ઓક્ટોબરના નવા સમયપત્રકમાં ફેરફાર: ટ્રેનની સંખ્યા વધશે, કયા રુટના લોકોને ફાયદો થશે?
મુંબઈઃ મધ્ય રેલવેમાં સીવુડ-ઉરણ રૂટ પર મુખ્ય, હાર્બર અને ટ્રાન્સહાર્બર રૂટની તુલનામાં મુસાફરોની સંખ્યા ઓછી છે. પરિણામે, આ રૂટ પર લોકલ ટ્રેનો ભીડના સમયે એક કલાકના અંતરાલ પર અને બાકીના સમયમાં દોઢ કલાકના અંતરાલ પર દોડે છે, પરંતુ આ રૂટ પ્રવાસીઓમાં લોકપ્રિય થઇ રહ્યો હોવાથી રેલવેએ વધતી ભીડને ધ્યાનમાં રાખીને લોકલ ટ્રેનોની સંખ્યામાં 20નો વધારો કરવાની જાહેરાત કરી છે.
ઓક્ટોબરમાં આવનારા નવા સમયપત્રકમાં વધેલી ટ્રેનોનો સમાવેશ કરવામાં આવશે. આનાથી ટૂંક સમયમાં મધ્ય રેલવેના સીવુડ દારાવે – બેલાપુર – ઉરણ રેલ્વે લાઇન પર મુસાફરોને રાહત મળશે. નવી મુંબઈ આંતરરાષ્ટ્રીય વિમાનમથક નજીકના ભવિષ્યમાં ખુલવા માટે તૈયાર છે. એરપોર્ટની નજીક આવેલા તારઘર રેલ્વે સ્ટેશનનું કામ અંતિમ તબક્કામાં છે.
આનાથી ઉરણ રૂટ પર મુસાફરોની સંખ્યામાં વધારો થવાની શક્યતા છે. ઉરણ રૂટ પર મુસાફરોએ ફેરીની સંખ્યા વધારવા અંગે મધ્ય રેલ્વેને વારંવાર પત્ર લખ્યો હતો. નેરુળ-ઉરણ રૂટ પર દસ અપ અને દસ ડાઉન લોકલ ટ્રેનો ઉમેરવામાં આવશે. આનાથી ઉરણ રૂટ પર કુલ ટ્રેનોની સંખ્યા 40થી વધીને 60 થઈ જશે.
રેલવે અધિકારીઓએ જણાવ્યું હતું કે ટ્રેનોની સંખ્યા વધારવાથી બે લોકલ ટ્રેનો વચ્ચેનો સમયગાળો ઘટશે. આનાથી મુસાફરોને ફાયદો થશે અને તેમનો સમય બચશે. ઉરણ ઝડપથી વિકાસ પામતું શહેર હોવાથી, આ રૂટ પર ફેરીની સંખ્યા વધારવાથી મુસાફરોને વધુ સારી સુવિધાઓ પૂરી પાડીને મુસાફરીને વધુ આરામદાયક બનાવવામાં મદદ મળશે. રેલવે અધિકારીઓએ એ પણ સ્પષ્ટતા કરી છે કે જો મુસાફરોની સંખ્યા વધશે તો તબક્કાવાર ફેરીની સંખ્યા વધારવાની યોજના છે.
આ પણ વાંચો…‘આ’ કારણથી સવારથી લોકલ ટ્રેનો મોડી દોડે છે, જાણો અત્યારે શું છે હાલ?
