કેનેડામાં બસ સ્ટેન્ડ પર ઉભેલી ભારતીય વિદ્યાર્થીનીને ગોળી વાગતા મૃત્યુ, પોલીસે તપાસ શરૂ કરી
નવી દિલ્હી : કેનેડામાં એક ભારતીય વિદ્યાર્થીનીનું અકસ્માતે મૃત્યુ થયું છે. જેમાં ભારતીય વિદ્યાર્થીની કામ પર જવા માટે બસ સ્ટોપ ઉભી હતી ત્યારે તેની ગોળી વાગતા મોત થયું છે. જેમાં એક કારની અંદરથી અંધાધૂંધ ગોળીબાર થયો અને એક ગોળી વિદ્યાર્થીનીને વાગી હતી. આ મૃતક યુવતીની ઓળખ 21 વર્ષીય હરસિમરત રંધાવા તરીકે થઈ છે. તે ઓન્ટારિયોના હેમિલ્ટનમાં મોહૌક કોલેજમાં વિદ્યાર્થીની હતી.
મૃતક વિદ્યાર્થીની નિર્દોષ હતી
હેમિલ્ટન પોલીસ બુધવારે થયેલા ઘટનાની તપાસ કરી રહી છે. પોલીસનું કહેવું છે કે મૃતક વિદ્યાર્થીની નિર્દોષ હતી. આ બાબતે વધુ માહિતી આપતાં ટોરોન્ટોમાં ભારતના કોન્સ્યુલેટ જનરલે શુક્રવારે એક સોશિયલ મીડિયા પ્લેટફોર્મ પર એક પોસ્ટમાં જણાવ્યું હતું કે, ‘ઓન્ટારિયોના હેમિલ્ટનમાં ભારતીય વિદ્યાર્થીની હરસિમરત રંધાવાના મૃત્યુથી બધા ખૂબ જ દુઃખી છીએ.’
બે વાહનોમાં ગોળીબાર
સ્થાનિક પોલીસના જણાવ્યા અનુસાર એક નિર્દોષ વિદ્યાર્થીની બે વાહનો વચ્ચે થયેલા ગોળીબારનો ભોગ બની હતી. પોલીસ આ ઘટનાની તપાસ કરી રહી છે. પોલીસ અધિકારીઓ મૃતક યુવતીના પરિવારનો સંપર્ક કરવામાં વ્યસ્ત છે. જરૂરી તમામ સહાય પૂરી પાડવામાં આવશે.
વિદ્યાર્થીનીને છાતીમાં ગોળી વાગી
પોલીસે જણાવ્યું હતું કે તેમને સ્થાનિક સમય મુજબ સાંજે 7.30 વાગ્યે હેમિલ્ટનમાં અપર જેમ્સ અને સાઉથ બેન્ડ રોડ નજીક ગોળીબારના અહેવાલ મળ્યા હતા. જ્યારે પોલીસ ત્યાં પહોંચી ત્યારે તેમને રંધાવા છાતીમાં ગોળીના ઘા સાથે ઘાયલ હાલતમાં હતી. તેને હોસ્પિટલ લઈ જવામાં આવી હતી પરંતુ તેનું મોત નીપજ્યું.
આ પણ વાંચો: કેનેડાના ઓટાવામાં ભારતીય નાગરિકની ચપ્પુના ઘા મારીને હત્યા, એક વ્યકિતની અટકાયત…
પોલીસે ઘટનાની તપાસ શરૂ કરી
પોલીસે જણાવ્યું હતું કે કાળી કારમાં સવાર એક મુસાફરે સફેદ કાર પર ગોળીબાર કર્યો હતો. આ દરમિયાન એક ગોળી બસ સ્ટેન્ડ પર ઉભેલી એક છોકરીને વાગી હતી. જોકે, ગોળીબારની ઘટના પછી તરત જ કાળી કારમાં સવાર મુસાફરો ઘટના સ્થળેથી ભાગી ગયા. ગોળીઓ નજીકના ઘરની પાછળની બારીમાંથી પણ વાગી હતી. પોલીસ ટીમ આ ઘટના સંબંધિત વધુ પુરાવા એકત્રિત કરી રહી છે. પોલીસ સાંજે 7.15 થી 7.45 વાગ્યા વચ્ચેના ડેશકેમ અથવા સીસીટીવી ફૂટેજની તપાસ કરી રહી છે. ગોળીબારનો બીજો કોઈ વીડિયો મેળવવાથી પોલીસને તપાસ આગળ વધારવામાં મદદ મળી શકે છે.