(અમારા પ્રતિનિધિ તરફથી)
મુંબઈ: શિવસેના (યુબીટી)ના નેતા સંજય રાઉતે ગુરુવારે કહ્યું હતું કે મહારાષ્ટ્રમાં આગામી સ્થાનિક સ્વરાજ્ય સંસ્થા અને પાલિકાની ચૂંટણીઓ માટે ઈન્ડિ અથવા મહા વિકાસ આઘાડી (એમવીએ) જેવા ગઠબંધનોની આવશ્યકતા નથી.
રાજ્યસભાના સભ્ય અહીં નિયમિત મીડિયા વાર્તાલાપ દરમિયાન પત્રકારો સાથે વાત કરી રહ્યા હતા.
‘મહારાષ્ટ્ર વિધાનસભા ચૂંટણી માટે એમવીએ અને લોકસભાની ચૂંટણી માટે ઈન્ડિ બ્લોકની રચના કરવામાં આવી હતી. પાલિકા ચૂંટણીઓની વાત આવે ત્યારે આવા ગઠબંધનની કોઈ જરૂર રહેતી નથી,’ એમ તેમણે કહ્યું હતું.
દેશભરમાંથી લગભગ બે ડઝન પક્ષો ઇન્ડિયન નેશનલ ડેવલપમેન્ટલ ઇન્ક્લુઝિવ એલાયન્સ (ઈન્ડિ ગઠબંધન)નો ભાગ છે, જ્યારે એમવીએમાં કોંગ્રેસ, સેના (યુબીટી) અને એનસીપી (એસપી)નો સમાવેશ થાય છે.
આ પણ વાંચો: ભાષા વિવાદ: ભાષા વિવાદ વચ્ચે ભાજપ સાંસદ દુબેની ટિપ્પણી પર રાઉતે ફડણવીસ અને શિંદેની ટીકા કરી
રાઉતે મુંબઈ અને અન્ય શહેરોમાં ઉદ્ધવ ઠાકરેની આગેવાની હેઠળની સેના (યુબીટી) અને રાજ ઠાકરેની મહારાષ્ટ્ર નવનિર્માણ સેના (મનસે) વચ્ચે સંયુક્ત ચૂંટણી માટે લોકોની લાગણીનો પણ ઉલ્લેખ કર્યો હતો.
‘લોકોનું દબાણ છે કે સેના (યુબીટી) અને મનસેએ મુંબઈ અને રાજ્યના અન્ય શહેરોમાં પાલિકા ચૂંટણીઓ સાથે લડવી જોઈએ. જોકે, ચૂંટણીઓની જાહેરાત હજુ બાકી હોવાથી, અમે યોગ્ય સમયે નિર્ણય લઈશું,’ એમ પણ રાઉતે કહ્યું હતું.
રાઉતની ટિપ્પણીનો જવાબ આપતા, શિવસેનાના નેતા અને રાજ્યના પ્રધાન ઉદય સામંતે સેના (યુબીટી) અને મનસે વચ્ચેના સંભવિત જોડાણ પર કટાક્ષ કર્યો હતો.
આ પણ વાંચો: ભવિષ્યમાં પણ ત્રણ ભાષાની નીતિ સ્વીકારશે નહીં: સંજય રાઉત
‘ગઠબંધન પછી, એક પક્ષ ફક્ત તેના એજન્ડાને પૂર્ણ કરવાનો પ્રયાસ કરશે,’ એમ સામંતે ઉદ્ધવ ઠાકરેના પક્ષ પર આડકતરી રીતે નિશાન સાધતા કહ્યું હતું.
સામંત મહારાષ્ટ્ર વિધાન ભવનના પરિસરમાં મીડિયા સાથે વાત કરી રહ્યા હતા.
સામંતે રાજ ઠાકરે અને સેના (યુબીટી) કેમ્પના તાજેતરના જાહેર નિવેદનો વચ્ચે પણ વિરોધાભાસ દર્શાવ્યો, જેમાં આ મહિનાની શરૂઆતમાં બંને પક્ષોની સંયુક્ત રેલીનો ઉલ્લેખ કરવામાં આવ્યો હતો. ‘રાજ ઠાકરેએ મરાઠી સમુદાયની ચિંતાઓ વિશે વાત કરી હતી, જ્યારે બીજા (ઉદ્ધવ)એ ફક્ત રાજકારણ વિશે વાત કરી હતી,’ એમ તેમણે કહ્યું હતું.
