રેપિડો સામે સ્ટંટ કરીને સ્પોન્સરશીપ મેળવી: વિપક્ષનો આરોપ

(અમારા પ્રતિનિધિ તરફથી)
મુંબઈ: નાયબ મુખ્ય પ્રધાન એકનાથ શિંદે દિલ્હીમાં કેન્દ્રીય ગૃહ પ્રધાન અમિત શાહને મળીને મહાયુતિમાં તણાવ ઓછો કરવાનો પ્રયાસ કરી રહ્યા છે, ત્યારે શિંદે સેનાના વધુ એક મંત્રી મુશ્કેલીમાં મુકાતા જોવા મળી રહ્યા છે. એવું કહેવાય છે કે શિંદે સેનાના એક પછી એક પ્રધાનો વિવાદમાં સપડાતા હોવાથી મહાયુતિમાં તણાવ ઉભો થયો છે.

આ કારણે, એકનાથ શિંદે વારંવાર દિલ્હીના ચક્કર કાપી રહ્યા છે. આ બધા વચ્ચે તેમના પ્રધાનનો ‘પ્રતાપ’ ફરી સામે આવ્યો છે. પરિવહન પ્રધાન પ્રતાપ સરનાઈક પર સ્ટંટ કરીને રેપિડોની સ્પોન્સરશિપ મેળવવાનો આરોપ લાગી રહ્યો છે.

આપણ વાંચો: દહિસર ટોલ પ્લાઝા પર ટ્રાફિક જામના નિરાકરણ માટે પરિવહન પ્રધાન પ્રતાપ સરનાઈકનું 3 દિવસનું અલ્ટિમેટમ

બીજી તરફ પરિવહન પ્રધાનની કચેરી દ્વારા એવી સ્પષ્ટતા કરવામાં આવી છે કે વાસ્તવમાં જે સ્પર્ધા માટે સ્પોન્સરશીપ મેળવવાનો આરોપ કરવામાં આવ્યો છે તે સ્પર્ધા સાથે રેપિડો સામેની કાર્યવાહી પહેલેથી જ સંકળાયેલી છે અને તે સંકળાયેલી હોવા છતાં તેમના ખોટા કામ વિરુદ્ધ કાર્યવાહી કરવામાં આવી છે.

કોંગ્રેસના નેતા વિજય વડેટ્ટીવારે સોશ્યલ મીડિયા પ્લેટફોર્મ એક્સ પર એક પોસ્ટ કરી હતી કે, પરિવહન પ્રધાને મહારાષ્ટ્ર સરકારને તેમના કાર્યક્રમ માટે પૈસા કેવી રીતે એકત્ર કરવા તેનો ડેમો બતાવવા બદલ અભિનંદન આપવા જોઈએ.

પહેલા તેમણે ખાનગી એપ પરથી બાઇક બુક કરાવી, પછી તેમણે ગરીબ બાઇકરને પકડવો પડ્યો, સ્ટંટ કરવો પડ્યો કે એપ પરથી બાઇક ચલાવવી ગેરકાયદે છે, તેનો વીડિયો બનાવવો પડ્યો અને પરિવહન પ્રધાન કેટલા સ્માર્ટ અને સતર્ક છે તે બતાવવા માટે પીઆર કરવું પડ્યું, પોતાની છબી બનાવવી પડી અને પછી તેમણે મુશ્કેલીમાં મુકાયેલી આ ખાનગી એપ માલિકો પાસેથી પુત્રની ઇવેન્ટ માટે ભંડોળ મેળવી લીધું, કેવો સરસ વિચાર, પ્રતાપી પ્રધાને આદર્શ સ્થાપિત કર્યો કે મહારાષ્ટ્રની તિજોરી મુશ્કેલીમાં હોય ત્યારે ભંડોળ કેવી રીતે એકઠું કરવું.

આપણ વાંચો: સેના યુબીટી અને મનસે મરાઠી પ્રેમ માટે નહીં, પરંતુ બીએમસી કબજે કરવા માટે ભેગા થઈ રહ્યા છે: સરનાઈક

કાર્યક્રમ માટે નાણાં એકઠાં કરવા માટે પ્રધાનોએ શું કરવું પડશે? રાજ્યની નાણાકીય પરિસ્થિતિને જોતાં, એવું લાગે છે કે વિવિધ વિભાગોના પ્રધાનોએ પણ આગામી દિવસોમાં આવા જ સ્ટંટ કરવા પડશે, એમ વડેટ્ટીવારે જણાવ્યું હતું.

આના પર પરિવહન ખાતા દ્વારા એવી સ્પષ્ટતા કરવામાં આવી હતી કે કોઈપણ રમતમાં રાજકારણ લાવવું યોગ્ય નથી. પૂર્વેશ પ્રતાપ સરનાઈક ત્રણ વર્ષથી પ્રો-ગોવિંદા લીગનું આયોજન કરી રહ્યા છે, જે એક સાહસિક રમત સ્પર્ધા છે જે મહારાષ્ટ્રીયન સંસ્કૃતિનું ગૌરવ છે. આ વર્ષે, જ્યારે આ સ્પર્ધા 26 મેથી શરૂ થઈ, ત્યારે આ સ્પર્ધાની 20-25 પ્રાયોજક સંસ્થાઓમાંથી, એક રેપિડો પણ પ્રાયોજક છે, આ હકીકતને નકારી શકાય નહીં.

જોકે, ચોમાસુ સત્રમાં જનપ્રતિનિધિએ તેમના પુત્રના એક કાર્યક્રમને સ્પોન્સર કરતી રેપિડોની અનધિકૃત એપ સેવા અંગે શંકા વ્યક્ત કર્યા પછી, કર્તવ્યનિષ્ઠ પ્રધાન પ્રતાપ સરનાઈકે તાત્કાલિક આ સંસ્થા સામે કાર્યવાહી કરી. આ કાર્યવાહી ફક્ત એક ડ્રાઇવર સામે નહીં પરંતુ તે સંસ્થાના ઉચ્ચ અધિકારીઓ સામે કરવામાં આવી હતી.

આપણ વાંચો: પરિવહન મંત્રી સરનાઈકે ગુણવત્તાયુક્ત પરિવહન સેવાનું વચન આપ્યું

તેથી, સંબંધિત સંસ્થા કોને પ્રાયોજિત કરે છે તે અંગે કોઈ ખચકાટ વિના, પ્રતાપ સરનાઈકે પ્રધાન તરીકે નિષ્પક્ષ રીતે તે સંસ્થાના ખોટા કાર્યો સામે કાર્યવાહી કરવાની હિંમત બતાવી હતી. ઉલ્લેખનીય છે કે, પ્રતાપ સરનાઈક પહેલા એવા પરિવહન પ્રધાન છે જેમણે આટલી મોટી સંસ્થા સામે આટલી કડક કાર્યવાહી કરી છે.

આ બાબતની ખરેખર પ્રશંસા થાય તેવી અપેક્ષા છે. પરંતુ વિરોધ કરવા ખાતર કેટલાક લોકોએ હકીકતો જોયા-ચકાસ્યા વિના પ્રતાપ સરનાઈકને ખોટી રીતે બદનામ કરવાનો બેશરમ પ્રયાસ કર્યો છે. તે ખૂબ જ ઘૃણાસ્પદ છે.

26 મે, 2025ના રોજ સ્પર્ધા શરૂ થઈ ત્યારથી, રેપિડો સત્તાવાર રીતે પ્રો-ગોવિંદા લીગ સાથે જોડાયેલું હતું. તે પછી, બીજી જુલાઈ, 2025ના રોજ પરિવહન પ્રધાન પ્રતાપ સરનાઈકે સંબંધિત મામલે જરૂરી કાનૂની કાર્યવાહી કરી. તેથી, કૃપા કરીને રમત પ્રો-ગોવિંદાને રાજકારણ સાથે ન જોડો. એવી અપીલ પરિવહન પ્રધાન સરનાઈકે કરી છે.