અજિત પવારના નિધન બાદ NCPના અધ્યક્ષપદ અંગે પીયૂષ ગોયલનો યુ-ટર્ન, જાણો મામલો

મુંબઈઃ રાજ્યના નાયબ મુખ્ય પ્રધાન અને રાષ્ટ્રવાદી કોંગ્રેસ પાર્ટીના રાષ્ટ્રીય નેતા અજિત પવારના વિમાન દુર્ઘટનામાં અકાળે અવસાન બાદ દેશભરમાં શોક વ્યક્ત કરવામાં આવી રહ્યો છે. અજિત દાદાના અવસાનની કળ હજુ સુધી મહારાષ્ટ્રના લોકોને વળી નથી. જોકે, મહારાષ્ટ્ર વાસ્તવિકતા સ્વીકારીને દુઃખનો સ્વીકાર કરીને તેમાંથી બહાર આવી રહ્યું છે.

કાર્યકરો હજી આ દુઃખદ ઘટનામાંથી સંપૂર્ણપણે મુક્ત નથી તો બીજી બાજુ સરકાર અને અજિત દાદાના પક્ષ વચ્ચે રાજકીય ઘટનાને પણ વેગ મળ્યો છે. અજિત પવારના પત્ની સુનેત્રા પવારે તેમના સ્થાને રાજ્યના નાયબ મુખ્ય પ્રધાન તરીકે શપથ લીધા.

જોકે, રાષ્ટ્રવાદી કોંગ્રેસ પાર્ટીના રાષ્ટ્રીય અધ્યક્ષ કોણ હશે તે અંગે ભારે ચર્ચા ચાલી રહી છે. આ દરમિયાન, ભાજપના નેતા અને કેન્દ્રીય પ્રધાન પીયૂષ ગોયલે એક ઇન્ટરવ્યુમાં સીધું કહ્યું હતું કે પ્રફુલ્લ પટેલ એનસીપીના રાષ્ટ્રીય અધ્યક્ષ બની ગયા છે. જોકે, હવે તેમણે પોતાના નિવેદન પર યુ-ટર્ન લીધો છે.

આપણ વાચો: યુરોપને છૂટ તો ભારત પર દબાણ કેમ? રશિયાના તેલ ખરીદી પર યુએસ દબાણનો પીયૂષ ગોયલે કર્યો આકરો વિરોધ…

એક વરિષ્ઠ પત્રકારે મને ખોટી માહિતી આપી હતી કે પ્રફુલ્લ પટેલ રાષ્ટ્રવાદી કોંગ્રેસ પાર્ટીના રાષ્ટ્રીય અધ્યક્ષ બન્યા છે. જોકે, મેં કોઈ સત્તાવાર માહિતી લીધા વિના એક મુલાકાતમાં આ વિશે નિવેદન આપ્યું, પરંતુ મારી માહિતી ખોટી છે અને રાષ્ટ્રવાદી કોંગ્રેસ પાર્ટી નાયબ મુખ્ય પ્રધાન સુનેત્રા અજિત પવારના નેતૃત્વ હેઠળ કામ કરી રહી છે, કહીને કેન્દ્રીય મંત્રી પીયૂષ ગોયલે ઘટના પર સ્પષ્ટતા કરી. ગોયલે એમ પણ કહ્યું કે તેઓ આ ખોટી માહિતી બદલ દિલગીર છે.

કેન્દ્રીય પ્રધાન પીયૂષ ગોયલે એક મુલાકાતમાં પીટીઆઈને સીધી માહિતી આપી હતી કે નાયબ મુખ્ય પ્રધાન અજિત પવારના અવસાન બાદ પ્રફુલ્લ પટેલને રાષ્ટ્રવાદી કોંગ્રેસ પાર્ટીના પ્રમુખ તરીકે નિયુક્ત કરવામાં આવ્યા છે. આનાથી રાજકીય વર્તુળોમાં ખળભળાટ મચી ગયો છે.

ઉલ્લેખનીય છે કે, શનિવારે મનસે પ્રમુખ રાજ ઠાકરેએ સોશિયલ મીડિયા પર પોસ્ટ કરીને પટેલની પસંદગીની સીધી ટીકા કરી હતી. તેમણે સ્પષ્ટપણે કહ્યું કે રાષ્ટ્રવાદી કોંગ્રેસ જેવી ખરા મરાઠા મૂળ અને નમ્ર પૃષ્ઠભૂમિ ધરાવતી પાર્ટીના રાષ્ટ્રીય અધ્યક્ષ, કોઈ પાટીલ હોવા જોઈએ, પણ પટેલ નહીં. ત્યારબાદ, એનસીપી કાર્યકરોએ પણ સોશિયલ મીડિયા પર રાજ ઠાકરેના વલણને સમર્થન આપ્યું.

પ્રફુલ પટેલે પણ સમાચારનું ખંડન કર્યું

દરમિયાન, મીડિયામાં આવેલા સમાચાર બાદ, રાષ્ટ્રવાદી કોંગ્રેસ પાર્ટીના નેતા અને સાંસદ પ્રફુલ પટેલે પણ પોતાનો ખુલાસો આપ્યો છે. તેમણે સોશિયલ મીડિયા પર એક પોસ્ટમાં રાષ્ટ્રીય અધ્યક્ષ તરીકે ચૂંટાયાના સમાચારને નકારી કાઢ્યા. અજિત પવાર પછીના રાજકીય વિકાસ પર ટિપ્પણી કરતી વખતે એનસીપી સુપ્રીમો શરદ પવારે સુનીલ તટકરે અને પ્રફુલ પટેલ પર આંગળી ચીંધી.