મહારાષ્ટ્રની મતદાર યાદીમાં બનાવટી મતદાર અંગે રાજ ઠાકરેએ લગાવ્યો નવો આરોપ, ચૂંટણી યોજવા કર્યા ગંભીર સવાલ…

મુંબઈઃ મનસે (મહારાષ્ટ્ર નવનિર્માણ સેના)ના વડા રાજ ઠાકરેએ આજે આરોપ લગાવ્યો હતો કે મહારાષ્ટ્રની મતદાર યાદીમાં ૯૬ લાખ નકલી મતદાર ઉમેરવામાં આવ્યા છે અને ચૂંટણી પંચને પૂછ્યું હતું કે મતદાર યાદીમાં સુધારા કર્યા વિના સ્થાનિક સંસ્થાઓની ચૂંટણી કેવી રીતે યોજવામાં આવશે.

મહારાષ્ટ્ર નવનિર્માણ સેના (મનસે)ના બૂથ-સ્તરના એજન્ટને સંબોધતા ઠાકરેએ કહ્યું હતું કે જો મતદાર યાદીમાં છેડછાડ કરીને ચૂંટણી યોજવામાં આવે છે તો તે મતદારોનું અપમાન છે. તેમણે તેમના પક્ષના કાર્યકરોને નકલી મતદારો શોધવા માટે મતદાર યાદીની ચકાસણી કરવા વિનંતી કરી.

તેમણે દાવો કર્યો હતો કે મુંબઈમાં આઠથી ૧૦ લાખ અને થાણે, પુણે અને નાશિકમાં આઠથી ૮.૫ લાખ નકલી મતદાર ઉમેરાયા છે. ઠાકરેએ કહ્યું કે જ્યારે વિપક્ષ ચૂંટણી પંચ પર પ્રહાર કરે છે ત્યારે શાસક પક્ષો નારાજ થાય છે, કારણ કે તેનાથી શાસક પક્ષને નુકસાન થાય છે.

શાસક પાર્ટી ભાજપનું નામ લીધા વિના ઠાકરેએ કહ્યું હતું કે તે મતદાર યાદીમાં નકલી મતદારો ઉમેરીને મતદાન કરવા માંગે છે. તમે મતદાન કરો કે ન કરો તેનાથી કોઈ ફરક પડતો નથી. મેચ ફિક્સ થઈ ગઈ છે. આ કેવા પ્રકારની લોકશાહી છે? તેમણે પૂછ્યું.

ગયા વર્ષે રાજ્યની ચૂંટણીમાં મનસેને એકપણ બેઠક મળી નહોતી. નબળા ચૂંટણી પ્રદર્શન માટે તેમની નિંદા કરનારાઓ પર પ્રહાર કરતા, ઠાકરેએ કહ્યું કે જો મતદાનના ગણિતમાં જ “ચેડા” થશે તો તેમના પક્ષના ધારાસભ્યો અને સાંસદો કેવી રીતે ચૂંટાશે. શાસક પક્ષે મહારાષ્ટ્રમાં ૨૦૨૪ ની વિધાનસભા ચૂંટણી કેવી રીતે જીતી હતી તે બધા જાણે છે. જ્યારે ભાજપ વિપક્ષમાં હતો, ત્યારે તે ચૂંટણી પંચ પર સમાન આરોપો લગાવતો હતો.

તેમણે એવો પણ દાવો કર્યો હતો કે મુંબઈ એરપોર્ટનું સંચાલન ટૂંક સમયમાં નવી મુંબઈ એરપોર્ટ પર ખસેડવામાં આવશે. થોડા દિવસોમાં, કાર્ગો પણ વાધવન બંદર (પડોશી પાલઘર જિલ્લામાં બની રહેલા) પર ખસેડવામાં આવશે અને નવી મુંબઈ એરપોર્ટ અને બંદરની આસપાસની જમીન ખાનગી જૂથને આપવામાં આવશે. “હું મરાઠી લોકોની સમાધિ પર બનેલા વિકાસને સહન કરીશ નહીં,” તેમણે કહ્યું.

ઠાકરેએ એવો પણ દાવો કર્યો હતો કે ભારતના પ્રથમ ગૃહમંત્રી વલ્લભભાઈ પટેલ હતા, જેમણે મુંબઈના મહારાષ્ટ્ર સાથે વિલીનીકરણનો સૌપ્રથમ વિરોધ કર્યો હતો. ૩૧ જાન્યુઆરી, ૨૦૨૬ સુધીમાં પૂર્ણ થનારી ગ્રામીણ અને શહેરી સંસ્થાઓની ચૂંટણીઓ પહેલાં વિપક્ષે મતદાર યાદીમાં “સુધારણા” અને “વિસંગતતાઓ” દૂર કરવાની માંગ કરી છે.
(પીટીઆઈ)

આ પણ વાંચો…રાષ્ટ્રીય હિતમાં હાથ મિલાવવામાં કંઈ ખોટું નથી: રાજ ઠાકરેના સંભવિત એમવીએ સમાવેશ પર સુળે