લોકોની ભલાઇનો માર્ગ પસંદ કર્યો છે તો જેલમાં તો જવું જ પડશે’, સીએમ કેજરીવાલ
નવી દિલ્હીઃ આમ આદમી પાર્ટીના રાષ્ટ્રીય સંયોજક અને દિલ્હીના સીએમ અરવિંદ કેજરીવાલે રવિવારે પાર્ટીની રાષ્ટ્રીય કાર્યકારિણી અને 12મી રાષ્ટ્રીય પરિષદની બેઠકની અધ્યક્ષતા કરી હતી. વર્ચ્યુઅલ માધ્યમથી યોજાયેલી બંને બેઠકોમાં કેજરીવાલે દિલ્હી અને પંજાબમાં તેમની સરકારની ઉપલબ્ધિઓ ગણાવી હતી. આ બેઠકોમાં દેશભરમાંથી પાર્ટીના અધિકારીઓએ ભાગ લીધો હતો, જ્યારે પંજાબના સીએમ ભગવંત માન અને રાષ્ટ્રીય સંગઠન મહાસચિવ ડૉ. સંદીપ પાઠક પણ હાજર રહ્યા હતા.
આ દરમિયાન AAPના રાષ્ટ્રીય સંયોજક અરવિંદ કેજરીવાલે જણાવ્યું હતું કે છેલ્લા 12 વર્ષમાં આમ આદમી પાર્ટીને અભૂતપૂર્વ સફળતા મળી છે. અમે એવું કામ કર્યું છે જે અન્ય પક્ષો 75 વર્ષમાં પણ કરી શક્યા નથી. પંજાબમાં AAP સરકારે છેલ્લા બે વર્ષમાં જે કામ કર્યું છે તે દર્શાવે છે કે જો આખા રાજ્યમાં અમારી સરકાર હશે તો અમે ખૂબ જ ઝડપથી કામ કરી શકીશું.
તેમણે વધુમાં કહ્યું કે AAPએ માત્ર 10 વર્ષમાં રાષ્ટ્રીય રાજનીતિમાં ખૂબ જ પ્રભાવશાળી દેખાવ કર્યો છે. દેશમાં પહેલીવાર વિરોધ પક્ષોને શાળા-હોસ્પિટલના મુદ્દાઓ પર વાત કરવાની ફરજ પડી છે. હવે આ લોકોએ અમારો શબ્દ “ગેરંટી” અને અમારો મેનિફેસ્ટો પણ ચોરી લીધો છે. હવે આ લોકો પણ ‘મોદીની ગેરંટી’ અને ‘કોંગ્રેસની ગેરંટી’ કહેવા લાગ્યા છે. આ લોકોએ જનતાનેમોટા મોટા વચનો તો આપ્યા હતા, પરંતુ કોઈએ તેમના વચનો પૂરા કર્યા નથી કારણ કે તેમનો ઈરાદો સારો નથી, જ્યારે અમે અમારી બધી ગેરંટી પૂરી કરી રહ્યા છીએ. આ દરમિયાન તેમણે એમ પણ કહ્યું કે અમારા પાંચ નેતાઓ જે જેલમાં છે તે અમારા હીરો છે અને અમને તેમના પર ગર્વ છે. જો તમે બાળકોને સારું શિક્ષણ આપવાની અને ગરીબોને મફત સારવાર આપવાની વાત કરશો તો તમારે જેલ જવું પડશે અને આપણે આ માટે તૈયાર રહેવું પડશે.
દેશમાં પહેલીવાર જનતાને AAPના રૂપમાં યોગ્ય વિકલ્પ મળ્યો છે. આમ આદમી પાર્ટીએ 12 વર્ષમાં અભૂતપૂર્વ સફળતા મેળવી છે. આનું એકમાત્ર કારણ એ છે કે 75 વર્ષમાં અન્ય પક્ષો જે કરી શક્યા નથી તે અમે કરી બતાવ્યું છે. દેશમાં પહેલીવાર લોકોને આ પાર્ટીઓનો યોગ્ય વિકલ્પ મળ્યો છે અને લોકો કામની રાજનીતિ પસંદ કરવા લાગ્યા છે. છેલ્લા 75 વર્ષથી આ બંને પક્ષોએ પંજાબમાં એક પછી એક શાસન કર્યું અને રાજ્યને એવું બનાવી દીધું કે યુવાનો, વેપારીઓ, લોકો અને ખેડૂતો બધા જ નાખુશ હતા. પંજાબમાં બે વર્ષમાં જે કામ થયું છે તે દર્શાવે છે કે જો આખા રાજ્યમાં અમારી સરકાર હોય તો આમ આદમી પાર્ટી કેટલી ઝડપથી કામ કરી શકે છે. અમે 8-9 વર્ષમાં દિલ્હીમાં જેટલું કામ કર્યું હતું તેના કરતાં આજે પંજાબના ઘણા વિસ્તારોમાં વધુ કામ થયું છે.
પંજાબમાં AAP સરકારની ઉપલબ્ધિઓ ગણાવતા કેજરીવાલે કહ્યું હતું કે દેશમાં એવા ઘણા વિસ્તારો છે જ્યાં વીજળી નથી મળતી. દિલ્હીની જેમ પહેલા પંજાબમાં પણ વીજળી નહોતી મળતી, પરંતુ હવે 24 કલાક મફત વીજળી મળે છે. જ્યારે અમારી સરકાર બની ત્યારે 6-7 કલાકનો લાંબો પાવર કટ રહેતો હતો. અમે લોકોને 24 કલાક વીજળી આપવાનું વચન આપ્યું હતું. બે વર્ષમાં, આજે પંજાબમાં 24 કલાક વીજળી ઉપલબ્ધ છે અને ત્યાં કોઈ પાવર કટ નથી. લોકોને 24 કલાક મફત વીજળી મળવા લાગી છે અને કંપનીને લગભગ 540 કરોડ રૂપિયાનો નફો પણ થયો છે. આનું કારણ બહુ સ્પષ્ટ છે કે આપણો ઈરાદો સાફ છે, આપણે મહેનત કરીએ છીએ, આપણે શિક્ષિત લોકો છીએ.
કેજરીવાલે કહ્યું હતું કે અત્યાર સુધી આપણે જોયું છે કે જ્યારે પણ સરકાર બને છે, ત્યારે તેઓ સૌથી પહેલું કામ જાહેર એકમો (પીએસયુ)ને વેચવાનું શરૂ કરે છે. તેઓ એરલાઈન્સ, એરપોર્ટ, કોલસાની ખાણો, ભેલ, રેલ્વે, બધું વેચે છે. ભારતના ઈતિહાસમાં આવું પહેલીવાર થઈ રહ્યું છે કે પંજાબ સરકારે પંજાબમાં ચાલતા ખાનગી થર્મલ પાવર પ્લાન્ટને ખરીદ્યો છે. આ 4 હજાર કરોડ રૂપિયાની કંપની હતી જેને સરકારે 1080 કરોડ રૂપિયામાં ખરીદી છે.
દિલ્હીમાં એલજી અને કેન્દ્ર સરકાર તરફથી તેમને ઘણા અવરોધોનો સામનો કરવો પડ્યો એમ જણાવતા કેજરીવાલે કહ્યું હતું કે દિલ્હીમાં 500 મોહલ્લા ક્લિનિક્સ છે, જ્યારે પંજાબમાં 650 મોહલ્લા ક્લિનિક્સ કાર્યરત છે. 26 જાન્યુઆરી સુધીમાં તેમની સંખ્યા 750 સુધી પહોંચી જશે. એ જ રીતે પંજાબની લગભગ 40 મોટી સરકારી હોસ્પિટલોને ખાનગી હોસ્પિટલો કરતા વધુ સારી બનાવવામાં આવી રહી છે. આખા પંજાબમાં જો કોઈ ગંભીર રીતે બીમાર પડે છે, તો તે મોટી હોસ્પિટલોમાં જઈને મફતમાં સારવાર કરાવી શકશે. લોકોને દવાઓ અને સારવાર માટે કોઈ ખર્ચ કરવો પડશે નહીં. પંજાબમાં 20 હજાર સરકારી શાળાઓ છે, જેમાં શૌચાલયનું સમારકામ, પીવાના પાણીની વ્યવસ્થા, શિક્ષકોને તાલીમ, પ્રિન્સિપાલને તાલીમ , શાળાના બિલ્ડિંગનું રિપેરીંગ જેવા કામો હાથ ધરવામાં આવ્યા છે અને તેના સારા પરિણામો પણ જોવા મળી રહ્યા છે.
પંજાબમાં આપ સરકારની સિદ્ધિઓ ગણાવતા કેજરીવાલે કહ્યું હતું કે, પંજાબમાં યુવાનોને સરકારી નોકરીઓ આપવામાં આવી રહી છે. અત્યાર સુધીમાં 40 હજારથી વધુ સરકારી નોકરીઓ આપવામાં આવી છે. આ સિવાય પંજાબમાં લગભગ 50 હજાર કરોડ રૂપિયાનું રોકાણ આવ્યું છે. આ રોકાણથી લગભગ 3 લાખ રોજગારીની તકો ઊભી થશે. દિલ્હી બાદ હવે પંજાબમાં પણ વૃદ્ધોને તીર્થયાત્રા પર લઈ જવાની યોજના શરૂ થઈ ગઈ છે. પંજાબમાં ડોરસ્ટેપ સેવાઓની ડિલિવરી શરૂ કરવામાં આવી છે. સરકારે 1076નો હેલ્પલાઈન નંબર જારી કર્યો છે. આ હેલ્પલાઈન નંબર પર ફોન કરવાથી લોકો ઘરે બેઠા સરકારી સેવાઓનો લાભ લઈ શકે છે અને કોઈ સરકારી ઓફિસમાં જવાની જરૂર નથી.
