મંકીપોક્સનો ફફડાટઃ યુએઈથી કેરળ આવેલા નાગરિકમાં જોવા મળ્યા લક્ષણો, તપાસ ચાલુ
યુએઈથી કેરળ પરત ફરેલા ૩૮ વર્ષના પુરુષમાં મંકીપોક્સ (Monkeypox)ના લક્ષણો જોવા મળ્યા. દુનિયામાં હજી કોરોના વાયરસ રોગચાળામાંથી સંપૂર્ણ રીતે બહાર આવ્યું નથી અને આ દરમિયાન વધુ એક નવા વાયરસે દસ્તક આપી છે. મંકીપોક્સે વિશ્વના ઘણા દેશો માટે ખતરાની ઘંટડી વગાડી છે.
આરોગ્ય પ્રધાન વીણા જ્યોર્જે જણાવ્યું હતું કે મલપ્પુરમના એક ૩૮ વર્ષીય વ્યક્તિનું યુએઈથી પાછા ફર્યા પછી થયેલ પરીક્ષણ સકારાત્મક જોવાયું હતું. ફેસબુક પરની એક પોસ્ટમાં, જ્યોર્જે લોકોને સારવાર લેવાની વિનંતી કરી અને જો તેઓને કોઈ જાણીતા લક્ષણો દેખાય તો આરોગ્ય વિભાગને જાણ કરવી.
આરોગ્ય વિભાગની હોસ્પિટલોમાં સારવાર અને આઇસોલેશનની સુવિધાની વ્યવસ્થા કરવામાં આવી છે. નોડલ અધિકારીઓના ફોન નંબર પણ આપવામાં આવ્યા છે. આ ઉપરાંત તમામ મેડિકલ કોલેજોમાં સારવારની સુવિધાની વ્યવસ્થા કરવામાં આવી છે.
આપણ વાંચો: મંકીપોક્સ વાઇરસ શું છે તેનાં લક્ષણો? કેવી રીતે ફેલાય છે?
કેન્દ્ર સરકારે આ પ્રથમ કેસની પુષ્ટિ કરી છે. કેન્દ્રીય સ્વાસ્થ્ય મંત્રાલયે તમામ રાજ્યો અને કેન્દ્રશાસિત પ્રદેશોને એમપીઓક્સને લઈને સાવચેતી રાખવા માટે એક એડવાઈઝરી પણ જારી કરી છે.
દિલ્હીમાં મંકીપોક્સથી પીડિત દર્દીઓની સારવાર માટે લોક નાયક હોસ્પિટલ અને બાબા સાહેબ આંબેડકર હોસ્પિટલમાં વિશેષ વોર્ડ બનાવવામાં આવ્યા છે. આ સિવાય એઈમ્સ અને સફદરજંગમાં મંકીપોક્સના દર્દીઓ માટે વોર્ડ પણ અનામત રાખવામાં આવ્યા છે.
એમપોક્સ અથવા મંકી પોક્સ આફ્રિકાથી ફેલાયો છે અને હવે તે વિશ્વના ૭૦ થી વધુ દેશોમાં પ્રસર્યો છે. મંકી પોક્સના કારણે અત્યાર સુધીમાં ૬૦૦ લોકોના જીવ ગયા હોવાનું કહેવાય છે. આ જોખમને કારણે વર્લ્ડ હેલ્થ ઓર્ગેનાઈઝેશને છેલ્લે ૨૦૨૩માં વૈશ્વિક કટોકટીની સ્થિતિ જાહેર કરી હતી.
