મુંબઇ : ઉદ્યોગપતિ અનિલ અંબાણીએ(Anil Ambani)લાંબા સમય પછી એક પછી એક મજબૂત નિર્ણય લઈને બજારને ચોંકાવી રહ્યા છે. હવે અનિલ અંબાણીની આગેવાની હેઠળની રિલાયન્સ જૂથની કંપનીઓ રિલાયન્સ ઈન્ફ્રાસ્ટ્રક્ચર લિમિટેડ અને રિલાયન્સ પાવર લિમિટેડે જાહેરાત કરી છે કે તે બજારમાંથી રૂપિયા 17,600 કરોડ એકત્ર કરશે અને શૂન્ય દેવા સાથે તેના બિઝનેસ વિસ્તરણ વ્યૂહરચનાનો અમલ કરશે. બંને કંપનીઓએ છેલ્લા બે સપ્તાહમાં ઇક્વિટી શેરના પ્રેફરન્શિયલ ઇશ્યૂ દ્વારા રૂપિયા 4,500 કરોડ અને પ્રખ્યાત વૈશ્વિક રોકાણ કંપની વર્ડે પાર્ટનર્સ પાસેથી લાંબા ગાળાની ઇક્વિટી લિંક્ડ FCCB દ્વારા રૂપિયા 7,100 કરોડ એકત્ર કરવાની જાહેરાત કરી છે. તેમની પાકતી મુદત 10 વર્ષ છે અને વ્યાજ દર પાંચ ટકા છે.
QIP દ્વારા રૂ. 6,000 કરોડ એકત્ર કરવામાં આવશે
ક્વોલિફાઇડ ઇન્સ્ટિટ્યૂશનલ પ્લેસમેન્ટ (QIP) દ્વારા વધારાના રૂપિયા 6,000 કરોડ એકત્ર કરવામાં આવશે. આમાં રિલાયન્સ પાવર અને રિલાયન્સ ઈન્ફ્રાસ્ટ્રક્ચરનું લક્ષ્ય રૂપિયા 3,000 કરોડ એકત્ર કરવાનું છે. એકવાર રિઝોલ્યુશન ફાઇનલ થઈ જાય પછી મહિનાના અંત સુધીમાં શેરધારકોની મંજૂરી અપેક્ષિત છે એમ અધિકારીઓએ જણાવ્યું હતું. જૂથના એક વરિષ્ઠ અધિકારીએ જણાવ્યું હતું કે રિલાયન્સ જૂથની ઇક્વિટી અથવા ઇક્વિટી-લિંક્ડ લાંબા ગાળાના બોન્ડ્સ દ્વારા મૂડી એકત્ર કરવાની વ્યૂહરચના જૂથ કંપનીઓને તેમની વિસ્તરણ યોજનાઓ માટે જરૂરી વૃદ્ધિ મૂડી પ્રદાન કરશે.
50,000 કરોડના રોકાણનો અવકાશ હશે
માત્ર 70:30 નો ડેટ ટુ ઇક્વિટી રેશિયો હોવા છતાં ઇક્વિટી અથવા ઇક્વિટી લિંક્ડ બોન્ડ દ્વારા માત્ર રૂપિયા 17,000 કરોડ એકત્ર કરવાથી ગ્રૂપ કંપનીઓને આગામી કેટલાક વર્ષોમાં તેમની બિઝનેસ યોજનાઓ માટે રૂપિયા 50,000 કરોડનું રોકાણ કરવાનો અવકાશ મળશે. આ ધિરાણ પછી બંને કંપનીઓની નેટવર્થ લગભગ 25,000 કરોડ રૂપિયા થશે. તાજેતરમાં, અનિલ અંબાણીની આગેવાની હેઠળના રિલાયન્સ જૂથે ભૂટાનમાં પ્રવેશની જાહેરાત કરી હતી અને કહ્યું હતું કે તે પાડોશી દેશમાં 1,270 મેગાવોટના સૌર અને હાઇડ્રો પાવર પ્રોજેક્ટ્સ સ્થાપશે.
એક નિવેદનમાં, જૂથે ભૂટાન સરકારની વાણિજ્યિક અને રોકાણ શાખા, ડ્રુક હોલ્ડિંગ એન્ડ ઇન્વેસ્ટમેન્ટ્સ લિમિટેડ (DHI)સાથે વ્યૂહાત્મક ભાગીદારી કરાર કરવા વિશે માહિતી આપી હતી. તેનો ઉદ્દેશ્ય ભૂટાનના રિન્યુએબલ અને ગ્રીન એનર્જી લેન્ડસ્કેપમાં રોકાણને પ્રોત્સાહન આપવાનો છે. રિલાયન્સ ગ્રૂપ અને ડ્રુક હોલ્ડિંગ વચ્ચેની ભાગીદારી ગ્રીન એનર્જી જનરેશન, ખાસ કરીને સૌર અને હાઇડ્રો પાવર પહેલ પર ધ્યાન કેન્દ્રિત કરીને નવીન ગ્રીન ટેકનોલોજીની શોધ કરશે.
