પાણીની મોટી પાઇપ ફાટવાથી બાંદ્રા, ખાર, સાંતાક્રુઝમાં પુરવઠો ખોરવાયો
મુંબઇઃ લકી જંકશન નજીક SV રોડ પર પાણીની એક પાઇપ લાઇન ફાટવાને કારણે બાંદ્રા, ખાર અને સાંતાક્રુઝ સહિત મુંબઈના કેટલાક ઉપનગરોમાં પાણી પુરવઠો કામચલાઉ બંધ થઈ ગયો છે, એમ નાગરિક અધિકારીઓએ આજે જાહેર કર્યું હતું.
બૃહન્મુંબઈ મ્યુનિસિપલ કોર્પોરેશન (BMC) એ એક અખબારી નિવેદન બહાર પાડ્યું છે, જેમાં ટાટા એગિયારીની બહાર હિલ રોડ, બાન્દ્રા ખાતે જૂના 600 મીમી વ્યાસના ઇનલેટમાં મોટું ગાબડું હોવાની જાણકારી મળી હતી. ત્યાર બાદ તુરંત જ ઇમરજન્સી રિપેર ટીમો રવાના કરવામાં આવી છે અને સમારકામ શરૂ કરવામાં આવ્યું છે. BMCના વોટરવર્કસ અને મેન્ટેનન્સના આસિસ્ટન્ટ એન્જિનિયર હાલમાં સમારકામની દેખરેખ રાખી રહ્યા છે.
આ પણ વાંચો : Kurla Accident: નોકરીનો પહેલો દિવસ જીવનનો અંતિમ દિવસ બન્યો, તો નાઈટશિફ્ટ..
બીએમસીએ જણાવ્યું હતું કે ખાર દાંડા ઝોનમાં સાંજે 5:30 વાગ્યા સુધીમાં અને ડૉ. આંબેડકર ઝોનમાં 10 વાગ્યા સુધીમાં પાણી પુરવઠો ફરી શરૂ થવાની ધારણા છે. જોકે, તેઓ આસપાસના પાઇપના લિકેજની પણ તપાસ કરી રહ્યા છે, તેથી જો અન્ય કોઇ જગ્યાએ લિકેજ જોવા મળશે તો પાણી પુરવઠો શરૂ કરવામાં વિલંબ થઇ શકે છે, એમ પણ બીએમસીએ જણાવ્યું હતું.
BMCએ બાંદ્રા પશ્ચિમના રહેવાસીઓને સમારકામના સમયગાળા દરમિયાન પાણી સાચવીને વાપરવા જણાવ્યું છે.