રાજ ઠાકરેના કારણે મહાવિકાસ આઘાડીમાં ભાગલા? કોંગ્રેસની બેઠકમાં શું નિર્ણય લેવાયો?

(અમારા પ્રતિનિધિ તરફથી)

મુંબઈ: શું મનસે પ્રમુખ રાજ ઠાકરેના કારણે મહાવિકાસ આઘાડી ભાગલા પડશે? એવો સવાલ ઉભો થયો છે. કારણ કે ઠાકરે ભાઈઓ જુલાઈથી સાથે છે. ઉદ્ધવ ઠાકરે અને રાજ ઠાકરે વચ્ચે અત્યાર સુધીમાં દસથી વધુ બેઠકો થઈ છે અને એ પણ લગભગ નિશ્ર્ચિત છે કે બંને ભાઈઓ મહાનગરપાલિકાની ચૂંટણી ગઠબંધનમાં લડશે. ઉદ્ધવ ઠાકરે અને રાજ ઠાકરે ‘સત્યાચા મોર્ચા’માં પણ સાથે જોવા મળ્યા હતા. જોકે, શું રાજ ઠાકરેના કારણે મહાવિકાસ આઘાડી ભાગલા પડી શકે છે? એવી ચર્ચાઓ શરૂ થઈ ગઈ છે. આનું કારણ એ પણ છે કે કોંગ્રેસ રાજ ઠાકરેને એમવીએમાં સમાવવાનું પસંદ કરતી નથી. આ મુદ્દે કૉંગ્રેસના રાષ્ટ્રીય પ્રવક્તાનું નિવેદન અત્યંત મહત્ત્વનું માનવામાં આવે છે.

મુંબઈમાં કૉંગ્રેસની બેઠકમાં શું નિર્ણય લેવાયો?

ઓલ ઈન્ડિયા કૉંગ્રેસ કમિટી (એઆઈસીસી)ના પ્રવક્તા સચિન સાવંતે મુંબઈમાં યોજાયેલી મહારાષ્ટ્ર પ્રદેશ કોંગ્રેસ સમિતિની બેઠકમાં લેવામાં આવેલા નિર્ણય અંગે મુંબઈ સમાચારને માહિતી આપતાં જણાવ્યું હતું કે, એમપીસીસીની બેઠકમાં પણ મનસે પર ચર્ચા થઈ હતી. સ્થાનિક સ્વરાજ્ય સંસ્થાની ચૂંટણીમાં રણનીતિ શું હોવી જોઈએ? આ દરેક પક્ષનો પ્રશ્ર્ન છે. મનસે માટે હું એટલું કહી શકું છું કે તે પક્ષની સ્થાપના થઈ ત્યારથી, તેમના અને અમારામાં મતભેદો રહ્યા છે. વૈચારિક મતભેદો છે. એ સ્પષ્ટ છે કે તેમના વલણો અંગે મતભેદો છે.

આ પણ વાંચો: પ્રેસ કોન્ફરન્સ જોયા પછી ગુસ્સાથી માથું ફાટે છે: રાજ ઠાકરે

મુંબઈ અંગે કેન્દ્રીય સ્તરે હજુ સુધી નિર્ણય લેવાનો બાકી છે. કેન્દ્રીય નેતૃત્વની એકંદર નિર્ણય લેવાની પ્રક્રિયામાં સ્થાનિક નેતાઓ સાથે ચર્ચાનો સમાવેશ થાય છે. અમે નેતૃત્વને અમારી લાગણીઓ જણાવી દીધી છે. તો ચાલો તેમના નિર્ણયની રાહ જોઈએ, આ સંદર્ભમાં ટૂંક સમયમાં નિર્ણય લેવામાં આવશે, એવી અપેક્ષા છે.

કોંગ્રેસની સ્થિતિ અને વિચારો મૂળભૂત રીતે સમાન છે, ભલે ગમે તેટલા તોફાનો આવે. તેથી, અમે તેમનું પાલન કરીએ છીએ. મને અન્ય પક્ષો વિશે ખબર નથી, પરંતુ કોંગ્રેસ એક એવી પાર્ટી છે જે વિચારો પર ચાલે છે, એમ સચિન સાવંતે મુંબઈ સમાચારને જણાવ્યું હતું.

સંદીપ દેશપાંડેએ શું કહ્યું?

વોટ ચોરીના મુદ્દે સમર્થન એક અલગ મુદ્દો છે અને સાથે મળીને લડવું એ એક અલગ મુદ્દો છે. ભાજપે પણ સ્વીકાર્યું છે કે બેવડા મતદારો છે. જ્યારે આ બધી બાબતો થઈ રહી છે, ત્યારે અમે કોંગ્રેસને કોઈ પ્રસ્તાવ આપ્યો નથી. કોંગ્રેસે પણ કોઈ પ્રસ્તાવ આપ્યો નથી. હાલમાં, અમે વોટ ચોરી સામે લડી રહ્યા છીએ, એમ સંદીપ દેશપાંડેએ જણાવ્યું હતું.

આ પણ વાંચો: મહારાષ્ટ્રની મતદાર યાદીમાં બનાવટી મતદાર અંગે રાજ ઠાકરેએ લગાવ્યો નવો આરોપ, ચૂંટણી યોજવા કર્યા ગંભીર સવાલ…

ઉદ્ધવ ઠાકરે અને રાજ ઠાકરે જુલાઈ 2025થી સાથે છે

રાજ ઠાકરે અને ઉદ્ધવ ઠાકરે સાથે લડી રહ્યા હોવાથી મનસે અને શિવસૈનિકો વચ્ચે ખુશીનો માહોલ છે, પરંતુ એવું જોવા મળી રહ્યું છે કે કોંગ્રેસને રાજ ઠાકરેને આઘાડીમાં સામેલ કરવામાં મુશ્કેલી પડી રહી છે.

કૉંગ્રેસે જોકે સીધી રીતે નહીં પણ આડકતરી રીતે જણાવ્યું છે કે અમે રાજ ઠાકરે વિશેની અમારી લાગણીઓ હાઇકમાન્ડ સુધી પહોંચાડી છે. એમ પણ કહ્યું છે કે મનસે પ્રમુખ રાજ ઠાકરેએ પાર્ટી બનાવી ત્યારથી અમારામાં મતભેદો છે. તેથી, જો કોંગ્રેસ હવે અલગથી લડવાનું નક્કી કરે છે, તો શું રાજ ઠાકરેના આગમનથી મહા વિકાસ આઘાડીમાં ભાગલા પડશે? એવા સવાલ રાજકીય વર્તુળોમાં થઈ રહ્યા છે.

મહા વિકાસ આઘાડીની રચના 2019 માં થઈ

2019માં ઉદ્ધવ ઠાકરેએ કોંગ્રેસ અને એનસીપી સાથે ગઠબંધન કર્યું અને મહારાષ્ટ્રમાં અઢી વર્ષ સુધી મહા વિકાસ આઘાડી સરકાર ચલાવી. તે સમયે સૌથી મોટી પાર્ટી ભાજપ વિરોધમાં હતી. રાજ ઠાકરે પણ આ સરકારની વિરુદ્ધ હતા. રાજ ઠાકરે 2024ની વિધાનસભા ચૂંટણી સુધી મહા યુતિ સાથે હતા. જોકે, હવે મ્યુનિસિપલ ચૂંટણીના સંદર્ભમાં રાજ ઠાકરે અને ઉદ્ધવ ઠાકરે એક સાથે આવ્યા છે. રાજ ઠાકરે અને ઉદ્ધવ ઠાકરે બંને કોંગ્રેસ અને એનસીપી નેતાઓ સાથે જાહેરમાં જોવા મળે છે. છતાં, બધા કોંગ્રેસના નેતાઓ રાજ ઠાકરેને સાથે લેવામાં રસ ધરાવતા નથી. અગાઉ, એવું બહાર આવ્યું હતું કે ભાઈ જગતાપે પણ રાજ ઠાકરેના નામ સામે વાંધો ઉઠાવ્યો હતો. હવે જો હાઇકમાન્ડ નિર્ણય લેશે, તો કોંગ્રેસે આ નીતિ સ્વીકારવી પડશે, પરંતુ હાલ તો ચિત્ર એ છે કે રાજ ઠાકરેના કારણે રાજ્યમાં એમવીએમાં બધું બરાબર નથી.