એશિયા પાવર ઇન્ડેક્સ 2025 જાહેર: ભારતે જાપાન, રશિયાને પાછળ પાડી મેળવ્યું ત્રીજું સ્થાન, જાણો પહેલા ક્રમે કોણ

નવી દિલ્હી: વડા પ્રધાન નરેન્દ્ર મોદીના નેતૃત્વમાં દેશે વધુ એક સિદ્ધિ મેળવી છે. ઓસ્ટ્રેલિયા સ્થિત થિંક ટેન્ક લોવી ઇન્સ્ટિટ્યૂટ દ્વારા બહાર પાડવામાં આવેલા એશિયા પાવર ઇન્ડેક્સ 2025માં ભારતે ફરી એકવાર એશિયામાં “મુખ્ય શક્તિ” (Major Power)નો દરજ્જો પ્રાપ્ત કર્યો છે. એશિયા પાવર ઇન્ડેક્સ 2025માં ભારતનું નામ ટોપ 5 દેશોમાં આવી ગયું છે. જેમાં ભારત જાપાનને પાછળ પાડીને આગળ વધી ગયું છે.

40.00 સ્કોર સાથે ભારત ત્રીજા ક્રમે

તાજેતરમાં જાહેર થયેલા એશિયા પાવર ઇન્ડેક્સ 2025માં ભારતે એશિયાના ટોચના 27 દેશોમાં 100 માંથી 40.00ના એકંદર સ્કોર સાથે ત્રીજું સ્થાન મેળવ્યું છે, જે અગાઉના સંસ્કરણની તુલનામાં 0.9 પોઈન્ટ (2%) નો નોંધપાત્ર વધારો દર્શાવે છે.

જ્યારે જાપાને 100માંથી 38.00ના એકંદર સ્કોર સાથે ચોથું સ્થાન મેળવ્યું છે. જ્યારે રશિયાએ 100માંથી 35.00ના એકંદર સ્કોર સાથે પાંચમું સ્થાન મેળવ્યું છે. એશિયા પાવર ઇન્ડેક્સ 2025નો ટોપ 5 દેશોની વિગતો નીચેના કોષ્ટકમાં આપવામાં આવી છે.

આપણ વાચો: જાપાની અર્થતંત્રના સુધારા વચ્ચે નીક્કીમાં આગેકૂચ, અમેરિકામાં પીછેહઠ

ભારતની પ્રગતિના મુખ્ય પરિબળો

લોવી ઇન્સ્ટિટ્યૂટના અહેવાલ મુજબ, ભારતે આર્થિક સંભાવનામાં જાપાનને પાછળ છોડીને ત્રીજું સ્થાન મેળવ્યું છે. આ મજબૂત આર્થિક વૃદ્ધિ, વધેલા સ્થાનિક રોકાણ અને વૈવિધ્યસભર વેપાર સંબંધોને કારણે થયું છે.

ભારત આર્થિક સંભાવના અને ભવિષ્યના સંસાધનો (Future Resources) માં પણ ત્રીજા ક્રમે છે. ભારતે લશ્કરી શક્તિમાં +2.8 પોઈન્ટ અને સાંસ્કૃતિક પ્રભાવમાં સૌથી મોટો વાર્ષિક વધારો (+2.8 પોઈન્ટ) નોંધાવ્યો છે.

ભારતીય સિનેમા, ટેકનોલોજી અને ડિજિટલ રાજદ્વારીના વધતા વૈશ્વિક પ્રભાવને આ વધારો પ્રતિબિંબિત કરે છે. રાજદ્વારી પ્રભાવમાં +0.5 અને આર્થિક શક્તિમાં +1.0 નો વધારો થયો છે. સૂચકાંકની સ્થાપના પછી પહેલીવાર, ભારતે તેના આર્થિક સંબંધોમાં સુધારો કરીને નવમું સ્થાન મેળવ્યું છે, જે પ્રાદેશિક બજારોમાં વધતા એકીકરણને દર્શાવે છે.

ભારતનો એકંદર માર્ગ ખૂબ જ સકારાત્મક છે અને ઇન્ડો-પેસિફિક ક્ષેત્રમાં ભારતને એક આત્મવિશ્વાસપૂર્ણ વ્યૂહાત્મક અને આર્થિક શક્તિ તરીકે રજૂ કરે છે. જોકે, આ ઇન્ડેક્ષમાં પાકિસ્તાનને ટોપ 10 દેશોમાં પણ સ્થાન મળ્યું નથી.