નેશનલ ઇન્વેસ્ટિગેશન એજન્સી (NIA) ગયા અઠવાડિયે બેંગલુરુના રામેશ્વરમ કાફેમાં થયેલા વિસ્ફોટની તપાસ કરી રહી છે. બોમ્બ બ્લાસ્ટના દિવસે જ આ વિસ્ફોટના શંકાસ્પદની માહિતી સામે આવી હતી. NIA દ્વારા શંકાસ્પદ યુવકનો ફોટો પણ જાહેર કરવામાં આવ્યો છે અને તેના વિશે માહિતી આપનાર માટે ઈનામની પણ જાહેરાત કરવામાં આવી છે. દરમિયાન, હવે બ્લાસ્ટના સંદિગ્ધને લઈને મોટો ખુલાસો થયો છે. NIA ના સૂત્રોના જણાવ્યા અનુસાર કેફેમાં બોમ્બ મૂક્યા બાદ શંકાસ્પદ તે જ વિસ્તારની એક મસ્જિદમાં નમાઝ પઢવા ગયો હતો.
NIAના સૂત્રોના જણાવ્યા અનુસાર, BMTC બસમાં આવેલા શંકાસ્પદ વ્યક્તિ કેફેમાં બોમ્બ પ્લાન્ટ કર્યા બાદ તે જ વિસ્તારની એક મસ્જિદમાં ગયો હતો. આ મસ્જિદમાં તેણે શુક્રવારની નમાજ અદા કરી હતી. નજીકમાં જ તેણે કપડાં પણ બદલી નાખ્યા. NIAએ આ મસ્જિદ નજીકથી બેઝબોલ કેપ કબજે કરી છે જે આ શંકાસ્પદ દ્વારા પહેરવામાં આવી હતી.
આ કેસની તપાસ સાથે સંકળાયેલા સૂત્રોના જણાવ્યા અનુસાર, બુધવારે બેલ્લારીના બસ સ્ટેન્ડ પર આ બ્લાસ્ટનો શંકાસ્પદ જોવા મળ્યો હતો. NIAની ટીમ ત્યાંના CCTV ફૂટેજની તપાસ કરી રહી છે. શકમંદો જુદી જુદી બસોમાં મુસાફરી કરતા હોવાનું જાણવા મળ્યું હતું. સૂત્રોના જણાવ્યા અનુસાર, આ શંકાસ્પદ આંધ્રપ્રદેશના તુમાકુરુ, મંત્રાલયમ અને કોસ્ટલ કર્ણાટકના ગોકર્ણની બસોમાં મુસાફરી કરતો જોવા મળ્યો છે.
NIAએ બેંગલુરુમાં રામેશ્વરમ કાફે બ્લાસ્ટના શંકાસ્પદની નવી તસવીરો પણ જાહેર કરી છે. NIAએ હુમલાખોર વિશે માહિતી આપનારને 10 લાખ રૂપિયાના રોકડ ઈનામની જાહેરાત કરી છે. હુમલાખોર વિશે માહિતી આપનાર વ્યક્તિની ઓળખ ગુપ્ત રાખવામાં આવશે. તમને જણાવી દઈએ કે 1 માર્ચે થયેલા આ વિસ્ફોટમાં ઓછામાં ઓછા 10 લોકો ઘાયલ થયા હતા.
