ચેન્નઈ: દિતવાહ વાવાઝોડાએ શ્રીલંકામાં વિનાશ સર્જ્યા સર્જ્યો છે, વાવાઝોડાને કારણે 150 લોકોનાં મોત થયા છે અને સંખ્યાબંધ લોકો ગુમ છે. હવે આ વિનાશક વાવાઝોડું દક્ષિણ ભારત તરફ ઝડપથી આગળ વધી રહ્યું છે. આજે રવિવારે વાવાઝોડું ઉત્તર તમિલનાડુ, પુડુચેરી અને દક્ષિણ આંધ્રપ્રદેશના દરિયાકાંઠે લેન્ડફોલ કરી શકે છે. હવામાન વિભાગે વિવિધ વિસ્તાર માટે અલગ અલગ ચેતવણી જાહેર કરી છે.
ભારતીય હવામાન વિભાગ (IMD) ના જણાવ્યા મુજબ વાવાઝોડું પુડુચેરીના કરાઈકલથી આશરે 80 કિમી પૂર્વમાં એક જ વિસ્તારમાં સ્થિત રહ્યું હતું. હવે વાવાઝોડું લગભગ 5 કિમી પ્રતિ કલાકની ઝડપે ઉત્તર તરફ આગળ વધી રહ્યું છે.
તમિલનાડુ અને પુડુચેરીમાં જોરદાર પવન સાથે ભારે વરસાદની શક્યતા છે. તમિલનાડુના કેટલાક ભાગો માટે રેડ એલર્ટ જાહેર કરવામાં આવ્યું છે. રાજ્યના કુડ્ડલોર, નાગપટ્ટીનમ, મયિલાદુથુરાઈ, વિલ્લુપ્પુરમ, ચેંગલપટ્ટુ, પુડુચેરી અને કરાઈકલના ભારેથી અતિ ભારે વરસાદ વરસી શકે છે.
તમિલનાડુના અન્ય વિસ્તારો અને પુડુચેરીના પ્રદેશમાં હળવાથી મધ્યમ વરસાદની શક્યતા છે. અલગ અલગ સ્થળોએ ભારે પવન ફૂંકાવા અને વીજળી પડવાની આગાહી કરવામાં આવી છે.
તાજેતરની આગાહી મુજબ વાવાઝોડું સવાર અને સાંજ સુધીમાં દક્ષિણપશ્ચિમ બંગાળની ખાડી પર, તમિલનાડુ અને પુડુચેરી કિનારાથી 25-50 કિમી દૂર સ્થિર રહી શકે છે.
તંત્ર હાઈ એલર્ટ પર:
નેશનલ ડિઝાસ્ટર રિસ્પોન્સ ફોર્સ(NDRF)ની 14 ટીમો સ્થળ પર તૈનાત કરવામાં આવી છે. વહીવટીતંત્રએ લોકોને ઘરની અંદર રહેવા, દરિયાકાંઠાના વિસ્તારોથી દૂર રહેવા અને અધિકારીઓના નિર્દેશોનું પાલન કરવા જણાવ્યું છે. માછીમારોને દરિયો ન ખેડવા સુચના આપવામાં આવી છે.
સ્થિતિને ધ્યાનમાં રાખીને ચેન્નઈ એરપોર્ટ 36 ડોમેસ્ટિક અને ઇન્ટરનેશનલ 11 ફ્લાઇટ્સ રદ કરવામાં આવી છે.
આ રાજ્યોને પણ અસર થશે:
આંધ્રપ્રદેશના દરિયાકાંઠા-યાનમ પ્રદેશ અને રાયલસીમામાં હળવાથી મધ્યમ વરસાદ પડવાની શક્યતા છે. કેરળમાં ઘણા વિસ્તારોમાં હળવા થી મધ્યમ વરસાદ પડવાની શક્યતા છે, જ્યારે કેટલાક સ્થળોએ ભારે વરસાદ પડી શકે છે. તેલંગાણાના કેટલાક ભાગોમાં હળવાથી મધ્યમ વરસાદની આગાહી છે, જ્યારે કેટલાક વિસ્તારોમાં ભારે વરસાદ વરસી શકે છે.
આ પણ વાંચો…શ્રીલંકામાં ભારે તબાહી બાદ ચક્રવાત દિત્વા ભારતના ચાર રાજ્ય પર ત્રાટકશે, તંત્ર એલર્ટ મોડમાં
