થાણેમાં એલિવેટેડ અને ભૂગર્ભ રોડ નેટવર્ક, ગ્રીન થાણેની સફર: નાયબ મુખ્ય પ્રધાન એકનાથ શિંદે
(અમારા પ્રતિનિધિ તરફથી)
મુંબઇ: મુંબઈથી આવનારા ફ્રીવે પરથી ઉતર્યા પછી આનંદનગર-સાકેત-ગાયમુખ-ફાઉન્ટેન હોટેલ સુધી એક એલિવેટેડ રોડ બનાવવામાં આવી રહ્યો છે. ઉપરાંત, ટીકુજી-ની-વાડીથી બોરીવલી સુધીનો ભૂગર્ભ રોડ બનાવવામાં આવી રહ્યો છે અને આ રોડ ભવિષ્યમાં આ અંતર માત્ર દસથી પંદર મિનિટમાં કાપવામાં મદદ કરશે.
હાલમાં, મીરા-ભાયંદરથી બોરીવલી સુધી મુસાફરી કરવામાં બે થી અઢી કલાક લાગે છે. આ બંને પ્રોજેક્ટ ટ્રાફિક ભીડ ઘટાડશે અને થાણેના વિકાસને વેગ આપશે એમ નાયબ મુખ્ય પ્રધાન એકનાથ શિંદેએ જણાવ્યું હતું.
રાજમાતા જીજાઉ ઉદ્યાન ‘ઓક્સિજન પાર્ક’નું ઉદ્ઘાટન એકનાથ શિંદે દ્વારા કરવામાં આવ્યું હતું. તેમણે થાણેના વાગલે એસ્ટેટ વિસ્તારમાં જય ભવાની નગરમાં નવનિર્મિત આનંદ દિઘે પાર્કનું પણ ઉદ્ઘાટન કર્યું હતું.
પરિવહન પ્રધાન પ્રતાપ સરનાઈક, સાંસદ નરેશ મ્હસ્કે, વિધાનસભ્ય રવિન્દ્ર ફાટક, ભૂતપૂર્વ મેયર હરિશ્ર્ચંદ્ર પાટીલ, કમિશનર સૌરભ રાવ સહિત અન્ય અધિકારીઓ, પદાધિકારીઓ અને નાગરિકો કાર્યક્રમમાં મોટી સંખ્યામાં હાજર રહ્યા હતા.
શિંદેએ કહ્યું હતું કે થાણે ઝડપથી વિકાસ કરી રહ્યું છે. જો આપણને સારા અધિકારીઓ મળે, તો જિલ્લાનું પરિવર્તન થવામાં લાંબો સમય લાગશે નહીં. મોટા શહેરોમાં મોટા પાયે વૃક્ષારોપણ જરૂરી છે. મેં કમિશનરને એક લાખ વૃક્ષારોપણ કરવાની સૂચના આપી હતી, તેમણે એક લાખ પચીસ હજાર વૃક્ષારોપણ કર્યા. આ વર્ષે, જ્યારે તેમને બે લાખ વૃક્ષારોપણ કરવાનું સૂચન કરવામાં આવ્યું હતું, ત્યારે તેમણે બે લાખ નવ હજાર વૃક્ષારોપણ કર્યા છે.
આપણ વાંચો: ઈસ્ટર્ન ફ્રી વેથી ગ્રાન્ટ રોડ સુધીના એલિવેટેડ રોડ માટે પાલિકાએ બહાર પાડ્યા ટેન્ડર
મુમ્બ્રા ટેકરીઓ પર વૃક્ષોના વિકાસ અને નાગરિકો તેમના ‘જન્મદિવસ’ ઉજવી રહ્યા છે તેનો ઉલ્લેખ કરતાં તેમણે પર્યાવરણપ્રેમી સમુદાયની પ્રશંસા કરી.
‘વિદર્ભ અને મરાઠવાડામાં પૂર એ વાતાવરણ પરિવર્તનનો સંકેત છે. તે વિસ્તારોના ખેડૂતોને મદદ કરવા માટે 32,000 કરોડ રૂપિયાનું પેકેજ જાહેર કરવામાં આવ્યું છે, અને અત્યાર સુધીમાં 3.5 થી 4,000 કરોડ રૂપિયા તેમના ખાતામાં જમા કરવામાં આવ્યા છે. પરિવહન પ્રધાન પ્રતાપ સરનાઈકે ધારાશિવ જિલ્લાના ખેડૂતોને 101 દૂધ આપતી ગાયો આપવાનું પણ નક્કી કર્યું છે, જેમના પશુધનને પૂરમાં નુકસાન થયું હતું,’ એવી માહિતી તેમણે આપી હતી.
ઓક્સિજન પાર્ક અંગે શિંદેએ કહ્યું હતું કે, ‘અહીં ઔષધી છોડ, પુષ્કળ ઓક્સિજન અને ખારું પાણી છે. ચાલવા માટે 500 મીટરનો ટ્રેક તૈયાર કરવામાં આવ્યો છે. અહીં ચાલવાથી ઘણા રોગો મટી જશે. પાર્કમાં મોટી માત્રામાં વાંસનું વાવેતર કરવામાં આવ્યું છે.’
આપણ વાંચો: થાણે-સાકેત વચ્ચે બનશે એલિવેટેડ રોડ, ટ્રાફિકની સમસ્યા દૂર થવાની શક્યતા
પર્યાવરણના રક્ષણ માટે ગાયમુખ, લોકમાન્ય નગર અને અન્ય સ્થળોએ ‘શહેરી જંગલો’ બનાવવામાં આવ્યા છે. વન વિભાગની જમીન પર પચાસ હજાર વાંસ વાવવામાં આવ્યા છે. ‘થાણેમાં તળાવોને પુનર્જીવિત કરવાનું કામ પણ ચાલી રહ્યું છે. જોગીલા માર્કેટ પાસેનું તળાવ તેને પુનર્જીવિત કરીને વિશ્ર્વમાં પ્રથમ ઉદાહરણ બન્યું છે. તેમણે કહ્યું કે માસુંદા તળાવમાંથી કાંપ કાઢવો, નક્ષત્ર ઉદ્યાન માટે ચાર કરોડનું ભંડોળ જેવા ઘણા અન્ય કામો ચાલી રહ્યા છે.
‘હાલનું થાણે બદલાતું થાણે છે – રસ્તાઓ પહોળા થઈ રહ્યા છે, મેટ્રો નેટવર્ક વિસ્તરી રહ્યું છે. મેટ્રોનો પ્રથમ તબક્કો ડિસેમ્બરમાં શરૂ થશે, જ્યારે આગામી તબક્કામાં તે મીરા-ભાયંદર અને વડાલા સુધી વિસ્તરશે. થાણેમાં એક રિંગ મેટ્રો પણ હશે. ‘થાણેને વિકસિત, બદલાતું અને હરિયાળું શહેર બનાવવા માટે નાગરિકોની ભાગીદારી ખૂબ જ જરૂરી છે,’ એમ શિંદેએ કહ્યું હતું.
તેમણે કમિશનરને ઘોડબંદર રોડ પર ટ્રાફિક જામ પર ખાસ ધ્યાન આપવા સૂચના આપી હતી. ‘ચોમાસાની ઋતુ પૂરી થઈ ગઈ હોવાથી રસ્તાના કામો યુદ્ધના ધોરણે ચાલી રહ્યા છે, તેને જલ્દી પૂર્ણ કરો અને નાગરિકોને મુશ્કેલીમાંથી મુક્તિ આપો,’ એમ તેમણે અધિકારીઓને અપીલ કરી હતી.
