Pakistan ની જેલમાં બંધ ભારતીય માછીમારોની દયનીય સ્થિતિ, પત્રમાં ઠાલવી વ્યથા

નવી દિલ્હી  : પાકિસ્તાનની(Pakistan)જેલમાંથી મુક્ત કરાયેલા 22 ભારતીય માછીમારોમાંથી 18 ગુજરાતી માછીમારો  ગીર સોમનાથ જિલ્લામાં પહોંચ્યા હતા. આ માછીમારોએ તેમની મુક્તિ અને પરત ફરવા પર ખુશી વ્યક્ત કરી અને માંગ કરી કે પાકિસ્તાની જેલમાં બંધ અન્ય ભારતીય માછીમારોની મુક્તિની પ્રક્રિયા ઝડપી બનાવવામાં આવે.

આ પણ વાંચો: શ્રીલંકાએ ૩૨ ભારતીય માછીમારોની કરી ધરપકડ…

18 માછીમારો ગુજરાતના

વેરાવળના ફિશરીઝના સહાયક નિયામક વીકે ગોહેલે જણાવ્યું હતું કે, લગભગ 195  ભારતીય માછીમારો હજુ પણ પાકિસ્તાનની જેલમાં બંધ છે. આ જૂથમાં 18 માછીમારો ગુજરાતના, 3 દીવના અને 1 ઉત્તર પ્રદેશના છે. ગુજરાત સરકારે એક નિવેદનમાં જણાવ્યું હતું કે મુખ્યમંત્રી ભૂપેન્દ્ર પટેલ અને કૃષિ મંત્રી રાઘવજી પટેલે કેન્દ્ર સરકારને માછીમારોને મુક્ત કરવા વિનંતી કરી હતી.

જેલમાં બંધ  150  માછીમારોએ પત્ર દ્વારા વેદના વ્યક્ત કરી

જ્યારે મુક્ત કરાયેલા માછીમારો તેમની સાથે પાકિસ્તાની જેલમાં બંધ અન્ય ભારતીય માછીમારો તરફથી એક પત્ર પણ લાવ્યા છે, જેમાં તેઓએ પોતાની વેદના વ્યક્ત કરી છે. પત્રમાં લખ્યું છે કે, “અમે અહીં 150 માછીમારો છીએ. બે વર્ષ પહેલાં, પાકિસ્તાનની સુપ્રીમ કોર્ટે અમને મુક્ત કર્યા હતા. પરંતુ અમે હજુ પણ જેલમાં છીએ. જેલમાં તણાવને કારણે, લગભગ બધા માછીમારો માનસિક રીતે બીમાર થઈ ગયા છે. અમે બીમાર છીએ, શ્વાસ લેવામાં તકલીફ પડી રહી છે અને ચામડીના રોગોથી પીડાઈ રહ્યા છીએ, તેમ છતાં અહીંથી ફક્ત 22 માછીમારોને મુક્ત કરવામાં આવ્યા છે. બાકીના 150  માછીમારો અન્યાયનો સામનો કરી રહ્યા છે. અહીં એવું કોઈ નથી જે અમારી પરિસ્થિતિને સમજે.

જેલોમાં ઘણી સમસ્યાઓ છે

બીજા એક માછીમારે પોતાની અગ્નિપરીક્ષા વર્ણવતા કહ્યું, હું સાડા ત્રણ વર્ષ પહેલાં ગુજરાતના દરિયાકાંઠે માછીમારી કરતી વખતે પકડાઈ ગયો હતો.  તેમણે કહ્યું, અમારા બધા 22 લોકો બીમાર છીએ અને ઘણા માછીમારો હજુ પણ ત્યાં કેદ છે. અમે સરકારને વિનંતી કરીએ છીએ કે તેઓ શક્ય તેટલી વહેલી તકે તેમને મુક્ત કરવા માટે શક્ય તમામ પ્રયાસો કરે કારણ કે ત્યાંની જેલોમાં ઘણી સમસ્યાઓ છે.

માછીમારોની સ્થિતિ અંગે ચિંતા વ્યક્ત કરી

ગોહેલે જણાવ્યું હતું કે આ માછીમારોને થોડા દિવસો પહેલા વાઘા બોર્ડર પર ભારતીય અધિકારીઓને સોંપવામાં આવ્યા હતા. તેઓ સોમવારે સાંજે ટ્રેન દ્વારા વડોદરા પહોંચ્યા અને પછી મંગળવારે બસ દ્વારા ગીર સોમનાથ જિલ્લાના વેરાવળ પહોંચ્યા જ્યાં તેમણે પત્રકારો સાથે વાત કરી અને પાકિસ્તાની જેલમાં બંધ અન્ય માછીમારોની સ્થિતિ અંગે ચિંતા વ્યક્ત કરી.

વર્ષ 2014  થી 2639  માછીમારોને પરત લવાયા  

ગુજરાતના 18  માછીમારોમાંથી 14  ગીર સોમનાથ જિલ્લાના, 3 દેવભૂમિ દ્વારકાના અને 1 રાજકોટનો છે. વિદેશ મંત્રાલયે 12 ડિસેમ્બર, 2024 ના રોજ લોકસભામાં જણાવ્યું હતું કે 2014 થી કુલ 2,639 ભારતીય માછીમારોને પાકિસ્તાનથી પાછા લાવવામાં આવ્યા છે. 1 જુલાઈ, 2024  સુધીમાં પાકિસ્તાનની કસ્ટડીમાં 209  ભારતીય માછીમારો હતા, જેમાંથી 51 માછીમારો 2021  થી,130  માછીમારો 2022  થી, 9  માછીમારો 2023 થી અને 19  માછીમારો 2024 થી કસ્ટડીમાં છે.