ઢાકા: બાંગ્લાદેશમાં શેખ હસીનાની સત્તાનું પતન થયા બાદ બાંગ્લાદેશ અને ચીન વચ્ચે ભાઇચારાની ભાવના વધી રહી છે. ચીનના રાષ્ટ્રપતિ શી જિનપિંગે શુક્રવારે બાંગ્લાદેશની વચગાળાની સરકારને ઉત્પાદન સાહસોને દેશમાં સ્થાનાંતરિત કરીને અને તેના ઉત્પાદનો માટે ડ્યુટી-ફ્રી ઍક્સેસ આપીને આર્થિક સંબંધોને વિસ્તૃત કરવામાં ચીનના સમર્થનની ખાતરી આપી હતી. શુક્રવારે બાંગ્લાદેશના મુખ્ય સલાહકાર મુહમ્મદ યુનુસના પ્રેસ સચિવ શફીકુલ આલમે આ ટિપ્પણી કરી હતી.
ચીની ઉત્પાદન સાહસોને બાંગ્લાદેશમાં સ્થાનાંતરિત
બેઠક દરમિયાન, જિનપિંગે કહ્યું કે ચીન બાંગ્લાદેશ દ્વારા ઉઠાવવામાં આવેલા ઘણા મહત્વપૂર્ણ મુદ્દાઓ પર સકારાત્મક વિચાર કરશે. ચીનના ચાર દિવસના પ્રવાસે રહેલા યુનુસે બુધવારે હૈનાન પહોંચ્યા બાદ દેશના ‘બોઆઓ ફોરમ ફોર એશિયા’ વાર્ષિક પરિષદમાં હાજરી આપી હતી. તેઓ ગુરુવારે બેઇજિંગ પહોંચ્યા અને ચીનના ઉપવિદેશ પ્રધાન સન વેઇડોંગે એરપોર્ટ પર તેમનું સ્વાગત કર્યું હતું. આલમે કહ્યું કે જિનપિંગે ખાતરી આપી હતી કે તેમનો દેશ ચીની રોકાણ અને ચીની ઉત્પાદન સાહસોને બાંગ્લાદેશમાં સ્થાનાંતરિત કરવા માટે પ્રોત્સાહિત કરશે.
આ મુદ્દાઓ પર થઈ ચર્ચા
આલમે જણાવ્યું હતું કે આ યુનુસની પહેલી દ્વિપક્ષીય વિદેશ મુલાકાત હતી અને અત્યાર સુધી તે “મોટી સફળતા” રહી છે. રાષ્ટ્રપતિ જિનપિંગે બાંગ્લાદેશની તેમની બે મુલાકાતો વિશે વાત કરી હતી અને કહ્યું હતું કે જ્યારે તેઓ ફુજિયાન પ્રાંતના ગવર્નર હતા ત્યારે તેમણે ‘માઇક્રો-ક્રેડિટ સુવિધા’નો અભ્યાસ કર્યો હતો. આ બેઠકમાં વિવિધ વ્યૂહાત્મક દ્વિપક્ષીય મુદ્દાઓ, વેપાર અને રોકાણ વૃદ્ધિ, કૃષિ, માળખાગત સુવિધાઓ, નવીનીકરણીય ઉર્જા ક્ષેત્રો માટે સમર્થન, રોહિંગ્યા મુદ્દાનું નિરાકરણ તેમજ બંને દેશો વચ્ચેના પરસ્પર હિતના એકંદર મુદ્દાઓ પર ચર્ચા કરી હતી.
આ પણ વાંચો : બાંગ્લાદેશમાં લઘુમતીઓ પર ‘અત્યાચાર’: ગબાર્ડના આરોપોને યુનુસ સરકારે ફગાવીને કર્યો લૂલો બચાવ
લોન પર વ્યાજ દર ઘટાડવા કરી અપીલ
ગુરુવારે, યુનુસે ચીનને ચીની લોન પર વ્યાજ દર ઘટાડવા અને ચીની ભંડોળ પૂરું પાડતા પ્રોજેક્ટ્સ પર પ્રતિબદ્ધતા ફી માફ કરવા હાકલ કરી. બાંગ્લાદેશના મીડિયા અહેવાલો અનુસાર, યુનુસે બોઆઓ ફોરમ ફોર એશિયા વાર્ષિક પરિષદ દરમિયાન ચીનના એક્ઝિક્યુટિવ વાઇસ પ્રીમિયર ડિંગ ઝુએક્સિયાંગ સાથેની મુલાકાત દરમિયાન વિકાસ પ્રોજેક્ટ્સ માટે ચીનનો ટેકો માંગ્યો હતો. તેમણે બાંગ્લાદેશને ચીન દ્વારા આપવામાં આવતી લોન પર વ્યાજ દર 3 ટકાથી ઘટાડીને 1-2 ટકા કરવાની અને બાંગ્લાદેશમાં ચીન દ્વારા ભંડોળ પૂરું પાડવામાં આવતા પ્રોજેક્ટ્સ પર પ્રતિબદ્ધતા ફી માફ કરવાની પણ માંગ કરી.