BMC ચૂંટણી: ભાજપના નેતાઓના ‘મુંબઈ’ અને ‘મેયર’ અંગેના નિવેદનોથી રાજકીય ગરમાવો
અન્નામલાઈ અને કૃપાશંકર સિંહના નિવેદનોએ વિરોધ પક્ષોને આપ્યું નવું હથિયાર; ભાજપ માટે મુશ્કેલી વધવાની શક્યતા
મુંબઈઃ મુંબઈ મહાનગર પાલિકા (બીએમસી) સહિત 29 મ્યુનિસિપલ કોર્પોરેશનની ચૂંટણી માટે 15 જાન્યુઆરીએ મતદાન થવાનું છે. ત્યારે બધા જ પક્ષો જોરશોરથી ચૂંટણી પ્રચાર કરી રહ્યા છે અને સામસામે આક્ષેપબાજી પણ ચાલી રહી છે. આ દરમ્યાન ભારતીય જનતા પાર્ટી (ભાજપ) માટે મુશ્કેલી ઊભી થતી દેખાય છે, આ પરિસ્થિતિ બીજા કોઈ દ્વારા નહીં પરંતુ તેના પોતાના નેતાઓ દ્વારા આપવામાં આવેલા નિવેદનોથી સર્જાઈ છે.
હકીકતમાં, પ્રચાર દરમિયાન, ભારતીય જનતા પાર્ટીના તમિલનાડુ એકમના પ્રમુખ અન્નામલાઈએ કહ્યું હતું કે મુંબઈ ફક્ત મહારાષ્ટ્રનું નથી. ભૂતપૂર્વ આઈપીએસ અધિકારીએ કહ્યું, “બોમ્બે (મુંબઈ) ફક્ત મહારાષ્ટ્રનું જ શહેર નથી, પરંતુ એક આંતરરાષ્ટ્રીય શહેર છે. તેનું વાર્ષિક બજેટ ₹ 75,000 કરોડ, ચેન્નાઈનું બજેટ ₹8,000 કરોડ અને બેંગલુરુનું બજેટ ₹19,000 કરોડ છે.”
આ પણ વાંચો: મહાયુતિનો ચૂંટણી ઢંઢેરો: મહિલાઓ માટે વ્યાજમુક્ત લોન અને BEST બસમાં 50 ટકા ભાડામાં રાહતની જાહેરાત
તેમના આ નિવેદનથી રાજકીય વર્તુળોમાં વિરોધ ઊભો થયો છે. મહારાષ્ટ્ર નવનિર્માણ સેના (મનસે)ના પ્રમુખ રાજ ઠાકરેએ પણ અન્નામલાઈના જવાબમાં વિવાદાસ્પદ નિવેદનો આપ્યા છે. માત્ર અન્નામલાઈ જ નહીં, પરંતુ ઉત્તર પ્રદેશના જૌનપુરના ભૂતપૂર્વ ભાજપ સાંસદ કૃપાશંકર સિંહની રાજકીય ટિપ્પણીથી પણ ખળભળાટ મચી ગયો છે.
ચૂંટણી પ્રચાર દરમિયાન સિંહે કહ્યું હતું કે મીરા ભાઈંદરના મેયર ઉત્તર ભારતીય હોવા જોઈએ. તેમણે કહ્યું હતું કે એટલા હિન્દીભાષી કાઉન્સિલર ચૂંટાવા જોઈએ, જેથી મ્યુનિસિપલ કોર્પોરેશનમાં હિન્દીભાષી અને ઉત્તર ભારતીય મેયર હોય.
આ નિવેદનથી શિવસેના (ઉદ્ધવ ઠાકરેના નેતૃત્વ હેઠળ) અને રાજ ઠાકરેના નેતૃત્વ હેઠળની મનસેને વિરોધ માટે એક મુદ્દો મળી ગયો છે. કૃપાશંકર સિંહના નિવેદનના જવાબમાં મનસે નેતા અવિનાશ જાધવે કહ્યું હતું કે ભાજપની નીતિઓ અને ઇરાદા સ્પષ્ટ થઈ ગયા છે. ભાજપ ફક્ત સત્તા માટે મરાઠી મતો મેળવવા માંગે છે.
જોકે, રાજ્યના મુખ્ય પ્રધાન દેવેન્દ્ર ફડણવીસે અનેક વખત સ્પષ્ટ કર્યું છે કે પાર્ટીએ ક્યારેય મરાઠી અસ્મિતા સાથે સમાધાન કર્યું નથી અને ક્યારેય કરશે પણ નહીં. વિવિધ ચૂંટણી પ્રચાર દરમિયાન, મુખ્ય પ્રધાને કહ્યું છે કે ભાજપ મરાઠી લોકો અને તેમની ભૂમિનો અવાજ છે.
દરમિયાન, રાજકીય નિષ્ણાતોનો દાવો છે કે ભાજપના નેતાઓના નિવેદનો વિવિધ કારણોસર દૂર થઈ ગયેલા મતદારોને એકસાથે લાવવામાં મદદરૂપ સાબિત થઈ શકે છે. આ નિવેદનોની જનતા પર શું અસર પડે છે તે તો 16 તારીખે ખબર પડશે.
