રિક્ષામાં બાળક સાથે શ્વાનને પૂરી આનંદમાણનારા શ્વાનના માલિકની ધરપકડ

(અમારા પ્રતિનિધિ તરફથી)
મુંબઈ: રિક્ષામાં 11 વર્ષના માસૂમ બાળક સાથે ખતરનાક પિટ બુલ શ્વાનને પૂરી બાળકના ડરનો વિકૃત આણંદ માણનારા શ્વાનમાલિકની પોલીસે ધરપકડ કરી હતી.

રિક્ષામાં બાળકને કરડ્યા પછી શ્વાન રસ્તા પર તેની પાછળ દોડતો હોવાનો વીડિયો સોશ્યલ મીડિયા પર વાયરલ થયો હતો. આટલું ઘાતકીપણું દાખવનારા શ્વાનમાલિકને નોટિસ આપીને છોડી મૂકવાના પોલીસના પગલાની ટીકા કરવામાં આવી હતી.

આપણ વાંચો: જ્યાં શ્ર્વાનને આધારે માલિકને જજ કરાય છે!

આ પ્રકરણે બાળકના પિતાએ નોંધાવેલી ફરિયાદને આધારે માનખુર્દ પોલીસે શુક્રવારના મળસકે આરોપી મોહમ્મદ સોહેલ હસન ખાન (43) વિરુદ્ધ એફઆઈઆર નોંધ્યો હતો.

પોલીસ ફરિયાદ અનુસાર ઘટના ગુરુવારની રાતે 10 વાગ્યાની આસપાસ માનખુર્દની મ્હાડા કોલોનીમાં બની હતી. રસ્તા પર પાર્ક રિક્ષામાં બાળક રમતો હતો ત્યારે આરોપી તેનો પિટ બુલ શ્વાન લઈને ત્યાં આવ્યો હતો. આરોપીએ મોજ માણવા બાળકને શ્વાન સાથે રિક્ષાના પાછળના ભાગમાં પૂર્યો હતો.

આપણ વાંચો: ચીનથી આયાત કરાયેલો 12 લાખનો શ્ર્વાન મરી જતાં કઝિનના ઘરમાં ચોરી કરી

સોશ્યલ મીડિયા પર વાયરલ થયેલા વીડિયોમાં શ્વાનથી બચવા બાળક સતત રડી રહ્યો છે અને શ્વાન તેને કરડવાનો પ્રયાસ કરતો હોવાનું નજરે પડે છે. શ્વાનનો માલિક રિક્ષાની સીટ પર બેસીને બાળકનું આક્રંદ સાંભળી હસતો હોવાનું વીડિયોમાં દેખાય છે. શ્વાનથી દૂર ભાગવા તરફડિયાં મારતા બાળકને શ્વાનમાલિક રોકવાનો પ્રયત્ન કરે છે. આ દરમિયાન શ્વાન બાળકની હડપચી પર કરડ્યો હોવાનું ફરિયાદમાં જણાવાયું હતું.

બાદમાં બાળક રિક્ષામાંથી બહાર નીકળીને ભાગી રહ્યો છે અને તેની પાછળ શ્વાન પર દોડતો હોવાનું વીડિયોમાં નજરે પડે છે. આ બાબતની જાણ બાળકના પિતાને થઈ હતી. માનખુર્દની ખાનગી હૉસ્પિટલમાં બાળકની સારવાર પછી મામલો પોલીસ સ્ટેશને પહોંચ્યો હતો. વીડિયો બતાવી બાળકના પિતાએ ખાન વિરુદ્ધ ફરિયાદ નોંધાવી હતી.

આ પ્રકરણે પોલીસે શુક્રવારે ખાનની ધરપકડ કરી હતી. જોકે બાદમાં તેને નોટિસ આપીને છોડી મૂકવામાં આવ્યો હતો, એમ સૂત્રોએ જણાવ્યું હતું.