તમિલનાડુ પર ‘દિત્વા’નું સંકટ: સંભવિત ખતરાને પગલે તંત્ર સજ્જ, હાઈ એલર્ટ કર્યું જાહેર
નવી દિલ્હી: ચક્રવાતી તોફાન ‘દિત્વા’ (Cyclone Ditwa)ને કારણે ભારતના દક્ષિણ કિનારા પર ખતરો મંડરાઈ રહ્યો છે. ભારત હવામાન વિભાગ (IMD) એ તમિલનાડુના કડ્ડાલૌર જિલ્લા માટે અત્યંત ભારે વરસાદની ચેતવણી જાહેર કરી છે. આ ગંભીર ચેતવણીને ધ્યાનમાં રાખીને, જિલ્લા વહીવટીતંત્ર દ્વારા સંપૂર્ણપણે સતર્કતા દાખવવાનું શરૂ કરી દેવામાં આવ્યું છે. કડ્ડાલૌરના જિલ્લા કલેક્ટર સિબી આદિત્ય સેન્થિલ કુમારે જણાવ્યું હતું કે, જિલ્લામાં 22 અત્યંત સંવેદનશીલ અને 39 ઉચ્ચ સંવેદનશીલ વિસ્તારોને ઓળખી કાઢવામાં આવ્યા છે, જ્યાં સામાન્ય રીતે પાણી ભરાવાની સ્થિતિ સર્જાય છે.
જિલ્લા કલેક્ટરે માહિતી આપી કે આ સંવેદનશીલ વિસ્તારોમાં મોટર સહિતના જરૂરી સાધનો અને કર્મચારીઓની ટીમો અગાઉથી તૈનાત કરી દેવામાં આવી છે, જેથી પાણી ભરાય કે તરત જ તાત્કાલિક નિકાલ કરી શકાય. આ ઉપરાંત, વહીવટીતંત્રે 233 જેટલા રાહત શિબિરો પણ તૈયાર કર્યા છે. હાલ વરસાદ શરૂ થયો નથી, તેથી લોકોનું સ્થળાંતર શરૂ કરાયું નથી, પરંતુ આ તમામ કેન્દ્રો લગભગ 1.5 લાખ લોકોને આશ્રય આપવા માટે સક્ષમ છે અને તેમને ભોજન-પાણીની સુવિધાઓ પૂરી પાડવામાં આવશે. સુરક્ષા અને વ્યવસ્થાપન માટે તમામ જરૂરી પગલાં લેવામાં આવી રહ્યા છે.
આ પણ વાંચો: શ્રીલંકામાં ચક્રવાત “દિત્વા” થી 46 લોકોના મોત, પીએમ મોદીએ મદદની જાહેરાત કરી
આપત્તિની સ્થિતિને પહોંચી વળવા માટે આરોગ્ય વિભાગને પણ સજ્જ કરવામાં આવ્યું છે. જિલ્લાની તમામ સરકારી હોસ્પિટલોમાં બેકઅપ વીજળીની વ્યવસ્થા, પૂરતો દવાઓનો જથ્થો અને તબીબી સ્ટાફને ફરજ પર હાજર રહેવાની સૂચના આપવામાં આવી છે.
વાવાઝોડાના સંભવિત ખતરાને લઈ કલેક્ટરે જણાવ્યું કે આગામી બે અઠવાડિયામાં પ્રસૂતિ કરાવનારી ગર્ભવતી મહિલાઓની યાદી પણ અગાઉથી તૈયાર કરી લેવામાં આવી છે, જેથી તેમને જરૂર પડ્યે સમયસર મદદ મળી શકે. વહીવટી સંકલન માટે, જિલ્લા કલેક્ટર કચેરીમાં 24×7 કંટ્રોલ રૂમ સક્રિય છે અને સામાન્ય લોકોની ફરિયાદ માટે હેલ્પલાઇન નંબર 1077 પણ જાહેર કરવામાં આવ્યો છે.
આ પણ વાંચો: દક્ષિણમાં ‘દિત્વા’નું સંકટ: તમિલનાડુ, આંધ્રમાં આજે અને કાલે અતિભારે વરસાદનું એલર્ટ!
જ્યાં એક તરફ ભારત પોતાને બચાવવાની તૈયારી કરી રહ્યું છે, ત્યાં બીજી તરફ ચક્રવાતી તોફાન ‘દિત્વા’એ પાડોશી દેશ શ્રીલંકામાં ભારે તબાહી મચાવી છે. શ્રીલંકામાં પૂર અને ભૂસ્ખલનને કારણે અત્યાર સુધીમાં 80થી વધુ લોકોના મોત થયા છે અને મોટા પાયે જાન-માલનું નુકસાન થયું છે. શ્રીલંકાની ગંભીર પરિસ્થિતિને જોતા ભારતે તાત્કાલિક મદદ કરવાનો નિર્ણય લીધો છે. ભારતે ‘ઓપરેશન સાગર બંધુ’ હેઠળ શ્રીલંકા માટે રાહત સામગ્રીની પ્રથમ ખેપ INS વિક્રાંત (Vikrant) અને INS ઉદયગિરિ (Udaygiri) જહાજો દ્વારા મોકલીને માનવીય સહાય શરૂ કરી છે.
