે. જો આવું નથી થતું, તો તે આ નામની હકદાર રહેતી નથી.”

મૌલાના મદનીએ “જિહાદ” શબ્દના દુરુપયોગ બદલ સરકાર અને મીડિયાની આકરી ટીકા પણ કરી છે. મૌલાના મદનીએ કહ્યું કે, “આજે સરકાર અને મીડિયા દ્વારા એક પવિત્ર શબ્દને સંપૂર્ણપણે ખોટી રીતે વિશ્વ સમક્ષ રજૂ કરવામાં આવી રહ્યો છે.

જિહાદને “લવ જેહાદ,” “થૂંક જિહાદ,” અને “લેન્ડ જેહાદ” જેવા શબ્દો સાથે જોડીને બદનામ કરવામાં આવી રહ્યો છે, જ્યારે જિહાદ હંમેશા બીજાઓના ભલા અને ભલાઈ માટે જ કરવામાં આવે છે.” મદનીએ ભારપૂર્વક જણાવ્યું કે, “જ્યાં પણ જુલમ હશે, ત્યાં જિહાદ હશે.”

આપણ વાચો: વકફ સંશોધન બિલ મુદ્દે મુસ્લિમ સંગઠનોનું જંતરમંતર ખાતે વિરોધ પ્રદર્શન…

મુસ્લિમો બંધારણ પ્રત્યે વફાદારી બતાવે છે

મદનીએ દેશમાં મુસ્લિમોની સ્થિતિ અંગે ટિપ્પણી કરતા કહ્યું કે, હાલમાં 10 ટકા લોકો મુસ્લિમોના પક્ષમાં છે. 30 ટકા મુસ્લિમોની વિરુદ્ધ છે. 60 ટકા લોકો મૌન છે. મુસ્લિમોએ આ 60 ટકા લોકો સાથે વાતચીત કરવી જોઈએ. કારણ કે જો આ લોકો મુસ્લિમોની વિરૂદ્ધમાં જશે, તો દેશમાં મોટું સંકટ ઊભું થઈ શકે છે.

તેમણે કહ્યું કે એક ધર્મનિરપેક્ષ દેશ ભારતમાં લોકશાહી શાસન વ્યવસ્થા છે, જ્યાં જિહાદની કોઈ ચર્ચા નથી. અહીં મુસ્લિમો બંધારણ પ્રત્યે વફાદારી બતાવે છે . નાગરિકોના અધિકારોનું રક્ષણ કરવાની જવાબદારી સરકારની છે. જો સરકાર એવું નથી કરતી તો એના માટે સરકાર જ જવાબદાર હશે.

વંદે માતરમ ગાવાના મુદ્દે મૌલાના મદનીએ કહ્યું કે, “મૃત સમુદાયો સમર્પણ કરી દે છે. જો તેઓ વંદે માતરમ બોલવાનું કહેશે, તો તેઓ તેનો પાઠ શરૂ કરી દેશે. આ મૃત સમુદાયોની ઓળખાણ છે. જો આપણે જીવીત સમુદાય છીએ, તો આપણે પરિસ્થિતિઓનો સામનો કરવો પડશે.”