બાંગ્લાદેશમાં ફરી હિન્દુ વ્યક્તિને જીવતો સળગાવવાનો પ્રયાસ, તળાવમાં કૂદીને બચાવ્યો જીવ
નવી દિલ્હી: બાંગ્લાદેશમાં લઘુમતી હિન્દુ સમુદાય વિરુદ્ધ હિંસાની ઘટનાઓ અટકવાનું નામ નથી લઈ રહી. પડોશી દેશમાં નફરતની આગ ફરી એકવાર ભભૂકી ઉઠી છે, જેમાં નિર્દોષ નાગરિકોને નિશાન બનાવવામાં આવી રહ્યા છે.
તાજેતરમાં શરીયતપુર વિસ્તારમાં બનેલી એક ભયાનક ઘટનાએ સમગ્ર માનવતાને શર્મસાર કરી દીધી છે. અહીં એક હિન્દુ વ્યક્તિને ભીડ દ્વારા જીવતી સળગાવવાનો પ્રયાસ કરવામાં આવ્યો હતો, જે દર્શાવે છે કે ત્યાં લઘુમતીઓ માટે સ્થિતિ કેટલી ગંભીર અને અસુરક્ષિત બની ગઈ છે.
મળતી માહિતી મુજબ, બુધવારે મોડી સાંજે જ્યારે ખોકન ચંદ્ર નામનો વ્યક્તિ પોતાના ઘરે પરત ફરી રહ્યો હતો, ત્યારે ઉન્મત્ત ભીડે તેને ચારે બાજુથી ઘેરી લીધો હતો. હુમલાખોરોએ પહેલા તેને નિર્દયતાથી માર માર્યો અને ત્યારબાદ તીક્ષ્ણ હથિયારોથી હુમલો કર્યો હતો.
આપણ વાચો: મણિપુરમાં હિંસાની ઘટનાઓ બાદ રાજ્યપાલને મળ્યા CM, મેમોરેન્ડમ સોંપ્યું
ક્રૂરતાની હદ તો ત્યારે વટાવી ગઈ જ્યારે ભીડે તેના પર પેટ્રોલ છાંટીને તેને જીવતો સળગાવવાનો પ્રયત્ન કર્યો. જોકે, ખોકન ચંદ્રએ હિંમત ન હારી અને સળગતી હાલતમાં નજીકના તળાવમાં છલાંગ લગાવીને પોતાનો જીવ બચાવ્યો હતો.
ઉલ્લેખનીય છે કે બાંગ્લાદેશમાં છેલ્લા 15 દિવસમાં હિન્દુઓ વિરુદ્ધ હિંસાની આ ત્રીજી મોટી ઘટના છે. આ પહેલા 18 ડિસેમ્બર 2025ના રોજ દીપુ ચંદ્ર દાસની ભીડ દ્વારા હત્યા કરવામાં આવી હતી અને તેના મૃતદેહને ઝાડ સાથે બાંધીને સળગાવી દેવામાં આવ્યો હતો.
આપણ વાચો: હેલ્થ વર્કર્સ સામે હિંસાની આટલા કલાકોમાં FIR દાખલ કરવી પડશે, સરકારે આપી કડક સૂચના
આ હુમલા પાછળ ‘ઈશનિંદા’ (Blasphemy) ના ખોટા આરોપો લગાવવામાં આવ્યા હતા. આ ઘટનાના પડઘા હજુ શાંત પડ્યા નહોતા ત્યાં 25 ડિસેમ્બરે અમૃત મંડલ નામના અન્ય એક હિન્દુ વ્યક્તિને પણ ભીડે માર મારીને મોતને ઘાટ ઉતારી દીધો હતો.
દરેક હિંસક ઘટના બાદ બાંગ્લાદેશ પ્રશાસન પોતાની છબી બચાવવા માટે વિચિત્ર તર્ક રજૂ કરતું આવ્યું છે. અમૃત મંડલની હત્યાના કેસમાં ત્યાંની સરકારે તેને ગુનેગાર ગણાવીને મામલાને રફા-દફા કરવાનો પ્રયાસ કર્યો હતો. પરંતુ સતત બની રહેલી આ ઘટનાઓ સાબિત કરે છે કે કટ્ટરપંથી તત્વો હવે બેફામ બન્યા છે. આંતરરાષ્ટ્રીય સ્તરે માનવાધિકાર સંગઠનો આ સ્થિતિ પર ચિંતા વ્યક્ત કરી રહ્યા છે, તેમ છતાં જમીની સ્તરે હિન્દુ પરિવારોમાં ભયનો માહોલ વ્યાપેલો છે.
