દિલ્હી-એનસીઆરમાં હુમલાનું કાવતરું ઘડી રહ્યા હતા
નવી દિલ્હી: દિલ્હી પોલીસની સ્પેશિયલ સેલે એક આંતરરાષ્ટ્રીય અને આંતરરાજ્ય પાકિસ્તાન સમર્થિત ગેંગસ્ટર-ટેરર મોડ્યુલનો પર્દાફાશ કર્યો છે. આ મોડ્યુલનો મુખ્ય સૂત્રધાર શહઝાદ ભટ્ટી છે, જે કથિત રીતે પાકિસ્તાની ગુપ્તચર એજન્સી ISIના ઈશારે કામ કરી રહ્યો હતો. પોલીસે ગુપ્ત ઈન્પુટ્સના આધારે કાર્યવાહી કરીને ઉત્તર પ્રદેશ, મધ્ય પ્રદેશ અને પંજાબમાંથી ત્રણ આતંકવાદીની ધરપકડ કરી છે.
સ્પેશિયલ સેલની એન્ટી ટેરર યુનિટ એ આ મોડ્યુલનો ભાંડો ફોડ્યો છે, જેમાં પકડાયેલા શંકાસ્પદોમાં મુખ્યત્વે પંજાબ સાથે જોડાયેલા શખસનો સમાવેશ થાય છે, જેઓ ગેંગસ્ટર નેટવર્ક દ્વારા હથિયારો અને વિસ્ફોટકોની દાણચોરી કરી રહ્યા હતા. મોડ્યુલના અન્ય સભ્યો ઉત્તર પ્રદેશના લખનઉ અને મુરાદાબાદ તેમ જ મધ્ય પ્રદેશના વિસ્તારોમાંથી ઝડપાયા છે.
પોલીસના જણાવ્યા અનુસાર ધરપકડ કરાયેલા તમામ આરોપીઓ શહઝાદ ભટ્ટીના નેતૃત્વ હેઠળ કામ કરી રહ્યા હતા, જે પાકિસ્તાનથી આ નેટવર્કનું સંચાલન કરી રહ્યો છે. પોલીસની તપાસમાં એ પણ જાણવા મળ્યું છે કે આ મોડ્યુલ પાકિસ્તાની હેન્ડલર્સના સંપર્કમાં હતા. આરોપીઓ સોશિયલ મીડિયા એકાઉન્ટ્સ દ્વારા ISI પાસેથી સૂચનાઓ મેળવતા હતા અને દિલ્હી-એનસીઆરમાં વિસ્ફોટક હુમલાઓનું કાવતરું ઘડી રહ્યા હતા.
પોલીસને આશંકા છે કે આ નેટવર્ક પંજાબ, ઉત્તર પ્રદેશ અને મધ્ય પ્રદેશમાં યુવાનોની ભરતી કરી રહ્યું હતું. શહઝાદ ભટ્ટીએ પંજાબમાં એક ભાજપ નેતાના ઘરની બહાર થયેલા ગ્રેનેડ હુમલાની જવાબદારી લીધી હતી, જેનાથી આ મોડ્યુલની ગંભીરતા સ્પષ્ટ થાય છે. આ મોડ્યુલની સૌથી ચિંતાજનક બાબત એ છે કે તે અગાઉ એકબીજાના દુશ્મન ગણાતા બિશ્નોઈ ગેંગ અને બબ્બર ખાલસા ઇન્ટરનેશનલ જેવા સંગઠનો સાથે મળીને કામ કરી રહ્યું હતું.
ISIના દબાણ હેઠળ આ જૂથ હવે એક થઈને ‘હાઇબ્રિડ થ્રેટ’ ઊભો કરી રહ્યા છે. પોલીસની તપાસમાં એ પણ ખુલાસો થયો છે કે શહઝાદ ભટ્ટી લોરેન્સ બિશ્નોઈના ભાઈ અનમોલ બિશ્નોઈની હત્યાનું કાવતરું ઘડી રહ્યો હતો. ધરપકડ કરાયેલા ત્રણ લોકોમાંથી એક એવો શખસ છે, જે અનમોલને નિશાન બનાવવાના પ્લાનમાં સામેલ હતો.
ઉલ્લેખનીય છે કે, 27 ઓક્ટોબરના રોજ અનમોલે પોતાના વકીલ મારફતે કોર્ટમાં અરજી કરીને દાવો કર્યો હતો કે તેને પાકિસ્તાની ગેંગસ્ટર શહઝાદ ભટ્ટીથી જાનનું જોખમ છે. આ જોખમને ધ્યાનમાં રાખીને NIAની ઓફિસમાં અનમોલ માટે કોર્ટની કાર્યવાહી પણ થઈ હતી, જેના પર દિલ્હી પોલીસની સ્પેશિયલ સેલ હવે વધુ તપાસ કરી રહી છે.
આ પણ વાંચો…દિલ્હી પોલીસને મોટી સફળતા, કૅનેડામાં કપિલ શર્માના કૅફે પર ફાયરિંગ કરાવનાર ગૅંગસ્ટરની ધરપકડ
