(અમારા પ્રતિનિધિ તરફથી)
મુંબઈ: મહારાષ્ટ્રમાં સત્તાધારી મહાયુતિ સરકારમાં કોઈ નૈતિકતા બાકી નથી. વહીવટની જવાબદારી અને સ્વાયત્તતાનું ઉલ્લંઘન થઈ રહ્યું છે. અહંકાર અને સત્તાનો બેફામ દુરુપયોગ, ગેરવહીવટ અને અપારદર્શક વ્યવહારો સતત ચાલુ છે.
સમાજમાં વિભાજન અને જાહેર અવ્યવસ્થા પેદા કરતા નિવેદનો મહાયુતિનો ‘નિયમ’ બની ગયા હોવાનો આરોપ લગાવતા, શિવસેના (યુબીટી)ના નેતાઓએ રાજ્યપાલને મળીને પ્રધાનો સંજય શિરસાટ, માણિકરાવ કોકાટે, પ્રતાપ સરનાઈક, નિતેશ રાણે, યોગશ કદમ અને સંજય રાઠોડને બરતરફ કરવાની માગણી રાજ્યપાલ સી. પી. રાધાકૃષ્ણનને કરતાં બે વિધાનસભ્યો અર્જુન ખોતકર અને સંજય ગાયકવાડ સામે કાર્યવાહી કરવા વિનંતી કરી છે.
રાજ્યપાલને રાજ્ય મંત્રીમંડળમાં ઘણા મંત્રીઓના ગેરવર્તણૂક અને કેસ વિશે એક નિવેદન દ્વારા જાણ કરવામાં આવી હતી. સંજય શિરસાટ, માણિકરાવ કોકાટે, યોગેશ કદમ અને નિતેશ રાણેના ગંભીર કેસની હકીકત રાજ્યપાલ સમક્ષ રજૂ કરવામાં આવી હતી.
આ પણ વાંચો: વિધાનસભામાં શિવસેના (યુબીટી)ના વિધાનસભ્ય અને પ્રધાન શંભુરાજ દેસાઈ આમને-સામને
શિવસેના ઠાકરે જૂથનું એક પ્રતિનિધિમંડળ રાજ્યપાલને સોમવારે મળ્યું હતું. વિધાન પરિષદના વિપક્ષી નેતા અંબાદાસ દાનવે, વિધાનસભ્યો અનિલ પરબ, મહેશ સાવંત, નીતિન દેશમુખ, મિલિંદ નાર્વેકર, પક્ષના નાયબ નેતા સુષ્મા અંધારે, નાયબ નેતા બબનરાવ થોરાત વગેરે હાજર રહ્યા હતા.
અનિલ પરબે રાજ્યપાલને પુરાવા આપ્યા કે ગૃહ ખાતાના રાજ્યકક્ષાના પ્રધાન યોગશ કદમની માતાના નામે એક બાર છે, અને ત્યાં એક ડાન્સ બાર ચલાવવામાં આવે છે. જો ગૃહ ખાતાના રાજ્યકક્ષાના પ્રધાન ડાન્સ બાર ચલાવી રહ્યા હોય અને જો તેમના પરિવારના સભ્યો ડાન્સ બાર ચલાવી રહ્યા છે, તો રાજ્યમાં કાયદો અને વ્યવસ્થા જાળવવાની જવાબદારી રાજ્યપાલની છે, એમ જણાવતાં આ પ્રતિનિધિમંડળે કદમને બરતરફ કરવાની માગણી કરી હતી.
આ પણ વાંચો: ભાજપ નેતા ગિરીશ મહાજનનો દાવો, શિવસેના (યુબીટી)ના અનેક સાંસદો અને વિધાનસભ્યો મારા સંપર્કમાં છે
સામાજિક ન્યાય પ્રધાન સંજય શિરસાટે ઘણી ગેરરીતિઓ કરીને પ્લોટ ખરીદ્યા છે. હોટેલ વિટ્સના કેસમાં તેમના પરિવારના નાણાકીય સંબંધો ખુલ્લા પડ્યા છે. તેમના નિવાસસ્થાને એક શંકાસ્પદ બેગમાં મોટી રકમ દેખાતો એક વીડિયો વાયરલ થયો છે. શિવસેના (ઠાકરે) એ રાજ્યપાલ પર સામાજિક ન્યાય વિભાગ દ્વારા બ્લેકલિસ્ટ કરાયેલા કોન્ટ્રાક્ટરને ગેરકાયદેસર કોન્ટ્રાક્ટ આપીને 1500 કરોડ રૂપિયાની ઉચાપત કરવાનો આરોપ લગાવ્યો છે. રાજ્યપાલે કહ્યું હતું કે તેમણે આ બધા કિસ્સાઓ અખબારો અને ચેનલો પર જોયા છે.
કૃષિ પ્રધાન માણિકરાવ કોકાટે સત્ર દરમિયાન ઓનલાઈન પત્તાંની રમત રમતા હોવાનો એક વીડિયો વાયરલ થઈ રહ્યો છે. આ ઘટના વિધાનસભા શિસ્તનું ઉલ્લંઘન છે. કોકાટે હંમેશા ખેડૂતો વિશે અપમાનજનક નિવેદનો આપતા રહ્યા છે. આ વર્ષે એપ્રિલમાં, ખેતીના નુકસાન અંગે પત્રકારો સાથે વાત કરતી વખતે, કોકાટેએ ખેડૂતોનું અપમાન કરીને પૂછ્યું હતું કે, ‘શું તમે ઢેખાળાના પંચનામા કરાવવા માંગો છો?’ તેમણે એક વાહિયાત નિવેદન પણ આપ્યું હતું કે સરકાર પાક વીમા માટે ખેડૂતો પાસેથી એક રૂપિયો લે છે, જેનો અર્થ છે કે સરકાર ભિખારી છે. શિવસેના (ઠાકરે)ના નેતાઓએ રાજ્યપાલને પૂછ્યું કે આવા પ્રધાનો પોર્ટફોલિયો કેવી રીતે સંભાળશે અને તેમની બરતરફીની માગણી કરી હતી.
