થાણે: પ્રેમી સાથે મળીને પત્નીએ ગળું દબાવી પતિની કથિત હત્યા કર્યા બાદ તેના મૃતદેહને નદીમાં ફેંક્યો હોવાની આંચકાજનક ઘટના પ્રકાશમાં આવી હતી. બદલાપુરમાં બનેલી આ ઘટનામાં મૃતકની પત્ની પ્રેમી સાથે રફુચક્કર થઈ ગઈ હોવાનું પોલીસનું કહેવું છે.
સિનિયર ઈન્સ્પેક્ટર કિશોર શિંદેએ જણાવ્યું હતું કે ગુરુવારે બનેલી આ ઘટનામાં ફરાર બન્ને આરોપીની શોધ ચલાવાઈ રહી છે. આરોપીઓની ઓળખ મનીષા પરમાર અને લક્ષ્મણ ભોઈર (36) તરીકે થઈ હતી.
બદલાપુરમાં રહેતા ભોઈરને પડોશમાં રહેતી મનીષા સાથે અફૅર હતું. આ વાતની જાણ મનીષાના પતિ કિસન પરમાર (44)ને થઈ હતી. આ બાબતે ખુલાસો કરવા કિસને મનીષાની પૂછપરછ કરી હતી. આડા સંબંધો ઉઘાડા પડી જતાં દંપતી વચ્ચે વિવાદ થયો હતો.
તપાસ દરમિયાન પોલીસને જાણવા મળ્યું હતું કે આરોપીઓએ રસ્સીની મદદથી ગળું દબાવી કિસનની હત્યા કરી હતી. બાદમાં તેના મૃતદેહને ચાદરમાં વીંટાળી બદલાપુરની નદીમાં ફેંકી દીધો હતો.
ઘટના બાદ બન્ને આરોપી ફરાર થઈ ગયા હતા. પોલીસને ગુરુવારની રાતે કિસનનો મૃતદેહ નદીકિનારેથી મળી આવ્યો હતો. પોસ્ટમોર્ટમ માટે મૃતદેહને સરકારી હૉસ્પિટલમાં મોકલી દેવાયો હતો. આ પ્રકરણે પોલીસે હત્યાનો ગુનો નોંધી વધુ તપાસ હાથ ધરી હતી. (પીટીઆઈ)
