બેંગલુરુ: કર્ણાટકના રાજકારણમાં ચાલી રહેલી પાવર ગેમ અને મુખ્યમંત્રી સિદ્ધારમૈયા તથા નાયબ મુખ્યમંત્રી ડીકે શિવકુમાર વચ્ચેના કથિત આંતરિક સંઘર્ષની ચર્ચાઓ વચ્ચે એક મોટો રાજકીય ઘટનાક્રમ સામે આવ્યો છે. પાર્ટીના હાઈકમાન્ડની દખલગીરી બાદ આ બંને દિગ્ગજ નેતાઓ બેંગલુરુમાં નાસ્તાના ટેબલ પર એકસાથે જોવા મળ્યા હતા. સૂત્રોના મતે, આ માત્ર બ્રેકફાસ્ટ નહોતો, પરંતુ આ મુલાકાતનો મુખ્ય એજન્ડા સત્તાનું પાવર ટ્રાન્સફર કરવાનો હતો. માનવામાં આવે છે કે, માર્ચ-એપ્રિલ 2026 સુધીમાં સિદ્ધારમૈયા પાસેથી શિવકુમારને મુખ્યમંત્રી પદનો હવાલો સોંપવાનો રોડમેપ તૈયાર કરવામાં આવી રહ્યો છે. જોકે, બંને નેતાઓએ નાસ્તો કર્યા બાદ સંયુક્ત પ્રેસ કોન્ફરન્સ યોજીને તમામ વિવાદોને નકારી કાઢ્યા હતા.
બ્રેકફાસ્ટ મીટિંગ બાદ પ્રેસ કોન્ફરન્સમાં ડીકે શિવકુમારે સ્પષ્ટતા કરી કે, “જ્યાં સુધી નેતૃત્વની વાત છે, અમે અમારા પક્ષના હાઈકમાન્ડને માનીએ છીએ. તેઓ જે કહે છે, તે અમારો અંતિમ નિર્ણય છે. અમે પક્ષના વફાદાર સિપાહી રહ્યા છીએ.” તેમણે વિશ્વાસ વ્યક્ત કર્યો કે કર્ણાટક 2028માં સરકારનું પુનરાવર્તન કરશે અને 2029ની લોકસભા ચૂંટણીમાં પણ આગળ વધશે. આવી સ્થિતિમાં, એ સ્પષ્ટ થઈ ગયું છે કે મુખ્યમંત્રી પદ અંગેનો નિર્ણય ફક્ત દિલ્હીમાં જ લેવામાં આવશે.
આ ઉપરાંત તમામ વિવાદોને નકારી કાઢતા ડીકે શિવકુમારે એમ પણ કહ્યું કે, “અમે સાથે મળીને કામ કર્યું છે. CM એ જે કંઈ કહ્યું છે, હું તેમની સાથે છું. અમારા વચ્ચે કોઈ મતભેદ નથી.” આ તરફ, મુખ્યમંત્રી સિદ્ધારમૈયાએ પણ આ જ વાત દોહરાવી અને કહ્યું કે, “અમે બંનેએ વિધાનસભા ચૂંટણીમાં જે રીતે કામ કર્યું હતું, તે જ રીતે અમે 2028ની ચૂંટણીમાં પણ જવા માંગીએ છીએ.” તેમણે ભારપૂર્વક જણાવ્યું કે તેમના વચ્ચે કોઈ મતભેદ નથી અને હાઈકમાન્ડના આદેશ મુજબ જ કામ થશે.
આ પણ વાંચો: કર્ણાટકમાં સિદ્ધારમૈયા અને ડીકે શિવકુમારની આજે થશે બેઠક, મડાગાંઠનો આવી શકે છે ઉકેલ
શિયાળુ સત્રની વ્યૂહરચના અને વિપક્ષ પર પ્રહાર
બંને નેતાઓએ તેમના સંયુક્ત નિવેદનમાં વિપક્ષને પણ નિશાન બનાવ્યો હતો. ડીકે શિવકુમારે કહ્યું કે, “આજે અમે 2028ની વિધાનસભા ચૂંટણી માટેની વ્યૂહરચના અને વિપક્ષ સાથે કેવી રીતે વ્યવહાર કરવો તે અંગે ચર્ચા કરી હતી. કર્ણાટકની જનતાને જે વચનો આપ્યા છે તે પૂરા કરવાની અમારી જવાબદારી છે.”
મુખ્યમંત્રી સિદ્ધારમૈયાએ ભાજપ અને જેડીએસ પર આકરા પ્રહારો કર્યા હતા. તેમણે કહ્યું કે, “ભાજપ અને જેડીએસને ખોટા આરોપો લગાવવાની આદત છે. તેઓ અવિશ્વાસ પ્રસ્તાવ લાવવાની વાત કરે છે, જે અશક્ય છે. અમારી પાસે 140 ધારાસભ્યોનું બહુમત છે.” તેમણે કહ્યું કે શિયાળુ સત્ર આવી રહ્યું છે અને વિપક્ષના જૂઠાણાંનો સામનો કરવા માટે અમે સંપૂર્ણપણે તૈયાર છીએ.
શું છે કોમ્પ્રોમાઈઝ ફોર્મ્યુલા?
આ મુલાકાત બાદ સોશિયલ મીડિયા પર જે તસવીર વાયરલ થઈ, જેમાં બંને નેતાઓ ઉપમા, ઈડલી અને કેસરી બાથનો આનંદ લેતા જોવા મળ્યા, તેને ‘બધું બરાબર છે’ નો સંદેશ આપવાનો પ્રયાસ માનવામાં આવ્યો છે. સૂત્રોના જણાવ્યા અનુસાર, આ બેઠકમાં જે સમજૂતી થઈ છે તેને “શિવકુમાર-સિદ્ધારમૈયા ફોર્મ્યુલા” કહેવામાં આવી રહ્યો છે.
આ ફોર્મ્યુલા હેઠળ, શિવકુમારને ચોક્કસ સમય પછી સત્તા હસ્તાંતરણનું આશ્વાસન મળશે. તેમના સમર્થકોને કેબિનેટમાં વધુ જગ્યા આપવામાં આવશે. ડીકે શિવકુમાર પક્ષમાં સ્થિરતા જાળવવા માટે હાલમાં નાયબ મુખ્યમંત્રી તરીકે યથાવત્ રહેશે અને રાજ્ય કોંગ્રેસ અધ્યક્ષ પણ બની રહેશે. સૂત્રો માને છે કે શિવકુમાર પાસે હાલમાં CMને હટાવવા માટે પૂરતા ધારાસભ્યો નથી, તેથી આ સમાધાન તેમના માટે શ્રેષ્ઠ વિકલ્પ છે અને કોંગ્રેસ પક્ષ પણ વિના વિવાદે સત્તા પરિવર્તન ઈચ્છે છે.
