ચેન્નાઈ એરપોર્ટ પર અચાનક વિમાની સેવાઓ ખોરવાઈ, મુસાફરો મુકાયા મુસીબતમાં
નવી દિલ્હી: દક્ષિણ ભારતના પ્રવેશદ્વાર ગણાતા ચેન્નાઈમાં રવિવારની સવાર મુસાફરો માટે હાલાકીભરી રહી હતી. વહેલી સવારથી જ શહેર અને એરપોર્ટ વિસ્તારમાં છવાયેલા ઘટ્ટ ધુમ્મસને કારણે વિમાની સેવાઓ પર માઠી અસર પડી હતી. ઓછી વિઝિબિલિટી (દ્રશ્યતા) ના કારણે એરપોર્ટ પર ઉતરાણ કરનારા વિમાનોને મુશ્કેલી પડી હતી, જેના પગલે સત્તાધીશોએ સુરક્ષાના કારણોસર અનેક ફ્લાઈટ્સના રૂટ બદલવાની ફરજ પડી હતી. કલાકો સુધી ફ્લાઈટ મોડી પડતા એરપોર્ટ પર મુસાફરોની ભારે ભીડ અને અફરાતફરી જોવા મળી હતી.
હવામાન અને એરપોર્ટ અધિકારીઓના જણાવ્યા અનુસાર, રવિવારે સવારે મીનામ્બક્કમ એરપોર્ટ પર ધુમ્મસનું પ્રમાણ અચાનક વધી ગયું હતું. સવારે 05:30 વાગ્યે વિઝિબિલિટી અંદાજે 1500 મીટર હતી, જે 06:30 વાગ્યા સુધીમાં ઘટીને 350 મીટર થઈ ગઈ હતી. પરિસ્થિતિ ત્યારે વધુ ગંભીર બની જ્યારે સવારે 7:30 વાગ્યાની આસપાસ દ્રશ્યતા ઘટીને માત્ર 150 મીટર સુધી મર્યાદિત રહી ગઈ હતી. આટલી ઓછી વિઝિબિલિટીમાં વિમાનનું લેન્ડિંગ કરવું અત્યંત જોખમી હોવાથી અનેક ફ્લાઈટ્સને હવામાં જ હોલ્ડ પર રાખવામાં આવી હતી.
ખરાબ હવામાનને કારણે ચેન્નાઈ આવનારી ઓછામાં ઓછી ત્રણ મહત્વની ફ્લાઈટ્સને નજીકના એરપોર્ટ પર ડાયવર્ટ કરવામાં આવી હતી. કુઆલાલમ્પુર અને હૈદરાબાદથી આવતી બે ફ્લાઈટ્સને તિરુચિરાપલ્લી મોકલી દેવામાં આવી હતી. આ ઉપરાંત, બેંગલુરુથી આવેલી એક ખાનગી એરલાઈન્સની ફ્લાઈટને લેન્ડિંગની પરવાનગી ન મળતા તે પરત બેંગલુરુ રવાના થઈ ગઈ હતી. આ ફેરફારોને કારણે મુસાફરોને તેમના ગંતવ્ય સ્થાને પહોંચવામાં ઘણો વિલંબ થયો હતો અને એરપોર્ટ પર અટવાયેલા પ્રવાસીઓ પરેશાન જોવા મળ્યા હતા.
એરપોર્ટ સત્તાધીશોના જણાવ્યા મુજબ, સવારના આઠ વાગ્યા બાદ ધુમ્મસનું પ્રમાણ ધીમે-ધીમે ઓછું થતા સ્થિતિમાં સુધારો જોવા મળ્યો હતો. જોકે, વહેલી સવારના વિલંબને કારણે સમગ્ર દિવસના શિડ્યુલ પર તેની અસર જોવા મળી શકે છે. એરપોર્ટ ઓથોરિટીએ મુસાફરોને સલાહ આપી છે કે તેઓ એરપોર્ટ આવતા પહેલા પોતાની ફ્લાઈટનું સ્ટેટસ ચેક કરી લે. હાલમાં સ્થિતિ સામાન્ય થઈ રહી છે અને વિમાની સેવાઓ ફરી પાટા પર લાવવાના પ્રયાસો ચાલુ છે.
આપણ વાંચો: ગુજરાત-દિલ્હી વચ્ચે મુસાફરી થશે સુપરફાસ્ટ: 2027 સુધીમાં ખુલશે નવો એક્સપ્રેસવે
