આઇપીએલનું ટાઇટલ સ્પોન્સર કોણ? બીસીસીઆઇએ શોધ આરંભી

મુંબઇઃ ભારતીય ક્રિકેટ કંટ્રોલ બોર્ડ (BCCI) ઇન્ડિયન પ્રીમિયર લીગ (IPL) માટે ટાઇટલ સ્પોન્સર શોધી રહ્યું છે. આ માટે બીસીસીઆઈએ કડક શરતો સાથે માળખું તૈયાર કર્યું છે. આ વખતે, ચીની કંપનીઓ અથવા બ્રાન્ડ્સ IPL ટાઇટલ સ્પોન્સર માટે હરાજીમાં ભાગ લઈ શકશે નહીં. ચાઈનીઝ ઉપરાંત એવા દેશોની કંપનીઓ કે બ્રાન્ડ જેની સાથે ભારતના આરામદાયક સંબંધો નથી તેઓ IPLના ટાઈટલ સ્પોન્સર બની શકશે નહીં.

મળતા સમાચાર અનુસાર IPL ટાઇટલ સ્પોન્સર માટે રિઝર્વ પ્રાઇસ 360 કરોડ રૂપિયા રાખવામાં આવી છે. આ સિવાય સટ્ટાબાજી, ફૅન્ટેસી ગેમ્સ, સ્પોર્ટસવેર, આલ્કોહોલ પ્રોડક્ટ્સ અને ક્રિપ્ટોકરન્સી સાથે સંબંધિત કંપનીઓ IPL ટાઇટલ સ્પોન્સર માટે હરાજીમાં ભાગ લઈ શકશે નહીં. જો આવી કંપનીઓ અથવા બ્રાન્ડ્સ સાથે કોઈ સીધું કનેક્શન ન હોય તો પણ BCCIએ આ કંપનીઓ અને બ્રાન્ડ્સ સામે કડક કાર્યવાહી કરી છે અને તેમને IPLના ટાઇટલ સ્પોન્સર બનવા માટે પરવાનગી નથી આપવામાં આવી.

નોંધનીય છે કે ગત સિઝન સુધી ટાટા આઈપીએલ ટાઈટલ સ્પોન્સર હતા, પરંતુ હવે આ કોન્ટ્રાક્ટ ખતમ થઈ ગયો છે. તેથી હવે BCCI નવા ટાઈટલ સ્પોન્સરની શોધમાં છે. આ સ્પોન્સર આગામી 5 વર્ષ સુધી IPLનો ટાઈટલ સ્પોન્સર રહેશે. એટલે કે, આ કરાર IPL 2024થી લાગુ થશે અને IPL 2028 સુધી ચાલશે. આ માટે BCCIએ વાર્ષિક 360 કરોડ રૂપિયાની અનામત કિંમત નક્કી કરી છે. અગાઉ Vivo જેવી ચીની કંપની IPLની ટાઈટલ સ્પોન્સર રહી છે, પરંતુ હવે ચીની કંપનીઓ કે બ્રાન્ડ્સ માટે IPLના ટાઈટલ સ્પોન્સર બનવાનો રસ્તો બંધ થઈ ગયો છે. આઇપીએલના ટાઇટલ સ્પોન્સર બનવા માટે બીસીસીઆઈએ કડક શરતો સાથે તેની માર્ગદર્શિકા તૈયાર કરી છે. જે પણ કંપની IPLની ટાઈટલ સ્પોન્સર બનવા માગતી હોય તેણે આ કડક શરતોનું પાલન કરવું જ પડશે.