NDA કે I.N.D.I.A.: આવતી ચૂંટણીમાં આ નક્કી કરશે દેશના 97 કરોડ મતદાર

નવી દિલ્હીઃ લોકશાહીનું પર્વ એટલે ચૂંટણી અને મતદાન. મતદાનને ભારતીય બંધારણમાં હક અને ફરજ બન્ને કહ્યા છે ત્યારે દેશના લગભગ 140 કરોડ નાગરિકોમાંથી 97 કરોડ નાગરિક મતદાન કરવા માટે પાત્ર છે. ભારતના ચૂંટણી પંચે આજે જાહેરાત કરી છે કે આ વર્ષની લોકસભા ચૂંટણીમાં અંદાજે 97 કરોડ લોકો મતદાન કરવા માટે પાત્ર ગણાશે. આ સાથે પંચે એમ પણ કહ્યું હતું કે 18 થી 29 વર્ષની વયજૂથના બે કરોડથી વધુ મતદારો મતદાર યાદીમાં ઉમેરાયા છે. છેલ્લી લોકસભા ચૂંટણી 2019 થી નોંધાયેલા મતદારોમાં છ ટકાનો વધારો થયો છે.

ચૂંટણી પંચે કહ્યું કે ભારતમાં વિશ્વમાં સૌથી વધુ મતદારો છે. ભારતમાં આગામી સામાન્ય ચૂંટણીઓ માટે મતદાન કરવા માટે 96.88 કરોડ લોકો નોંધાયેલા છે. મુખ્ય ચૂંટણી કમિશનર રાજીવ કુમારે પુણેમાં એક પ્રેસ કોન્ફરન્સમાં કહ્યું હતું કે દરેક તબક્કામાં રાજકીય પક્ષોની ભાગીદારી સાથે, મતદાર યાદીમાં પણ તમામ કાર્યોનો પણ ઉલ્લેખ કરવામાં આવ્યો છે.

ચૂંટણી પંચના જણાવ્યા અનુસાર, 1 કરોડ 65 લાખ 76 હજાર 654 મૃતકો ઉપરાંત જેઓ અન્ય જગ્યાએ શિફ્ટ થયા છે અને ડુપ્લિકેટ મતદારોને પણ યાદીમાંથી દૂર કરવામાં આવ્યા છે. જેમાં 67 લાખ 82 હજાર 642 મૃત મતદારો, 75 લાખ 11 હજાર 128 ગેરહાજર મતદારો અને 22,5,685 ડુપ્લિકેટ મતદારોનો સમાવેશ થાય છે.

આ જ રીતે આ વખતે મતદાર યાદીમાં 2.63 કરોડથી વધુ નવા મતદારો ઉમેરાયા છે. જેમાં અંદાજે 1.41 કરોડ મહિલાઓનો સમાવેશ થાય છે અને 1.22 કરોડ પુરુષ મતદારોનો સમાવેશ થાય છે. મતદાર ડેટાબેઝમાં લગભગ 88.35 લાખ વિકલાંગ મતદારો નોંધાયેલા છે. 17 વર્ષથી વધુ ઉંમરના 10.64 લાખ યુવાનોએ મતદાર યાદીમાં નામ ઉમેરવા માટે અરજી કરી હતી. તેમાં એવા યુવાનોનો સમાવેશ થાય છે જેઓ ત્રણ તારીખે 18 વર્ષની ઉંમર પૂર્ણ કરે છે: 1 એપ્રિલ, 1 જુલાઈ અને 1 ઓક્ટોબર આ તારીખો છે.

દેશમાં મતદારો પોતાનું અને દેશનું આગલા પાંચ વર્ષનું ભાવિ ઘડે છે ત્યારે આ તમામ પોતાનો હક અદા કરી ફરજ નિભાવે અને સમજી વિચારી યોગ્ય ઉમેદવારને મત આપે તે જરૂરી છે.