મુંબઈ મેટ્રો 4: સપ્ટેમ્બરમાં ટ્રાયલ રન, મીરા-ભાઈંદર સુધીની મુસાફરી થશે સરળ
મુંબઈઃ મુંબઈમાં હાલ મેટ્રો નેટવર્કનું જાળું પથરાઈ રહ્યું છે. બહુપ્રતિક્ષિત ગ્રીન લાઈન મેટ્રો 4નું કામ પણ પુરજોશમાં ચાલી રહ્યું છે. મહારાષ્ટ્રના નાયબ મુખ્ય પ્રધાન એકનાથ શિંદેએ જાહેરાત કરી હતી કે મુંબઈ મેટ્રો લાઈન 4 માટે ટ્રાયલ રન સપ્ટેમ્બરમાં શરૂ થશે.
તે વર્ષના અંત સુધીમાં કાર્યરત થવાની અપેક્ષા છે. થાણે મ્યુનિસિપલ કોર્પોરેશન દ્વારા આયોજિત 31મી વર્ષા મેરેથોનમાં શિંદેએ આ જાહેરાત કરી હતી. વડાલાથી કપુરબાવડીને જોડતા કોરિડોરને મેટ્રો-4A તરીકે ગાયમુખ સુધી લંબાવવામાં આવ્યો છે.
આ મેટ્રો લાઇનને મીરા-ભાયંદર (મેટ્રો-10) સાથે પણ જોડવામાં આવી રહી છે. અહીંથી તે મુંબઈની અન્ય મેટ્રો લાઇન સાથે જોડાશે. આનાથી મેટ્રોપોલિટન વિસ્તારના લોકો સરળ અને ટ્રાફિક-મુક્ત મુસાફરી કરી શકશે.
એકનાથ શિંદેએ જણાવ્યું હતું કે, ‘થાણેની ઇન્ટરનલ મેટ્રો લાઇનનું કામ ચાલી રહ્યું છે, જેમાં મેટ્રો-4 સાથે ઇન્ટરચેન્જ સ્ટેશનોનો સમાવેશ થાય છે, જે દૂરના વિસ્તારો સુધી કનેક્ટિવિટી પ્રદાન કરશે. થાણે અને આસપાસના વિસ્તારોના મુસાફરોને આનો લાભ મળશે.’
શિંદેએ અગાઉ કહ્યું હતું કે ગાયમુખ-માજીવાડા સેક્શન (મેટ્રો લાઇન-4 ભાગ અને 4A) પર ટ્રાયલ રન વર્ષના અંત પહેલા શરૂ થશે. જોકે, વિપક્ષી નેતાઓ હવે આ સમયમર્યાદા પર સવાલ ઉઠાવી રહ્યા છે. ખાસ કરીને ઘોડબંદર સેક્શન અને મોગરપાડા કાર શેડના બાંધકામમાં વિલંબ પર પ્રશ્નો ઊભા થઈ રહ્યા છે.
પંતનગર-ઘાટકોપર પર કેટલું કામ થયું છે?
MMRDA અધિકારીઓએ જણાવ્યું હતું કે આ કોરિડોરનું 85 ટકા કામ પૂર્ણ થઈ ગયું છે. આ અઠવાડિયાના અંત સુધીમાં પંતનગર-ઘાટકોપર બસ સ્ટેશન પર 58-મીટરનો સ્ટીલ સ્પાન મૂકવામાં આવશે.
ડેપોનું કામ પૂર્ણ થવાની રાહ જોયા વિના ટ્રાયલ રન અને પ્રી-ઓપરેશનલ કાર્ય હાથ ધરવા માટે, મંડાલે ડેપો (લાઇન 2B) થી લાઇન 4 પર ગાયમુખ અને કેડબરી જંક્શન વચ્ચેના એલિવેટેડ સેક્શનમાં 48 મેટ્રો કોચ ખસેડવાની યોજના છે.
આ સાથે, શિંદેએ ગુજરાત, નાસિક અને JNPT તરફથી આવતા માલ અને બહાર જતા ટ્રાફિકને મુંબઈ ફ્રીવે એક્સટેન્શન અને કોસ્ટલ રોડ દ્વારા રિડાયરેક્ટ કરીને થાણેના રસ્તાઓ પર ભીડ ઓછી કરવાની યોજનાઓની વિગતવાર ચર્ચા કરી હતી.
થાણે મ્યુનિસિપલ કમિશનર સૌરભ રાવને મુખ્ય પ્રધાન તરીકેના તેમના કાર્યકાળ દરમિયાન બહાર પાડવામાં આવેલા 3,000 કરોડ રૂપિયાના બજેટનો ઉપયોગ થાણેની ‘તળાવોના શહેર’ તરીકેની ઓળખ જાળવી રાખવા, ગ્રીન ઝોન બનાવવા અને ખાડામુક્ત રસ્તાઓ સુનિશ્ચિત કરવા માટે કરવા નિર્દેશ આપ્યો હતો.
આ પણ વાંચો…ગૂડ ન્યૂઝ: મુંબઈ મેટ્રો-3 નો છેલ્લો તબક્કો આ મહિને શરૂ!
