હરિયાણામાં સાત લોકોની સામૂહિક આત્મહત્યા કેસમાં ખુલાસો, આ કારણ જવાબદાર

પંચકૂલા: હરિયાણાના પંચકૂલામાં એક કાળજું કંપાવનારી ઘટના સામે આવી છે. જેમાં ઉત્તરાખંડના દેહરાદૂનમાં રહેનારા એક જ પરિવારના સાત સભ્યોએ સામૂહિક આત્મહત્યા કરી લીધી છે. આ કેસમાં મૃતક પ્રવીણ મિત્તલની પત્નીના પરિવારના સભ્યોનું નિવેદન સામે આવ્યું છે. તેમણે આ પરિવાર વિશે એક ચોંકાવનારી વાત કહી છે. મૃતકોમાં દેહરાદૂન નિવાસી પ્રવીણ મિત્તલ, પ્રવીણના માતા-પિતા, પ્રવીણની પત્ની અને બે પુત્રીઓ અને એક પુત્રનો સમાવેશ થાય છે.

ધંધામાં મોટું નુકસાન થયું

સૂત્રોના જણાવ્યા અનુસાર, પરિવારે ટૂર અને ટ્રાવેલનો વ્યવસાય શરૂ કર્યો હતો જેના પરિણામે તેમને ભારે નુકસાન થયું હતું. તેમને દેવું થયું હતું. તેમજ આ પરિવાર બાબા બાગેશ્વરની કથા સાંભળવા ગયો હતો.

પ્રવીણ મિત્તલના સાસરિયાઓએ આ વાત કહી

પ્રવીણ મિત્તલની પત્નીના પરિવારના સભ્યો એટલે કે પ્રવીણના સાસરિયાઓએ કહ્યું કે તેમના લગ્ન 2009 માં થયા હતા. પહેલા આ લોકો પંચકુલામાં રહેતા હતા પરંતુ તે સમયે તેમણે ઘણી લોન લીધી હતી. પછી તેને પીઓ એટલે ભાગેડુ જાહેર કરવામાં આવ્યો અને અહીંથી ચાલ્યો ગયો. તેનો પરિવાર સાથે કોઈ સંપર્ક નહોતો. તેણે બેંકમાંથી 1 કરોડ રૂપિયાની લોન પણ લીધી હતી અને ઘણા લોકો પાસેથી પૈસા ઉધાર લીધા હતા. જે તેણે ક્યારેય પાછા આપ્યા નહીં. પરિવારના સભ્યો કહે છે કે ઘણા સમયથી અમારો તેની સાથે કોઈ સંપર્ક નહોતો.

પ્રવીણ પર 15-20 કરોડનું દેવું

પ્રવીણ મિત્તલ છેલ્લા 2 વર્ષથી પંચકુલાના સાકેત્રીમાં રહેતા હતા અને ટેક્સી ડ્રાઇવર તરીકે કામ કરતા હતા. પ્રવીણ પર 15-20 કરોડ રૂપિયાનું દેવું હતું. થોડા વર્ષો પહેલા તેમણે હિમાચલ પ્રદેશના બદ્દીમાં એક ભંગાર ફેક્ટરી સ્થાપી હતી. જે પાછળથી વધતા દેવાને કારણે બેંક દ્વારા જપ્ત કરવામાં આવી હતી. પરિવારના જણાવ્યા મુજબ પ્રવીણ પીઓ થયો હતો અને બાદમાં નાણાકીય દબાણનો સામનો કરીને પ્રવીણ અચાનક પંચકુલા છોડીને ઉત્તરાખંડના દેહરાદૂન ગયો. જ્યાં તે 5 વર્ષ સુધી પરિવાર સાથે સંપર્કથી દૂર રહ્યો.

સ્થળાંતર સમયે તેમના પર લગભગ 20 કરોડ રૂપિયાનું દેવું હતું. બાદમાં તે મોહાલીના ખારર ગયો અને તાજેતરમાં પંચકુલાના સાકેત્રી ગામ પાસે રહેતો હતો. પોતાના ખર્ચાઓ પૂરા કરવા માટે તેણે ટેક્સી ચલાવવાનું શરૂ કર્યું. નાણાકીય કટોકટીના કારણે બેંકે તેમના બે ફ્લેટ, ફેક્ટરી અને વાહન જપ્ત કરી લીધા હતા. પોલીસના જણાવ્યા અનુસાર, પ્રવીણે એક સુસાઇડ નોટ મૂકી છે જેમાં તેણે વિનંતી કરી છે કે તેના અંતિમ સંસ્કાર તેના પિતરાઈ ભાઈ સંદીપ અગ્રવાલ દ્વારા કરવામાં આવે. સંદીપે તેની સાથે પાંચ દિવસ પહેલા જ વાત કરી હતી.

પ્રવીણનો મૃત્યુ પહેલાનો વીડિયો

પ્રવીણ મિત્તલના મૃત્યુ પહેલાનો એક વીડિયો જોવા મળી રહ્યો છે. જેમાં પ્રવીણ બેસેલો જોવા મળે છે અને તેની તબિયત બગડતી દેખાય છે. એક જ પરિવારના 7 સભ્યોએ કારમાં ઝેર પીને આત્મહત્યા કરી હતી. પંચકુલાના સેક્ટર 27માં એક ઘરની બહાર રસ્તા પર પાર્ક કરેલી કારમાં સાતેય લોકોના મૃતદેહ બંધ કારમાંથી મળી આવ્યા હતા.

આ પણ વાંચો….વૈષ્ણવી આત્મહત્યા કેસ:એનસીપીના ભૂતપૂર્વ નેતા રાજેન્દ્ર હગવણે, પુત્રની ધરપકડ…