દિલ્હીમાં હાડથિજવતી ઠંડી અને ઝેરી પ્રદૂષણ: ધુમ્મસની ઓથમાં ટ્રેનોની રફ્તાર ધીમી પડી
નવી દિલ્હી: રાષ્ટ્રીય રાજધાની દિલ્હી હાલમાં કાતિલ ઠંડી અને ગાઢ ધુમ્મસની લપેટમાં છે. શિયાળાના આકરા મિજાજને કારણે સમગ્ર દિલ્હી-NCRમાં જનજીવન થંભી ગયું હોય તેવું લાગી રહ્યું છે. લઘુત્તમ તાપમાનમાં થયેલા ઘટાડાની સાથે પ્રદૂષણનો સ્તર (AQI) પણ ‘ગંભીર’ શ્રેણીમાં પહોંચતા લોકોની મુશ્કેલીમાં વધારો થયો છે. ધુમ્મસને કારણે વિઝિબિલિટી એટલે કે દૃશ્યતા શૂન્યની નજીક પહોંચી ગઈ છે, જેના કારણે સડક માર્ગથી લઈને રેલવે સુધીની તમામ પરિવહન સેવાઓ ખોરવાઈ ગઈ છે.
ગાઢ ધુમ્મસની સૌથી વધુ અસર ભારતીય રેલવે પર જોવા મળી રહી છે. રેલવે વિભાગ દ્વારા જારી કરવામાં આવેલી માહિતી મુજબ, ઓછી વિઝિબિલિટીના કારણે લગભગ 100 જેટલી ટ્રેનો તેના નિર્ધારિત સમય કરતા ઘણી મોડી ચાલી રહી છે. રેલવે ટ્રેક પર ધુમ્મસને કારણે ટ્રેનોની ગતિ ધીમી પડી છે અને કેટલીક ટ્રેનોના રૂટમાં પણ ફેરફાર કરવામાં આવ્યા છે. કલાકો સુધી સ્ટેશનો પર રાહ જોતા મુસાફરો ભારે હાલાકીનો સામનો કરી રહ્યા છે, ખાસ કરીને ઉત્તર ભારત તરફ જતી ટ્રેનો પર વધુ અસર પડી છે.
ટ્રેન વ્યવહારની સરખામણીએ દિલ્હી એરપોર્ટ પર ફ્લાઈટ્સની અવરજવર ધીમે ધીમે સામાન્ય થઈ રહી છે. એરપોર્ટ મેનેજમેન્ટે જણાવ્યું છે કે હાલમાં ટેક-ઓફ અને લેન્ડિંગમાં કોઈ મોટી અડચણ નથી, પરંતુ મુસાફરોને સલાહ આપવામાં આવી છે કે તેઓ એરપોર્ટ આવતા પહેલા પોતાની એરલાઇન્સ પાસેથી ફ્લાઈટનું લેટેસ્ટ સ્ટેટસ જાણી લે. એરપોર્ટ સ્ટાફ મુસાફરોની સુવિધા માટે સતત કાર્યરત છે જેથી તેમને કોઈ અગવડતા ન પડે.
હવામાન વિભાગના જણાવ્યા અનુસાર, આગામી થોડા દિવસો સુધી દિલ્હીમાં આવી જ સ્થિતિ યથાવત રહી શકે છે. ધુમ્મસની સાથે હવામાં પ્રદૂષણના કણો ભળવાને કારણે ‘સ્મોગ’ની સ્થિતિ સર્જાઈ છે, જે સ્વાસ્થ્ય માટે હાનિકારક છે. રસ્તાઓ પર વાહનોની લાઈટો ચાલુ હોવા છતાં વિઝિબિલિટી ઓછી હોવાથી અકસ્માતનો ભય વધી રહ્યો છે. તંત્ર દ્વારા લોકોને વહેલી સવારે બિનજરૂરી મુસાફરી ટાળવા અને સાવચેતી રાખવા અપીલ કરવામાં આવી છે.
આપણ વાંચો: Weather: ઉત્તર ભારતના ઠંડા પવનોએ ગુજરાત અને મહારાષ્ટ્રને ઠુંઠવ્યા, હજુ પારો ગગડવાની આગાહી
