(અમારા પ્રતિનિધિ તરફથી)
મુંબઈ: જામનગર સ્થિત પશુ પુનર્વસન કેન્દ્ર, વનતારાએ બુધવારે મહારાષ્ટ્ર સરકાર અને જૈન મઠ સાથે ગાઢ સંકલનમાં કામ કરીને હાથણી માધુરી (જેને મહાદેવી પણ કહેવાય છે) માટે કોલ્હાપુર જિલ્લાના નંદની ખાતે સેટેલાઇટ પુનર્વસન કેન્દ્ર સ્થાપવાનો પ્રસ્તાવ મૂક્યો છે.
મુખ્ય પ્રધાન દેવેન્દ્ર ફડણવીસે, બુધવારે સવારે મુંબઈમાં વનતારાની ટીમ સાથે વ્યાપક ચર્ચા કરી હતી, તેમણે કહ્યું હતું કે વનતારાની ટીમે તેમને એવી ખાતરી આપી હતી કે તેઓ સુપ્રીમ કોર્ટ સમક્ષ હાથીને મઠમાં સરળતાથી પાછા લાવવા માટેની રાજ્ય સરકારની અરજીમાં જોડાવા માટે તૈયાર છે.
વનતારાની ટીમે કહ્યું હતું કે તેઓ ફક્ત સુપ્રીમ કોર્ટના આદેશ પર જ કાર્ય કરી રહ્યા છે અને માધુરીનો કબજો મેળવવાનો તેમનો કોઈ ઇરાદો નથી. ટીમે રાજ્ય વન વિભાગ દ્વારા પસંદ કરાયેલી જગ્યા કોલ્હાપુર નજીકના નંદનીમાં માધુરી માટે પુનર્વસન કેન્દ્ર બનાવવાની પણ તૈયારી દર્શાવી હતી, એમ ફડણવીસે જણાવ્યું હતું.
બીજી તરફ એક નિવેદન જાહેર કરીને વનતારાએ જણાવ્યું હતું કે તેઓ નંદની વિસ્તારમાં માધુરી માટે સેટેલાઇટ પુનર્વસન કેન્દ્ર સ્થાપવા માટે જૈન મઠ અને રાજ્ય સરકાર સાથે ગાઢ સંકલનમાં કામ કરવાનો પ્રસ્તાવ મૂકે છે.
‘પ્રસ્તાવિત સુવિધા સ્થાપિત કરવા માટે પ્રાણી કલ્યાણ માર્ગદર્શિકાનું પાલન કરવામાં આવશે, ઉચ્ચ સ્તરીય સમિતિના નિષ્ણાતો સાથે પરામર્શ અને મઠની સર્વસંમતિ પછી, જ્યારે હાથીની સંભાળમાં આંતરરાષ્ટ્રીય શ્રેષ્ઠ પ્રથાઓ સાથે સંરેખિત હશે,’ એમ વનતારાએ જણાવ્યું હતું.
આપણ વાંચો: મહારાષ્ટ્રની ‘માધુરી’ હવે ગુજરાત જશે? કોર્ટમાં પહોંચેલો મામલા અંગે જાણો?
‘જૈન મઠ અને કોલ્હાપુરના લોકો માટે માધુરી જે ધાર્મિક અને સાંસ્કૃતિક મહત્વ ધરાવે છે તે બાબતને વનતારા સ્વીકારે છે. દાયકાઓથી, માધુરી આધ્યાત્મિક પ્રથાઓ અને સ્થાનિક લોકોના જીવનનો એક અભિન્ન ભાગ રહી છે,’ એમ પણ તેમાં કહેવામાં આવ્યું છે.
માધુરીને નંદનીથી સ્થાનાંતરિત કરવાનો નિર્ણય ન્યાયિક સત્તા હેઠળ લેવામાં આવ્યો હતો અને વનતારાની ભૂમિકા ફક્ત એક સ્વતંત્ર બચાવ અને પુનર્વસન કેન્દ્ર તરીકે સંભાળ, પશુચિકિત્સા સહાય અને રહેઠાણ પૂરું પાડવાની હતી, એવી સ્પષ્ટતા વનતારા દ્વારા કરવામાં આવી છે.
‘કોર્ટની મંજૂરીને આધીન, વનતારા માધુરી સલામત અને ગૌરવપૂર્ણ પાછા ફરવા માટે સંપૂર્ણ તકનીકી અને પશુચિકિત્સા સહાય પૂરી પાડશે,’ એમ પણ નિવેદનમાં કહેવામાં આવ્યું છે.
નંદની ખાતેના પ્રસ્તાવિત કેન્દ્રમાં સાંધા અને સ્નાયુઓની રાહત માટે એક વિશિષ્ટ હાઇડ્રોથેરાપી તળાવ, સ્વિમિંગ અને કુદરતી હિલચાલ માટે બીજો મોટો જળાશય, શારીરિક પુનર્વસન માટે લેસર થેરપી અને સારવાર ખંડ અને આરામ અને રક્ષણ માટે આવરી લેવામાં આવેલ રાત્રિ આશ્રયનો સમાવેશ કરવામાં આવશે એમ પણ તેમણે જણાવ્યું હતું.
‘જો અમારી સંડોવણી, ફક્ત કોર્ટના નિર્દેશો હેઠળ કરવામાં આવી હોવા છતાં, જૈન સમુદાય અથવા કોલ્હાપુરના લોકોને કોઈ તકલીફ પહોંચાડી હોય, તો અમે અમારા દિલથી દિલગીરી વ્યક્ત કરીએ છીએ,’ એમ પણ વનતારાએ આ નિવેદનમાં જણાવ્યું છે.
