થાણે: થાણે જિલ્લામાં ઝવેરી સાથે 27.5 લાખ રૂપિયાની છેતરપિંડી આચરવા બદલ પોલીસે ભાયંદરના શખસની ધરપકડ કરી હતી. આરોપીએ જુલાઇમાં ઓનલાઇન રિયલ એસ્ટેટ માર્કેટ પ્લેસ મારફત 57 વર્ષના ઝવેરી સાથે મિત્રતા કરી હતી અને ફ્લેટ ખરીદવા માટે એડવાન્સ પેમેન્ટ તરીકે 66 લાખ રૂપિયાનો ચેક આપીને તેનો વિશ્ર્વાસ સંપાદન કર્યો હતો.
બાદમાં આરોપીએ કોઇ પણ ચુકવણી કર્યા વિના ઝવેરી પાસેથી 27.5 લાખ રૂપિયાના દાગીના ખરીદ્યા હતા અને પછી મિલકતના સોદા માટે જારી કરેલા માટે સ્ટોપ-પેમેન્ટની સૂચના આપી હતી, એમ પોલીસ અધિકારીએ જણાવ્યું હતું.
દરમિયાન ઝવેરીએ આ પ્રકરણે ભાયંદર પોલીસમાં ફરિયાદ નોંધાવી હતી, જેને આધારે પોલીસે 16 સપ્ટેમ્બરે આરોપી વિરુદ્ધ ગુનો દાખલ કર્યો હતો.
આપણ વાચો: 2000 રોકાણકાર સાથે 4.41 કરોડની છેતરપિંડી: મહિલા સહિત બે વિરુદ્ધ ગુનો
આરોપી ધરપકડથી બચવા માટે પોતાની ઓળખ છુપાવીને વારંવાર પોતાનાં ઠેકાણાં બદલતો હતો. તે દિલ્હી, નોઇડા અને મુંબઈમાં છુપાયો હતો. આખરે પોલીસે 27 સપ્ટેમ્બરે તેને થાણેની હોટેલમાં શોધી કાઢ્યો હતો અને તેની ધરપકડ કરવામાં આવી હતી. આરોપી વિરુદ્ધ 2000થી મુંબઈ અને થાણેમાં છેતરપિંડીના અમુક ગુના નોંધાયેલા છે. (પીટીઆઇ)
