શિર્ડી જતી ખાનગી બસને સંગમનેર પાસે નડ્યો ગમખ્વાર અકસ્માત: ત્રણનાં મોત

મુંબઈ: શિર્ડી જતી ખાનગી બસને અહિલ્યાનગર જિલ્લાના સંગમનેર તાલુકામાં નડેલા ગમખ્વાર અકસ્માતમાં ત્રણ જણે જીવ ગુમાવ્યા હતા, જ્યારે આઠ ગંભીર રીતે ઘવાયા હતા. પૂરપાટ દોડતી લક્ઝરી બસ સામેથી આવેલી કેરી ભરેલી ટ્રક સાથે ટકરાયા બાદ બન્ને વાહન રસ્તા પરથી નીચે ઊતરી ગયાં હતાં.

સંગમનેર તાલુકા પોલીસ સ્ટેશનના અધિકારીના જણાવ્યા મુજબ મૃતકોની ઓળખ ફિરોઝ લાલા શેખ (46), અંજુ રવીન્દ્ર વાલ્મિક (39) અને પ્રવીણ સોપાન કાંદળકર (28) તરીકે થઈ હતી. સંગમનેરનો વતની શેખ ટ્રકનો ક્લીનર હતો, જ્યારે અંજુ હરિયાણા અને કાંદળકર સંગમનેરનો રહેવાસી હોવાનું જાણવા મળ્યું હતું.

આપણ વાંચો: મુમ્બ્રા અકસ્માતમાં મૃત્યુ પામેલા લોકોના પરિવારજનોને નોકરી આપો: શિવસેના (યુબીટી)

સંગમનેરમાં કોલ્હાર-ઘોડી સ્ટેટ હાઈવે પર કોંકણગાંવ નજીક રવિવારની સવારે છ વાગ્યાની આસપાસ આ અકસ્માત થયો હતો. લક્ઝરી બસ મુંબઈથી શિર્ડી અને શનિ શિંગણાપુર જઈ રહી હતી, જ્યારે ટ્રક સંગમનેરથી લોણી તરફ જઈ રહી હતી.
કહેવાય છે કે વરસાદને કારણે ભીના માર્ગ પર બન્ને વાહનના ડ્રાઈવરે સ્ટિયરિંગ પરથી કાબૂ ગુમાવ્યો હતો.

પૂરપાટ દોડતાં વાહનો સામસામે અથડાયા પછી રસ્તા પરથી નીચે ઊતરી ગયાં હતાં, જેને પગલે વાહનો અને કેરીનું ઘણું નુકસાન થયું હતું. દરમિયાન બન્ને વાહન ટકરાવાને કારણે જોરદાર અવાજ આવ્યો હતો, જે સાંભળીને ગામવાસીઓ દોડી આવ્યા હતા. વાહનચાલકોએ પણ પોતાનાં વાહનો રોક્યાં હતાં અને જખમીઓને હૉસ્પિટલે પહોંચાડવામાં મદદ કરી હતી.

વધુપડતું લોહી વહી જવાને કારણે ત્રણનાં મોત નીપજ્યાં હતાં. બસના આઠ પ્રવાસી જખમી થયા હતા, જેમને સારવાર માટે સરકારી હૉસ્પિટલમાં દાખલ કરવામાં આવ્યા હતા.