Bihar ના ભોજપુરમાં જ્વેલરી શોરૂમમાં કરોડો રૂપિયાની લૂંટ, પોલીસે બે આરોપીને પગે ગોળી મારી

પટના : બિહારના(Bihar)ભોજપુર જિલ્લામાં ધોળા દિવસે એક જ્વેલરી શોરૂમ માંથી કરોડોની લૂંટનો મામલો પ્રકાશમાં આવ્યો છે. જેમાં નગર પોલીસ સ્ટેશન વિસ્તારમાં આવેલા ગોપાળી ચોક ખાતે આવેલા જ્વેલરી શોરૂમમાંથી હથિયાર સાથે આવેલા લૂંટારૂઓએ કરોડોના ઘરેણાં અને રોકડ લૂંટી લીધી હતી.

6-7 સશસ્ત્ર શખ્સોએ ઘરેણાં અને રોકડ રકમની લૂંટ ચલાવી

આ દિલધડક લૂંટની મળતી માહિતી મુજબ ગીચ વિસ્તારમાં આવેલા જ્વેલરી શોરૂમમાં 6-7 સશસ્ત્ર શખ્સોએ ઘરેણાં અને રોકડ રકમની લૂંટ ચલાવી હતી. આ લૂંટ દરમિયાન લૂંટારાઓ અડધા કલાક સુધી શોરૂમની અંદર રહ્યા. બહારથી કોઈને લૂંટનો ખ્યાલ પણ ન આવ્યો.

આપણ વાંચો: Ahmedabad માં એટીએમ કાર્ડની હેરફેર કરી લૂંટ ચલાવતી ગેંગના બે આરોપીઓની ધરપકડ

બધા લૂંટારા પગપાળા આવ્યા હતા

આ સશસ્ત્ર ગુનેગારોએ જ્વેલરી શોરૂમમાં કામ કરતા સિક્યુરિટી ગાર્ડની બંદૂક પણ લૂંટી લીધી હતી.તમામ લૂંટારા પગપાળા આવ્યા અને પગપાળા ભાગી ગયા. જોકે, ઘટનાની માહિતી મળતા જ શહેર પોલીસ સ્ટેશન સહિત મોટી સંખ્યામાં પોલીસ ફોર્સ શોરૂમ પર પહોંચી ગઈ હતી.

પોલીસે બે બદમાશોને ગોળી મારીને ધરપકડ કરી

જ્વેલરી શોરૂમમાંથી કરોડો રૂપિયા લૂંટીને ભાગી રહેલા બે ગુનેગારોને પોલીસે પગમાં ગોળી મારી દીધી છે. બંને ગુનેગારોને ઘાયલ હાલતમાં ધરપકડ કરવામાં આવી છે. આ ધરપકડ ભોજપુર જિલ્લાના બાધરા પોલીસ સ્ટેશન વિસ્તારમાં કરવામાં આવી છે. ઘાયલ ગુનેગાર છાપરાના ડોરીગંજ તરફ ભાગવાનો પ્રયાસ કરી રહ્યો હતો. પોલીસે ચોરાયેલા દાગીનાવાળી બે બેગ જપ્ત કરી. આ લૂંટ બાદ ચાર ગુનેગારો ભાગી જવામાં સફળ રહ્યા છે.

આપણ વાંચો: વસઇમાં શસ્ત્રની ધાકે લૂંટના કેસનો ફરાર આરોપી 20 વર્ષ બાદ પકડાયો

સીસીટીવી ફૂટેજની તપાસ કરવામાં આવી રહી છે

જોકે, ઘટના બાદ વેપારીઓમાં ગભરાટનો માહોલ છે. આ દરમિયાન ભોજપુરના પોલીસ અધિક્ષક શ્રી રાજે જણાવ્યું હતું કે સીસીટીવી ફૂટેજના આધારે લૂંટારુઓની ઓળખ કરવામાં આવી રહી છે.

બાકીના ચાર ગુનેગારોની ધરપકડ ટૂંક સમયમાં કરવામાં આવશે. તેમણે આ લૂંટની ઘટનાને મોટી ભૂલ ગણાવી છે. આ સમગ્ર મામલે કાર્યવાહી કરવાનું કહેવામાં આવ્યું છે. ઝવેરાતની દુકાનમાં થયેલી લૂંટ અંગે એવું કહેવામાં આવી રહ્યું છે કે લગભગ 2 કરોડ રૂપિયાના દાગીના લૂંટાઈ ગયા છે.