
અયોધ્યા : દેશભરમા 6 એપ્રિલના રોજ રામનવમીની ઉજવણી કરવામા આવશે. જેની માટે ભગવાન રામના જન્મ સ્થળ અયોધ્યામા રામ નવમીએ રામ જન્મોત્સવ માટેની તૈયારીઓ પૂર્ણ કરી લેવામા આવી છે. રામનવમીની ઉજવણીના પગલે અયોધ્યાને શણગારવામા આવી છે. રામનવમીના દિવસે શોભાયાત્રા સહિત અનેક સાંસ્કૃતિક કાર્યક્રમોનું આયોજન કરવામાં આવ્યું છે. તેમજ અયોધ્યામાં રામનવમીના દિવસે 25 લાખથી વધુ શ્રદ્ધાળુઓ આવે તેવી શકયતા છે. જેના પગલે વહીવટીતંત્ર અને પોલીસે કડક સુરક્ષા વ્યવસ્થા કરી છે.
ભગવાન રામના જન્મ સાથે સંબંધિત ધાર્મિક વિધિઓની શ્રેણી શરૂ
રામનવમીની 6 એપ્રિલના રોજ ઉજવણી થવાની છે. જોકે, તે પૂર્વે રામ મંદિર સંકુલમાં 4 એપ્રિલથી ભગવાન રામના જન્મ સાથે સંબંધિત ધાર્મિક વિધિઓની શ્રેણી શરૂ થઈ ગઈ છે. અયોધ્યાના તમામ મંદિરોને પણ શણગારવામાં આવ્યા છે. રવિવારે શ્રદ્ધાળુઓ અયોધ્યામાં આવશે અને ભગવાન શ્રી રામની જન્મજયંતીમાં ભાગ લેશે. મહાકુંભ દરમિયાન દરરોજ 5 લાખથી વધુ ભક્તો અયોધ્યા આવતા હતા. જ્યારે 45 દિવસમાં લગભગ 1.75 કરોડ ભક્તોએ દર્શન કર્યા હતા.
અયોધ્યામાં ઘણી જગ્યાએ હોલ્ડિંગ એરિયા બનાવવામાં આવ્યા
અયોધ્યામાં શ્રદ્ધાળુઓને કોઈપણ પ્રકારની અસુવિધા ન થાય તે માટે તમામ તૈયારીઓ કરવામાં આવી છે. સમગ્ર મેળા વિસ્તારને ઝોન અને સેક્ટરમાં વિભાજિત કરવામાં આવ્યો છે. સુરક્ષાની વ્યાપક વ્યવસ્થા કરવામાં આવી છે. ઘણી જગ્યાએ બેરિકેડિંગ કરવામાં આવ્યું છે. અયોધ્યામાં ઘણી જગ્યાએ હોલ્ડિંગ એરિયા બનાવવામાં આવ્યા છે જેથી જ્યારે ભીડ વધે ત્યારે ભક્તોને હોલ્ડિંગ એરિયામાં રોકવામાં આવે અને ત્યાંથી શ્રદ્ધાળુઓને ધીમે ધીમે જવા દેવામા આવશે. જેથી ભક્તો સરળતાથી ભગવાનના દર્શન કરી શકે.
ભગવાન શ્રી રામને 4 મિનિટ માટે સૂર્ય તિલક રહેશે

રામ જન્મોત્સવ પર શ્રદ્ધાળુઓ સૂર્ય તિલકની આતુરતાથી રાહ જોઈ રહ્યા છે. આવતીકાલે બપોરે બરાબર ૧૨ વાગ્યે ભગવાન શ્રી રામની જન્મજયંતિ હશે. ભગવાન શ્રી રામના કુળદેવતા ભગવાન સૂર્ય પણ જન્મજયંતિ પર મર્યાદા પુરુષોત્તમ ભગવાન શ્રી રામને 4 મિનિટ માટે સૂર્ય તિલક રહેશે.
અભિષેક આવતીકાલે સવારે 9:30 વાગ્યે અયોધ્યામાં શરૂ થશે

અયોધ્યા રામમંદિરમા ભગવાન રામનો અભિષેક આવતીકાલે સવારે 9:30 વાગ્યે અયોધ્યામાં શરૂ થશે. 10.30 વાગ્યે દરવાજા બંધ કરવામાં આવશે અને ભગવાનનો શણગાર કાર્યક્રમ થશે, 10.50 વાગ્યે ભગવાન શ્રી રામનો અભિષેક અને શણગાર દર્શન થશે જેનું જીવંત પ્રસારણ કરવામાં આવશે. 11.50 વાગ્યે દરવાજા બંધ કરવામાં આવશે અને પ્રસાદની તૈયારીઓ કરવામાં આવશે. જ્યારે ભગવાનનો જન્મ બપોરે બરાબર 12:00 વાગ્યે થશે. ત્યારબાદ સૂર્ય તિલક અને શણગારની આરતી થશે. આ સમય દરમિયાન 56 ભોગપ્રસાદ ચઢાવવામાં આવશે.
સીસીટીવી અને ડ્રોન કેમેરા દ્વારા દેખરેખ
અયોધ્યામા લાખો ભક્તોના આગમનના કાર્યક્રમને ધ્યાનમાં રાખીને વ્યાપક સુરક્ષા વ્યવસ્થા કરવામાં આવી છે. અયોધ્યા પર સીસીટીવી અને ડ્રોન કેમેરા અને આધુનિક સુવિધાઓથી નજર રાખવામાં આવી રહી છે. આ માટે, એક યોગ્ય કંટ્રોલ રૂમ બનાવવામાં આવ્યો છે અને ત્યાંથી સીસીટીવી દ્વારા અયોધ્યા પર નજર રાખવામાં આવે છે. જો કોઈ પણ જગ્યાએ શંકાસ્પદ માહિતી મળે તો કંટ્રોલ રૂમમાંથી માહિતી મળતાં જ પોલીસ દળ ઘટનાસ્થળે પહોંચી જાય છે અને કાર્યવાહી કરે છે.
આપણ વાંચો: Ayodhya Ram Mandir: આ મુસ્લિમ અભિનેતાએ કહ્યું ‘રામ મારા નામમાં છે, હું જે કંઇ પણ છું એમના કારણે છું’