‘દાના’એ દાટ વાળ્યોઃ ઓડિશામાં અસરગ્રસ્ત વિસ્તારના 50,000 ઘરમાં વીજ પુરવઠો ઠપ્પ
ભુવનેશ્વરઃ દાના ચક્રવાતે ભલે જાનહાનિ કરી ના હોય, પરંતુ હજુ પણ અસરગ્રસ્ત રાજ્ય ઓડિશાના પચાસ હજારથી વધુ ઘર વીજળીથી વંચિત હોવાની ચોંકાવનારી માહિતી પ્રશાસને આપી હતી.
ઓડિશાના કેન્દ્રપારા, ભદ્રક અને બાલાસોર જિલ્લાઓમાં ચક્રવાત પ્રભાવિત ક્ષેત્રોમાં લગભગ ૫૦,૦૦૦ ઘરોમાં વીજ પુરવઠો પુનઃસ્થાપિત કરવાનો બાકી છે. મુખ્ય પ્રધાન મોહન ચરણ માઝીએ ચક્રવાત પછીની સ્થિતિની સમીક્ષા કર્યા બાદ કહ્યું હતું કે પુનઃસ્થાપિત કાર્ય અંતિમ તબક્કામાં પહોંચી ગયું છે અને રસ્તાઓ પરના અવરોધો દૂર કરવામાં આવ્યા છે.
પ્રભાવિત ક્ષેત્રોમાંથી ૯૮ ટકામાં વીજ પુરવઠો પુનઃસ્થાપિત કરવામાં આવ્યો છે. ચક્રવાતથી પ્રભાવિત ૨૨.૮૪ લાખ વીજ ગ્રાહકોમાંથી ૨૨.૩૨ લાખ ઘરોમાં વીજ પુરવઠો પુનઃસ્થાપિત કરવામાં આવ્યો છે. તેમણે કહ્યું કે કેન્દ્રપારા, ભદ્રક અને બાલાસોર જિલ્લામાં લગભગ ૫૦,૦૦૦ ઘરોમાં વીજ પુરવઠો પુનઃસ્થાપિત કરવાનો બાકી છે કારણ કે ગામો જળમગ્ન છે.
આપણ વાંચો: ઓડિશામાં ચક્રવાત ‘દાના’થી જાનહાનિ નહીં, પણ આટલા લાખ લોકો પ્રભાવિત
માઝીએ જણાવ્યું કે અસરગ્રસ્ત વિસ્તારોમાં વીજ પુરવઠો પુનઃસ્થાપિત કરવા માટે લગભગ ૭,૦૦૦ કર્મચારીઓ તૈનાત છે અને તેઓ તે વિસ્તારોમાં વીજળી પુનઃસ્થાપિત કરવા માટે સખત મહેનત કરી રહ્યા છે.
ચક્રવાત પ્રભાવિત વિસ્તારોમાં ૮ લાખથી વધુ લોકોને ૬,૨૧૦ આશ્રય કેન્દ્રોમાં ખસેડવામાં આવ્યા છે. તેમણે કહ્યું કે સ્થિતિ સામાન્ય થયા બાદ તેમાંથી મોટાભાગના લોકો પોતાના ઘરે પરત ફર્યા છે. જ્યારે હજુ પણ ૩૦,૦૦૦ લોકો ૪૭૦ આશ્રય કેન્દ્રોમાં છે કારણ કે તેમના ઘરો પાણીમાં ડૂબેલા છે.
મુખ્ય પ્રધાને જણાવ્યું કે પ્રાથમિક અંદાજ મુજબ બાલાસોર, ભદ્રક, કેન્દ્રપારા, જાજપુર અને મયુરભંજના ૧૨ બ્લોકના ૪,૧૦૦ ગામોમાં ૨.૨૧ લાખ એકરથી વધુ જમીન પર ઉભા પાકને કુદરતી આપદામાં નુકસાન થયું છે.