લોકસભા ચૂંટણી-2024 માટે ભાજપનો માસ્ટર પ્લાન જાણો….

નવી દિલ્હી: ભારતીય જનતા પાર્ટી 2024માં યોજાનારી લોકસભા ચૂંટણી જીતવા માટે કંઈને કંઈ યોજનાઓ બનાવી રહી છે. પાંચ રાજ્યોની વિધાનસભા ચૂંટણીમાં જંગી જીત નોંધાવ્યા બાદ ભાજપે હવે લોકસભા ચૂંટણીની તૈયારી શરૂ કરી દીધી છે. પાર્ટીએ થોડા મહિનામાં યોજાનારી ચૂંટણી માટે દેશભરમાં સંગઠનાત્મક બેઠકો યોજીને ચૂંટણીની તૈયારીઓ શરૂ કરી દીધી છે.

જે અંતર્ગત 26 ડિસેમ્બરના રોજ ભાજપના અધ્યક્ષ જેપી નડ્ડા અને કેન્દ્રીય ગૃહ પ્રધાન અમિત શાહ બંગાળ પહોંચ્યા છે. અહીં દિવસભર પાર્ટીની ત્રણ મોટી બેઠકો યોજાવાની છે જેમાં રાજ્ય સ્તરના તમામ ટોચના નેતાઓને બોલાવવામાં આવ્યા છે. આ ઉપરાંત પાર્ટીના બંને ટોચના નેતાઓ આઈટી સેલ અને યુવા અને અન્ય મોરચાના નેતાઓ પણ હાજર રહેશે.

લોકસભા ચૂંટણી પહેલા કાર્યકરોને ચાર્જ આપવા માટે વડા પ્રધાન નરેન્દ્ર મોદી, ગૃહ પ્રધાન અમિત શાહ અને જેપી નડ્ડા રાષ્ટ્રીય પદાધિકારીઓની બેઠક વિશે માહિતી આપશે. ખાસ બાબત તો એ છે કે 5 જાન્યુઆરી પહેલા તમામ મોરચાની રાજ્ય સ્તરીય બેઠક યોજાશે. આ ઉપરાંત 24મી જાન્યુઆરીના રાષ્ટ્રીય મતદાતા દિવસે પાંચ હજાર સ્થળોએ નવા મતદારો સાથે યુવા મોરચાની બેઠકો યોજાવાની છે. તેનો ઉદ્દેશ ઓછામાં ઓછા 7 લાખ ગામડાઓમાંથી એક નવા કાર્યકરને ઉમેરવાનો હશે. આ સાથે ભાજપના મતદારોની સંખ્યા વધારવાનો લક્ષ્યાંક પણ નક્કી કરવામાં આવ્યો છે.

પાર્ટી જનતા સાથે જોડાઈ શકે તે માટે જાન્યુઆરી-ફેબ્રુઆરીમાં ‘ગાંવ ચલો અભિયાન’ ચલાવવામાં આવશે. કેન્દ્ર સરકારની યોજનાઓનો લાભ લેનારા લોકોના ડેટા રેકોર્ડ પર સંપર્ક સ્થાપિત કરવામાં આવશે.

આ અંતર્ગત પાર્ટીએ નક્કી કર્યું છે કે દરેક લોકસભા મતવિસ્તાર માટે એક લોકસભા પ્રભારી અને લોકસભા કન્વીનર બનાવવામાં આવશે. આ સિવાય પાર્ટી બૂથ સ્તર પર છેલ્લી ત્રણ ચૂંટણીઓનું વિશ્લેષણ કરશે અને દરેક રાજ્યમાં 3-4 લોકસભા સીટોને જોડીને એક ક્લસ્ટર બનાવવામાં આવશે. આ ઉપરાંત તેમના માટે અલગથી ક્લસ્ટર ઈન્ચાર્જ પણ બનાવવામાં આવશે.

પાર્ટી દ્વારા લેવાયેલા આ નિર્ણયમાં સૌથી મોટી વાત એ છે કે જે પણ લોકસભા કન્વીનર બનશે તે ચૂંટણી લડી શકશે નહિ. આ ઉપરાંત એવા કોઈ પણ રાજ્યોમાં ક્લસ્ટર બનાવવામાં નહીં આવે જ્યાં માત્ર 4 કે 5 લોકસભા બેઠકો છે. જિલ્લા અને રાજ્ય કક્ષાએ જોઇનિંગ ટીમ બનાવવામાં આવશે.

જીતેલા અને હારેલા તમામ પ્રકારના બૂથનું વિશ્લેષણ કરવામાં આવશે. સમાજના વિવિધ વર્ગોનો સંપર્ક કરીને તેમને પાર્ટીમાં સામેલ કરવામાં આવશે. રાષ્ટ્રીય અધ્યક્ષ જેપી નડ્ડા, ગૃહ પ્રધાન અમિત શાહ અને સંરક્ષણ પ્રધાન રાજનાથ સિંહ ક્લસ્ટરમાં રહેશે. લોકસભા ચૂંટણીની તૈયારીઓ અનુસાર ભાજપ 30 જાન્યુઆરી પહેલા લોકસભા ચૂંટણી કાર્યાલય બનાવશે.

આ સિવાય સોશિયલ મીડિયાના દરેક પ્લેટફોર્મને મજબૂત બનાવવાના નિર્દેશ આપવામાં આવ્યા છે. દરેક રાજ્યમાં 50 સ્થળોએ યુવા, મહિલા, એસસી, એસટી સંમેલનનું આયોજન કરવામાં આવશે. ભાજપે 2024માં યોજાનારી લોકસભા ચૂંટણી જીતવા માટે ‘આ વખતે અમે 400 પાર કરીશું’નું સૂત્ર આપ્યું છે.