કાશ્મીરમાં મુસ્લિમ પત્રકારનું ઘર તોડાતાં હિન્દુ પાડોશીએ પ્લોટ ગિફ્ટ કર્યો! સોશિયલ મીડિયા પર પ્રશંસા

શ્રીનગર: જમ્મુ કાશ્મીરમાં એક મુસ્લિમ પત્રકારના ઘર પર બુલડોઝર કાર્યવાહી કરવાં આવી તો તેના હિન્દુ પાડોશી મદદ માટે આગળ આવ્યા હતા. ભાજપ નેતા રવીન્દર રૈનાએ પણ પત્રકારના ઘરની મુલાકાત લીધી હતી. તેમણે કહ્યું હતું કે વડા પ્રધાન લોકોને ઘર આપવા પર વિશ્વાસ રાખે છે જ્યારે આ સરકાર લોકોના ઘર ઉજાડી રહી છે. પત્રકારે આક્ષેપ કર્યો હતો કે બુલડોઝર ચલાવવા પૂર્વે તેમને કોઈ નોટિસ પાઠવવામા નહોતી આવી. તેમણે સરકારની કાર્યવાહીને તાનાશાહી ગણાવી હતી.

જમ્મુ ડેવલપમેન્ટ ઓથોરિટીએ પત્રકાર અરફાઝ અહેમદ દૈંગનું ઘર તોડી પાડ્યું હતું. આ સમયે મોટી સંખ્યામાં પોલીસ બંદોબસ્ત ગોઠવી દેવાયો હતો. પત્રકારે જણાવ્યું હતું કે તેમનું ઘર 40 વર્ષ જૂનું હતું અને તેમના પિતા પણ આ જ ઘરમાં રહેતા હતા. તેમણે કહ્યું કે ગયા વર્ષે તેમનું એક ઘર તોડી પાડવામાં આવ્યું હતું અને તે પછી તેઓ આ ઘરમાં રહેવા લાગ્યા હતા. જણાવી દઈએ કે દૈંગ જમ્મુમાં એક ન્યૂઝ પોર્ટલ ચલાવતા હતા. તેમણે સરકારની ડિમોલિશન ડ્રાઇવ વિરુદ્ધ રિપોર્ટિંગ કરવાનું શરૂ કરી દીધું હતું.

આ પણ વાંચો: મુસ્લિમ અભિનેતાની પત્નીનો હિન્દુ વિધિ મુજબ થયો અંતિમસંસ્કાર: જાણો ખાસ કારણ

જમ્મુ-કાશ્મીરના મુખ્ય પ્રધાન ઉમર અબ્દુલ્લાએ કહ્યું કે આ માત્ર સરકારને બદનામ કરવાનું કાવતરું છે. તેમણે કહ્યું કે ઉપરાજ્યપાલ દ્વારા નિયુક્ત કરવામાં આવેલા અધિકારીઓએ જ આ કાર્યવાહી કરી છે. તેમણે કહ્યું કે ચૂંટાયેલી સરકાર વિરુદ્ધ કાવતરું રચાઈ રહ્યું છે. વળી, પત્રકારનો એક વિડિયો પણ વાયરલ થઈ રહ્યો છે જેમાં જોઈ શકાય છે કે ઘર તોડી પાડતી વખતે પોલીસ તેમને ખેંચીને દૂર લઈ જઈ રહી છે. સોશિયલ મીડિયા યુઝર્સનું કહેવું છે કે આ રીતે કોઈનું ઘર તોડી પાડવું એ તાનાશાહી છે.

પડોશી પત્રકારનું ઘર તોડી પાડવામાં આવ્યા બાદ તેમના પડોશી કુલદીપ શર્મા મદદે આવ્યા હતા અને તેમણે તેમને એક પ્લોટ ભેટમાં આપી દીધો હતો. તેમણે કહ્યું, “હું મારા ભાઈને આ રીતે તૂટવા નહીં દઉં. કંઈ પણ થઈ જાય, હું તેમનું ઘર બનાવી આપીશ. હું તેમને પ્લોટ આપી રહ્યો છું.”