થાણેમાં પાણી બિલ નહીં ભરનારા ડિફોલ્ટરો માટે અભય યોજના એકી સાથે બિલ ભરનારાઓને દંડ અને વ્યાજમાં ૧૦૦ ટકા રાહત
(અમારા પ્રતિનિધિ તરફથી)
થાણે: થાણે મહાનગરપાલિકા વિસ્તારમાં ઘરમાં વાપરવામાં આવતા પાણીના બાકી રહેલા બિલ સહિત ચાલુ વર્ષના બિલ એકી સાથે ભરનારા નાગરિકોને દંડ અને વ્યાજમાં ૧૦૦ ટકાની માફી આપવાની જાહેરાત થાણે પાલિકા કમિશનર સૌરભ રાવે કરી છે.
થાણે પાલિકામાં પાણીનું જોડાણ ધરાવતા અનેક નાગરિકોએ લાંબા સમયથી પાણીના બિલ ભર્યા ન હોવાનું જણાઈ આવ્યું છે. તેથી બાકી રહેલા પાણીના બિલ પર ૧૦૦ ટકાની છૂટ આપીને નાગરિકોને આર્થિક રાહત આપવાની આ યોજનાનો લાભ લેવાની અપીલ પણ પાલિકા કમિશનરે કરી છે.
થાણે મહાનગરપાલિકાએ પાણીના બાકી રહેલા બિલ વસૂલ કરવા માટેની ઝુંબેશ હાથ ધરી છે. જે નાગરિકો પાણીના બિલ ભર્યા નથી એવા ડિફોલ્ટરોના નળના જોડાણ ખંડિત કરવાની, મીટર રૂમ સીલ કરવા અને પમ્પ જપ્ત કરવા જેવી કાર્યવાહી કરવામાં આવવાની છે.
તેથી તાત્કાલિક ધોરણે નાગરિકોએ આ બિલ ભરી નાખવાના રહેશે. પાલિકાની યોજના પહેલી ડિસેમ્બર, ૨૦૨૫થી ૩૧ માર્ચ, ૨૦૨૬ સુધીના સમયગાળા માટે રહેશે. આ યોજનાનો લાભ લઈને બાકી રહેલા બિલ અને ચાલુ બિલની રકમ એકી સાથે ભરીનો એડમિનિસ્ટ્રેશન ફીી સહિત દંડ અને વ્યાજમાં ૧૦૦ ટકા છૂટ મળવાની છે.
