કેન્દ્રીય બજેટમાં ગુજરાતને રેલ્વે પ્રોજેક્ટ્સ માટે અધધધ 17,366 કરોડ ફાળવાયા
કેન્દ્ર સરકાર દ્વારા ગુજરાતના રેલવે ઈન્ફ્રાસ્ટ્રક્ચરને આધુનિક બનાવવા માટે વર્ષ 2026-27 ના બજેટમાં રેકોર્ડબ્રેક ફાળવણી કરવામાં આવી છે. કેન્દ્રીય રેલવે મંત્રી અશ્વિની વૈષ્ણવે સોમવારે જાહેરાત કરી હતી કે ગુજરાતને આ વર્ષે ₹17,366 કરોડનું બજેટ મળ્યું છે. આ રકમ અગાઉના વર્ષોની સરખામણીએ અનેકગણી વધારે છે, જે રાજ્યમાં ચાલી રહેલા રેલવે પ્રોજેક્ટ્સને નવી ઊંચાઈ પર લઈ જશે.
રેલવે મંત્રાલયના આંકડા મુજબ, વર્ષ 2009 થી 2014 દરમિયાન ગુજરાતનું સરેરાશ વાર્ષિક રેલવે બજેટ માત્ર ₹589 કરોડ હતું. તેની સરખામણીએ અત્યારની ફાળવણીમાં લગભગ 29 ગણો જંગી વધારો થયો છે. મંત્રીએ વધુમાં જણાવ્યું હતું કે હાલમાં સમગ્ર ગુજરાતમાં ₹1,28,748 કરોડના મૂલ્યના વિવિધ રેલવે પ્રોજેક્ટ્સ કાર્યરત છે, જેમાં નવી રેલવે લાઈનો નાખવી, સ્ટેશનોનું નવીનીકરણ અને સુરક્ષા અપગ્રેડેશન જેવા મહત્વકાંક્ષી કામોનો સમાવેશ થાય છે.
‘અમૃત સ્ટેશન યોજના’ હેઠળ ગુજરાતના 87 રેલવે સ્ટેશનોને આંતરરાષ્ટ્રીય કક્ષાના બનાવવા માટે ₹6,058 કરોડનો ખર્ચ કરવામાં આવી રહ્યો છે. જેમાંથી 19 સ્ટેશનોનું કામ પૂર્ણ થઈ ચૂક્યું છે, જે હવે આધુનિક સુવિધાઓ અને સુંદરતા સાથે મુસાફરો માટે તૈયાર છે. છેલ્લા એક દાયકામાં રાજ્યમાં અંદાજે 2,900 કિમી નવી લાઈનો ઉમેરાઈ છે અને 4,005 કિમી રેલવે ટ્રેકનું વીજળીકરણ પૂર્ણ કરવામાં આવ્યું છે, જેનાથી ગુજરાત હવે 100 ટકા ઇલેક્ટ્રિફાઇડ રેલવે સ્ટેટ બની ગયું છે.
મુસાફરોની ઝડપી અને આરામદાયક મુસાફરી માટે ગુજરાતમાં હાલ પાંચ જોડી ‘વંદે ભારત’ ટ્રેનો ઉપરાંત અમૃત ભારત અને નમો ભારત ટ્રેનો પણ કાર્યરત છે. રેલવે સુરક્ષા માટે સ્વદેશી ટેકનોલોજી ‘કવચ’ (Kavach) સિસ્ટમ 96 કિમી રૂટ પર લાગુ કરી દેવામાં આવી છે અને અન્ય 1,674 કિમી માટે ટેન્ડર પ્રક્રિયા ચાલુ છે. આ ઉપરાંત, સલામતી વધારવા માટે 1,177 લેવલ ક્રોસિંગ દૂર કરીને ત્યાં ફ્લાયઓવર અને અંડરપાસ બનાવવામાં આવ્યા છે.
રેકોર્ડ રોકાણ, હાઈ-સ્પીડ ટ્રેનો અને આધુનિક ઈન્ફ્રાસ્ટ્રક્ચર સાથે ભારતીય રેલવે ગુજરાતના સર્વાંગી વિકાસમાં પાયાની ભૂમિકા ભજવી રહી છે. આ બજેટ ફાળવણીથી માત્ર પરિવહન સુવિધા જ નહીં વધે, પરંતુ આર્થિક પ્રવૃત્તિઓ અને રોજગારીની નવી તકો પણ ઉભી થશે. રેલવેના આ કાયાકલ્પથી ગુજરાતના છેવાડાના વિસ્તારો પણ મુખ્ય રેલવે નેટવર્ક સાથે વધુ મજબૂતીથી જોડાશે.
આપણ વાંચો: તૈયાર રહેજો! ગુજરાતમાં આવી રહી છે 5 હજારથી વધુ સરકારી નોકરીઓ, જાણો સંપૂર્ણ વિગત
