ગુડ ન્યૂઝઃ 30 મહિના પછી ફરી આ રોયલ ટ્રેન શરુ

મુંબઈઃ મહારાષ્ટ્ર અને દેશને ગૌરવ અપાવનારી ડેક્કન ઓડિસી ટ્રેન ફરી શરૂ કરવામાં આવી છે. 2020માં કોરોના મહામારી પછી લોકડાઉન લાગુ કરવામાં આવ્યું ત્યારે આ ટ્રેનને પણ બંધ દેવામાં આવી હતી. લગભગ 30 મહિના પછી ડેક્કન ઓડિસી ટ્રેનને શરુ કરવામાં આવી રહી છે, જેથી આગામી દિવસોમાં પ્રવાસીઓને વધુ એક લકઝરી ટ્રેનમાં મુસાફરી કરવાની તક મળશે, એમ સૂત્રોએ જણાવ્યું હતું.

આ ટ્રેન ખાસ કરીને લકઝરી મુસાફરી માટે જાણીતી છે. આ ટ્રેનમાં મુસાફરી કરનારા પર્યટકોને 16મી સદીના રાજાઓની શાહી જીવનશૈલીનો અનુભવ થશે. સત્તાવાર રીતે આજે ફરી આ રોયલ ટ્રેનનું ઉદ્ઘાટન કરવામાં આવ્યું હતું. આ ટ્રેનના ઉદ્ધાટન પ્રસંગે મહારાષ્ટ્ર વિધાનસભાના અધ્યક્ષ રાહુલ નાર્વેકર અને પ્રધાન ગિરીશ મહાજન આ પ્રસંગે હાજર હતા.

અહીં હાજર રહેલા ગિરીશ મહાજને કહ્યું હતું કે હવે આ ટ્રેન શરુ કરવામાં આવી રહી છે સારી બાબત છે. હું દરેકને કહેવા માંગુ છું કે દરેક વ્યક્તિએ આ ટ્રેનમાં એકવાર ચોક્કસપણે મુસાફરી કરવી જોઈએ, એમ પણ તેમણે જણાવ્યું હતું.

જ્યારે લક્ઝરી ટ્રેન ડેક્કન ઓડિસી ફરી શરૂ કરવામાં આવી ત્યારે આ ટ્રેનના જનરલ મેનેજર સિમરપાલ સિંહે કહ્યું હતું કે આ ટ્રેનમાં દરેક પ્રકારની સુવિધા છે. પર્યટકને તેનો અનુભવ કર્યા પછી આ ટ્રેનની સુવિધા જીવનભર યાદ રહી જશે. આ ટ્રેનમાં લક્ઝરી બેડ લગાવવામાં આવ્યા છે. આ સિવાય ટ્રેનમાં રોયલ રેસ્ટોરાં અને બાર છે, જે અલગ અલગ થીમ પર બનાવવામાં આવ્યા છે.

મહારાષ્ટ્ર ટૂરિઝમ ડેવલપમેન્ટ કોર્પોરેશન (એમટીડીસી) દ્વારા સંચાલિત ડેક્કન ઓડિસી મહારાષ્ટ્રમાં સાત નાઈટ અને આઠ દિવસની ટૂર કરાવે છે, જેમાં ઓન બોર્ડ અને ઓફ બોર્ડ પણ સુવિધા પૂરી પાડવામાં આવે છે. હાલમાં નવી કંપનીની નિમણૂક કરી છે, જ્યારે આગામી વર્ષની શરુઆતમાં સર્વિસ ફરી કર્યા પહેલા ટ્રેનની રેકનું નવીનીકરણ કરવામાં આવી રહ્યું છે, એમ અધિકારીએ જણાવ્યું હતું. ઉલ્લેખનીય છે કે હાલમાં પાંચ રોયલ ટ્રેન છે, જેમાં ગોલ્ડન ચેરિયટ, રોયલ રાજસ્થાન ઓન વ્હિલ્સ, પેલેસ ઓન વ્હિલ્સ, મહારાજા એક્સપ્રેસ અને ડેક્કન ઓડિસીનો સમાવેશ થાય છે.