6G ટેકનોલોજી મુદ્દે જ્યોતિરાદિત્ય સિંધિયાએ કરી મોટી જાહેરાત, ઇન્ટરનેટની સ્પીડ આટલી વધશે

નવી દિલ્હી : ભારતમાં 5G ટેકનોલોજીને સફળતાપૂર્વક લોન્ચ કર્યા બાદ સરકાર હવે 6G ટેકનોલોજી વિકસાવવા કાર્યરત છે. આ અંગે એક ગ્લોબલ બિઝનેસ સમિટમાં કેન્દ્રીય મંત્રી જ્યોતિરાદિત્ય સિંધિયાએ કહ્યું કે ભારત 2027 સુધીમાં જાપાન અને જર્મનીને પાછળ છોડીને વિશ્વની ત્રીજી સૌથી મોટી અર્થવ્યવસ્થા બની શકે છે. તેમણે કહ્યું કે આ લક્ષ્ય હાંસલ કરવા માટે દેશે તેના ડિજિટલ માળખાને મજબૂત બનાવવું પડશે.

100 Mbps સુધીની ઇન્ટરનેટ સ્પીડ ઉપલબ્ધ કરાવશે

તેમણે વધુમાં જણાવ્યું હતું કે ભારતે માત્ર 22 મહિનામાં 5G સેવાઓ શરૂ કરીને ઇતિહાસ રચ્યો છે. 5G પર આટલી ઝડપી ગતિએ કામ વિશ્વમાં બીજે ક્યાંય થયું નથી. અહેવાલો અનુસાર, 5G દેશના લગભગ 99 ટકા ભાગને આવરી લે છે. સરકારનું ધ્યાન હવે 6G ટેકનોલોજી વિકસાવવા પર છે. જે 100 Mbps સુધીની ઇન્ટરનેટ સ્પીડ ઉપલબ્ધ કરાવશે. જે વર્તમાન 20 Mbps કરતા પાંચ ગણી ઝડપી છે. આ સમિટમાં કેન્દ્રીય મંત્રીએ એમ પણ કહ્યું કે એક દાયકા પહેલા ભારતની ઇન્ટરનેટ સ્પીડ માત્ર 1.5 Mbps હતી.

Also read: ટનાટન ટેકનોલોજીનો જમાનો કિચનથી કૃષિ-ક્ષેત્ર સુધી

ભારત ટેકનોલોજીમાં પણ આત્મનિર્ભર બનવાના માર્ગે

ડિજિટલ ક્ષેત્રના ઝડપી વિકાસ સાથે ભારત હવે વિશ્વનું બીજું સૌથી મોટું મોબાઇલ ફોન બજાર છે. એકંદર ડિજિટલ બજારમાં ત્રીજા ક્રમે છે. દેશનો ડિજિટલ હાઇવે વૈશ્વિક સ્તરે ઘણો આગળ છે. જે વિકાસના ઘણા રસ્તાઓ ખોલી રહ્યો છે.ભારત ટેકનોલોજીમાં પણ આત્મનિર્ભર બનવાના માર્ગે છે. સરકારના આ વિઝનને ટેકો આપવા માટે BSNL દેશમાં 4G સેવા પર કામ કરી રહ્યું છે.

સંપૂર્ણપણે સ્વદેશી 4G સ્ટેક વિકસાવી રહી છે

જ્યારે સરકારી માલિકીની સી-ડોટ ખાનગી કંપની તેજસ નેટવર્ક્સ સાથે મળીને સંપૂર્ણપણે સ્વદેશી 4G સ્ટેક વિકસાવી રહી છે. 18 મહિનાની અંદર ભારત આ સીમાચિહ્નરૂપ સિદ્ધિ હાંસલ કરનાર ચોથો દેશ બનશે. જે ડિજિટલ આત્મનિર્ભરતા તરફનું બીજું પગલું છે.