ચૂંટણીમાં જીત્યા પછી પણ કેમ પોતાનું જ મોં કાળું કર્યું કૉંગ્રેસના આ વિધાનસભ્યએ
મધ્યપ્રદેશ વિધાનસભા ચૂંટણીના પરિણામો આવ્યા બાદ કોંગ્રેસના નેતા ફૂલ સિંહ બરૈયા ચર્ચામાં છે. મધ્ય પ્રદેશ વિધાનસભ્યની ચૂંટણી પહેલા તેમણે કહ્યું હતું કે જો રાજ્યમાં ભાજપને 50 બેઠકો મળશે તો તેઓ તેમનું મોઢું કાળું કરશે. આ માટે તેણે તારીખ અને સ્થળ પણ જણાવ્યું હતું. તેમણે 7 ડિસેમ્બરે એટલે કે આજે ભોપાલ રાજભવનની સામે બપોરે 2 વાગ્યે મોઞું કાળું કરવાની વાત કરી હતી.
નિયત તારીખે ભંડેર વિધાનસભા બેઠક પરથી ચૂંટણી જીતનાર ફૂલસિંહ બરૈયાએ ભોપાલમાં મોઢું કાળું કર્યું હોવાના મીડિયા અહેવાલો આવી રહ્યા છે. આ પછી મીડિયા સાથે વાત કરતા ફૂલ સિંહ બરૈયાએ કહ્યું કે લોકશાહી અને બંધારણની રક્ષા માટે આમ કર્યું છે. જે વચન આપ્યું હતું તે પૂરું થયું છે. દિગ્વિજય સિંહે ના પાડી હતી પરંતુ મારે મારું વચન પૂરું કરવું પડ્યું. લોકશાહી માટે મારી અને કોંગ્રેસની લડાઈ ચાલુ રહેશે.
અગાઉ ગ્વાલિયરમાં કિસાન કોંગ્રેસના નેતા યોગેશ દાંડોતિયાએ બરૈયાના સમર્થનમાં મોઢું કાળું કર્યું હતું. આ પ્રસંગે કોંગ્રેસના નેતા રાજેન્દ્ર સિંહે કહ્યું કે અમારા નેતા ફૂલસિંહ બરૈયાનું મોઢું કાળું કરવાની જરૂર નથી. તેમણે કહ્યું કે ભાજપ દલિતોના મોઢા કાળા કરવા માંગે છે. ભાજપે દરેક વ્યક્તિને 15 લાખ રૂપિયા આપવાનું વચન આપ્યું હતું. ખેડૂતોની આવક બમણી કરવાનું વચન આપ્યું હતું. ભાજપે તેના વચનો પૂરા કર્યા નથી તેથી બરૈયાનું મોઢું કાળું કરવાની જરૂર નથી.
સમર્થકોનું કહેવું છે કે કોંગ્રેસના ધારાસભ્યને કાળું ના કરવું જોઈએ પરંતુ સન્માન કરવું જોઈએ. બરૈયા રામના વંશજ છે, કારણ કે તેઓ ‘પ્રાણ જાયે પણ વચન ન જાયે, કહેવતને સાકાર કરી રહ્યા છે. જો કે કોંગ્રેસના નેતા ફૂલસિંહ બરૈયાએ પોતાની વાત પર અડગ રહીને ભોપાલમાં મોઢું કાળું કર્યું હતું.
ફૂલસિંહ બરૈયા ભંડેર સીટ પરથી 29 હજાર 438 વોટથી ચૂંટણી જીત્યા છે. તેમણે ભાજપના ઉમેદવાર ઘનશ્યામ પીરૌનિયાને હરાવ્યા છે. ભાજપે રાજ્યમાં 163 બેઠકો જીતીને બે તૃતીયાંશ બહુમતી મેળવી છે, જ્યારે કોંગ્રેસ માત્ર 66 બેઠકો સુધી મર્યાદિત રહી હતી.
