દિલ્હીમાં દિવાળી પહેલા પ્રદૂષણે માઝા મૂકીઃ GRAPનો પહેલો તબક્કો લાગુ, જાણો કયા નિયમોનો કરવો પડશે અમલ?
નવી દિલ્હી: દર વર્ષે દિવાળી ટાણે દિલ્હીમાં પ્રદૂષણનો મુદ્દો ઊભો થાય છે. એવા સંજોગોમાં કમિશન ફોર એર ક્વોલિટી મેનેજમેન્ટ અવનવા નિયમો ઘડી કાઢે છે. આજે (14 ઓક્ટોબર) દિલ્હીનો એર ક્વોલિટી ઇન્ડેક્સ (AQI) 211 નોંધાયો છે, જે 200નો આંક વટાવી ગયો છે. આ વર્ષે પણ દિવાળી પહેલાં, દિલ્હી-એનસીઆરમાં પ્રદૂષણનું સ્તર ‘ખરાબ’ (Poor) શ્રેણીમાં પહોંચતા ગ્રેડેડ રિસ્પોન્સ એક્શન પ્લાન (GRAP)નો પહેલો તબક્કો લાગુ કરવામાં આવ્યો છે. આવો જાણીએ, આ તબક્કા હેઠળ નિયમોનો કરવો પડશે અમલ.
કચરો બાળવા પર સંપૂર્ણ પ્રતિબંધ
પ્રદૂષણ નિયંત્રણ માટે રચાયેલ કમિશન ફોર એર ક્વોલિટી મેનેજમેન્ટ (CAQM) અનુસાર, દિલ્હી-એનસીઆરમાં GRAP-I હેઠળ કેટલાક નિયંત્રણો અને પગલાં તાત્કાલિક અસરથી અમલમાં આવ્યા છે. જેના હેઠળ ખુલ્લામાં કચરો, પાંદડા અને અન્ય કચરો બાળવા પર સંપૂર્ણ પ્રતિબંધ રહેશે.
રસ્તાની બાજુના ફૂડ સ્ટોલ, હોટેલ, રેસ્ટોરા અને આઉટડોર ડાઇનિંગ સંસ્થાઓમાં કોલસા અથવા લાકડાના બળતણનો ઉપયોગ પ્રતિબંધિત રહેશે. તેઓએ માત્ર વીજળી, ગેસ અથવા અન્ય સ્વચ્છ ઇંધણનો ઉપયોગ કરવો પડશે. બિન-આવશ્યક પ્રવૃત્તિઓ માટે ડીઝલ જનરેટરનો ઉપયોગ પ્રતિબંધિત છે. તે માત્ર આવશ્યક અથવા કટોકટીની પરિસ્થિતિઓમાં જ માન્ય રહેશે.
આ પણ વાંચો : દિવાળી પહેલા જ દિલ્હીમાં શ્વાસ લેવું બન્યું મુશ્કેલ, આનંદ વિહારમાં AQI 281
પ્રદૂષણ ફેલાવતા વાહનોને થશે દંડ
દિલ્હી-એનસીઆરમાં 10 વર્ષથી વધુ જૂના ડીઝલ વાહનો અને 15 વર્ષથી વધુ જૂના પેટ્રોલ વાહનો પર પ્રતિબંધ મૂકવામાં આવશે. પ્રદૂષણ ફેલાવતા વાહનોને દંડ થઈ શકે છે અથવા જપ્ત પણ કરી શકાય છે. મુખ્ય ચોકડીઓ પર ટ્રાફિક પોલીસ તૈનાત કરવામાં આવી છે અને ડ્રાઇવરોને લાલ લાઇટ પર તેમના એન્જિન બંધ કરવાની સૂચના આપવામાં આવી છે.
આ ઉપરાંત GRAP-I હેઠળ તમામ બાંધકામ અને તોડી પાડવાના સ્થળોએ ધૂળ નિયંત્રણ પગલાં સખત રીતે લાગુ કરવા જરૂરી રહેશે, જેમાં ધુમ્મસ વિરોધી બંદૂકો (Anti-smog Guns)નો ઉપયોગ કરવો. 500 ચોરસ મીટરથી મોટા પ્રોજેક્ટ્સ માટે મંજૂર ધૂળ વ્યવસ્થાપન યોજનાનું પાલન કરવું અનિવાર્ય છે.
આ પણ વાંચો : દિલ્હીમાં ફટાકડા ફૂટ્યા તો ભાજપના નેતા ખુશ થયા, કહ્યું હિંદુઓને બદનામ કરવાનું કાવતરું
આજે સવારે એટલે કે 14 ઓક્ટોબરના રોજ રાષ્ટ્રીય રાજધાનીમાં AQI 201 નોંધાયો હતો અને લઘુત્તમ તાપમાન 19°C (સામાન્ય કરતાં 0.6°C ઓછું) નોંધાયું હતું. હવામાનની સ્થિતિ સાથે, આગામી દિવસોમાં પ્રદૂષણનું સ્તર ‘ખરાબ’ શ્રેણીમાં જ રહેવાની સંભાવના છે.
