CBSEની 20 સ્કૂલો સામે કડક કાર્યવાહી, 17 શાળાની માન્યતા રદ જ્યારે 3ને ડાઉનગ્રેડ કરી

નવી દિલ્હી: શિક્ષણના નામે લૂંટનો ધંધો ચલાવી રહેલી દેશભરની 20 શાળાઓ સામે સેન્ટ્રલ બોર્ડ ઓફ સેકન્ડરી એજ્યુકેશન (CBSE)એ કડક કાર્યવાહી કરી છે. CBSEએ નિયમોની અવગણના કરીને ચાલતી આવી 20 શાળાઓની માન્યતા રદ કરી હતી. એવી પણ ત્રણ શાળાઓ છે જેમની માન્યતા હજુ સુધી રદ કરવામાં આવી નથી પરંતુ તેઓ ચોક્કસપણે ડાઉનગ્રેડ કરવામાં આવી છે. સીબીએસઈએ એક પ્રેસ રિલીઝ જારી કરીને આ અંગે વિસ્તૃત માહિતી આપી છે.

દેશની અનેક શાળાઓ CBSE બોર્ડ સાથે જોડાયેલી છે. આ શાળાઓને સરળતાથી ચલાવવા માટે, CBSE બોર્ડ સમયાંતરે જરૂરી ગાઈડલાઈન્સ શેર કરતું રહે છે. તાજેતરમાં, બોર્ડ દ્વારા તમામ શાળાઓની ગુપ્ત રીતે તપાસ કરવામાં આવી હતી, જેમાં જાણવા મળ્યું હતું કે ઘણી સ્કૂલો એવી છે જે ગાઈડલાઈન્સનું પાલન કર્યા વિના ઘણી અનૌપચારિક પ્રવૃત્તિઓ કરી રહી છે. તપાસ બાદ સીબીએસઈ દ્વારા આ શાળાઓનું એફિયેલેશન રદ કરવામાં આવ્યું છે અને ઘણી શાળાઓને ડાઉનગ્રેડ પણ કરવામાં આવી છે.

CBSE દ્વારા બહાર પાડવામાં આવેલી યાદીમાં દેશની રાજધાની દિલ્હીની કુલ છ શાળાઓનો સમાવેશ કરવામાં આવ્યો છે. જેમાંથી પાંચ શાળાઓની માન્યતા રદ કરવામાં આવી છે જ્યારે એક શાળાને ડાઉનગ્રેડ કરવામાં આવી છે. તે જ રીતે યુપીની ત્રણ, રાજસ્થાન, છત્તીસગઢ, મહારાષ્ટ્ર, મધ્યપ્રદેશ અને કેરળની પ્રત્યેક 2 શાળાઓનો સમાવેશ થાય છે.